الاثنين، 25 يوليو، 2011

علاقات العمل

إجمالا أنا بحس إني شخص غير محبوب في نطاق العمل...مش مكروه بس غير محبوب.. بحافظ على التعامل الرسمي مع زملاء العمل...بقوم بأنشطة معهم خارج أوقات الدوام لكنها من باب المجاملة فقط...باختصار لا أؤمن بوجود علاقة صحية بين الموظفين لأنه بالأخر كل واحد رح يعمل لمصلحته هوه...زائد اني انسان صريح و ما بجامل ولا بشلن وهادا النوع من الشخصيات مش كتير محبوب ببيئة العمل بالذات
الخلاصة...أنا بمحيط العمل انسان مش اجتماعي و ما بجامل ولا بحط واطي لحدا...وبكره المجاملات و الابتسامات المصطنعة...وبحب كل انسان يكون اله خصوصية بشغله و حياته الخاصة...يعني بحب أعمل فقاعة حوالين حياتي و ما بحب حدا يدخلها أبدا...أبدا
في نوعية زملاء في العمل بكرهها و نفسي أفجرها بالمكتب...بسبب انهم بينتهكوا خصوصيتي و بيفرتكوا هاي الفقاعة...المشكلة انه ما بتعرف شو بدك تعمل معهم...تنزل فيه بوكسات؟؟؟ما رح يتفهموا الموضوع بالشركة...تجامله و تجاريه؟؟؟مستحيل لأني فوق ما أنا متضايق على الفقاعة تبعتي رح أتضايق كوني جاي على حالي و بكذب و بجامله...أسكتله؟؟طيب و فقاعتي شو رح يصير فيها؟
- من هاي النوعية اللي بيجي بيحكيلك عن حاله شو عمل امبارح أو بيحكيلك قصة فيلم حضره أو تفاصيل أكيد ما بتهمني...ما بهمني وين سهرت أو مع مين أو قديش انتا فايع و صحبتك حلوة...بس حل عني
- وكمان النوع اللي بيفكر الناس بتحبه...يعني بيجي بيقعد على حفة المكتب...أو بيستعمل الكمبيوتر تبعك بدون اذنك أو بيرد على موبايلك...بتلاقيه على باب بيتك فجأة و بدون سابق انذار...لأنه أكيد أنا بحبه و أكيد عادي انه يعمل هيك....بس بدي أقولك شغلة..على فكرة أنا ما بحبك و ما تستعمل أشيائي بدون اذن بلاش ألعن #$$@%^^*
- النوع اللي بيمغصني هوه النوع اللي بميل للمس غير المبرر...يعني اذا بده يشجعك بيحط ايده على كتفك...أو بيمزح معك فبيفركلك شعرك...أو بيعطي لنفسه الحق يقولي قديش أنا ناصح...أو اذا بوطي حلو أو بلوزتي مش لايقة عالبنطلون( أه في ناس بتحكي هيك من الشباب) ... بس يا واطي يا مش متربي يا شاذ...بعدين مين انتا مشان تعطي رأيك بكرشي أه ؟
- النوع اللي سابق سنه ...هاذ أنا بحبه...مش حبا فيه طبعا...بس لأني أشطر واحد بينكس هاي الفئة فبرتاح نفسيا لوووول يعني بيجيك مهندس امبارح طالع من حفلة تخرجه بيقولك أنا مهندس زيي زيك و لازم تستشيرني بكل اشي...طبعا بياكل اللي فيه النصيب و بيلبد
- النوع اللي بيزعل منك اذا ما صبحت عليه كل يوم و اذا ما سلمت عليه كل يوم و اذا ما شاركت بنشاط هوه مقترحه...طيب ما فهمت اني مش طايق أهلك؟أكتبلك اياها على صباحي كل يوم مشان توصلك؟
- الموظف الجوجل...اللي بدون ما تسأله بيكون سامعك و انتا بتحكي عن موضوع معين و بيصير يقولك على فكرة هاي الشغلة اسمها كذا و بتقدر تعمل كذا ... يا زلمة مين سأل أهلك انتا...بعدين مش أنا اللي بعطي زيادات اخر السنة و لا بوزع نجمة للشاطرين...احلق من هون
ما تقولوا عن هالبوست انه مش زابط و ما إله معنى...اعتبروها فشة فل لأنه في ناس بالشغل معي هيك...ونفسي أقضي عليها

هناك 5 تعليقات:

UmmOmar يقول...

بيرد ع موبايلك..؟؟
وححححححححد الله يا زلمه,, شو بتحكي إنت؟؟

لوووووووووول,, بركي هوه مش عاجبيته تسريحه شعرك وعم بحاول إيساعدك مثلن؟؟
ليش إنت هيك مكبرها
لووووووووووول,,

فش غلك فينا,, ع الأقل ببلاش وما بتسجل ضدك إشي بالمحاكم وعيادات الأطباء النفسينين

أنا بكره الحشريين,, وكل اللي إنت ذكرتهم ناس حشريه ملهاش حل إلا البف باف,, او التجاهل التام

خليهم يحكو عني حيطه,, ولا أكون أنا من جوه مضغوطه ونفسي اظربهم ميت كف ع خد واحد,, او اطعنهم بقلم الرصاص بذانهم

سنحه تسنحهم إن شاؤء الله

مواطنون بلا حدود يقول...

أه والله...مرة كنت عند المدير و موبايلي عالمكتب...رجعت بيقولي قلان الفلاني حكى معك و بده اياك ترجع تحاكيه ضروري...أنا صفنت انه ليش حكى على الشركة مش عالموبايل ...اكتشفت بعدين انه حاكي عالموبايل و الاخ رد عليه...حجته انه التلفون كا بيرن و صوته عالي ... قلتله ما هو لو انك قاعد على مكتبك و في حالك ما بيوصلك الصوت ... يعني جاي عنا و مش عاجبه صوت الموبايل العالي...قلتله اسمع رح اعتبرك غشيم و ما بتعرف و لمصلحتك لا تعيدها مرة ثانية...واذا انزعجت من الصوت سكر ذنيك بلاش يصيرلك اشي منيح...حاولت أكون معه مؤدب قد ما بقدر...المنيح انه ما رجع عادها مرة تانية

UmmOmar يقول...

بتعرف لو صارت معي
وحتى لو إنها بنت الي ردت ع الخط
بحكيلها,, طب كان عملتي كانسل
كان عملتي كاتم للصوت
كان جبتيلي إياه
مش حجه إنك تفتح خط, , وتعرف مين المتصل وتديون معه,, وتنقلي أخبار منه كمان

الله ستره ما بشتغل معي
:)

غير معرف يقول...

أنا عندي نفس الشعور بكرههم هدول الناس بس انهم يفهموا ويحلو عن الواحد!!!! أبدا بضلهم يحشروا أنفهم بكل شي عشان يفصلو الناس عمقاسهم وبالآخر بتآمروا عليك وبطلعوك!!! دير بالك

Whisper يقول...

مش عارفه ليش اجاني شعور ان انا اللي كاتبه عالبوست بالزمنات :) فشّه غل على شبه فشّات الغل تبعوني ايام زمان :)

يا الله شو بكرههم لهالعالم و الحمد لله ما بعرف اجامل و ابتسم و كأنه ما في شي, طس على طول
بالعاده بكرهوك بالبدايه و بعدين بتعودو عليك و بصيرو يحبوك لهالصفات اللي فيك ...هيك صار معي :)

تعودو على ردود افعالي و ان ما عندي لحية امشطه :)
العلاقات الرسمية افضل و اريح للراس و خصوصا هدول اللي ما بفصلو الشغل عن الحياة و كلّه مكشوف قدام العالم