الثلاثاء، 15 فبراير، 2011

لو كنت رئيسا مكلّفا... الجزء الثاني

سكرت التليفون مع صاحبنا في الديوان...أخدت معي عدة تشكيل الوزارة...كاسة قهوة لاب توب و شوية ورق للخرابيش و قعدت عالبرندة
قلت خلينا نبسط الأمور...الموضوع مثل تشكيل فريق كرة قدم...لاعبين و خطة و بعدين بيبلش الشغل, أصلا همه بيسموه الفريق الوزاري (أخ بس لو معي رقم عدنان حمد)
طيب خلينا نشوف مراكز الفريق, أو الوزارات...عنا الدفاع و المالية و الداخلية و الخارجية و الاعلام ...شو في كمان؟
بحبشت عالنت عن الوزارات اللي نسيتها...يااا باااييييييييييي....طلع عنا 25 وزير...من وين بدي أجيبهم هدول؟طيب ليش أصلا في 25 وزارة؟ والله الموضوع بده شغل
فكرت أستعين بمهارة (الشف) اللي كنا نستعملها بشف التقارير أيام الجامعة...بشوف أسماء الوزراء بأخر 5 وزارات و اللي بيتكرروا بجيبهم و الباقي بيتدبر...بعدين قلت لأ...لوكانت الأسماء القديمة نافعة ما كانوا جابوا واحد زيي ما حدا بيعرفه مشان يشكل وزارة...معناها المطلوب همه أصحاب الكفاءات فعلا...وبما إنه الكفاءات اللي بالأردن عم بتهاجر فقررت انه الوزراء لأول مرة يكونوا من المغتربين...ليش لأ؟ والله في ناس ناجحين كتير و ماسكين شركات كبيرة كتير و أصحاب شركات بالملايين...والإدارة من حيث المبدأ واحدة...من ادارة شركة بسيطة لأدارة بلد...و أكيد هدول أول ناس الهم مصلحة انه البلد يتحسن مشان يقدروا يرجعوا و يعيشوا حياتهم بالأردن
عملت بحث عن أصحاب الشركات و المدراء الناجحين و حتى أصحاب قصص النجاح و حضرت قائمة و قررت أنطلق من السبت
طلعت السبت على شركة و طلبت مقابلة صاحب الشركة
أنا: السلام عليكم بدي أقابل السيد فلان
السكرتير: فلان فلان ؟ صاحب الشركة؟
أنا : أيوه
السكرتير مع انتسامه سقعة: و مين حضرتك
أنا: رئيس الوزراء الأردني
السكرتير(محشش): طيب لحظة...رن عالمدير و قله رئيس الوزراء الأردني بده يقابلك
المدير: مين يا خوي؟ قله مشغول؟ معاه تلفون من المرحوم جمال عبد الناصر...أنا فاضي للمسخرة؟
قلتله يا أخي زي ما بقلك...لو سمحت أنا بدي نص ساعة من وقتك مش أكتر
قال طيب أعطيني 5 دقايق
المهم دخلت عنده:عرفته عن حالي و ورجيته نسخة من خطاب التكليف...اعتذر عن سوء التفاهم و قال تفضل بشو بقدر أخدمك؟
قلتله أنا حابب انه استعين بالخبرات الأردنية اللي بره و أشوف شو في نصائح
قلي اسمع: أنا لو الموضوع بايدي...كان خليت 5 وزارات...الداخلية و الخارجية و المالية و الاعلام و الدفاع و الباقي بعين الهم وزير واحد بس يقوم فيهم كلهم لأنه ما الهم داعي..أصلا وكيل الوزارة هوه اللي بيشتغل كل الشغل...هيك بتكون قللت المصاريف و وجع الراس...و كل وزير بتقعد معه يوم كامل بتوجهه
أنا: معك 100% بس هاد الحكي ما بينفع و انتا عارف
المدير: قال طيب...هدول الوزارات الخمسة اللي فوق تشاور مع جلالته فيهم هوه بيفيدك أكتر واحد
أنا: و الباقي؟
المدير: لا تخاف: انتا بس افتح تلفونك...رح يجيك تلفون من شيوخ العشاير كل عشيرة بدها حصة...بساعة بيكون كل الوزارات تعبّت عندك
أنا: طيب و اللي ما اله عشيرة شو مين بيمثله
المدير: اله رب العالمين...
أنا: طيب حضرتك ما بدك تصير وزير؟
المدير: لأ... شو بدي بهالشغلة....إرضاء الناس غاية لا تدرك...خليني هون بحالي أحسن...بكره اذا صرت وزير بيصير الكل يقولك فلان عمل و فلان سوى...بيشرشحونا بالجرايد لأنه احنا متعودين عالنقد وبس...وأي قرش بيجيني من شغلي هون رح يقولوا أبصر من وين جابه...شو بدي بهالشغلة
رجعت عالبيت...أكتر من 50 تلفون بالساعة الكل بيطلب وسايط...العشائر و الأحزاب و النقابات و التيارات...حلقتلهم كلهم عالناعم و قررت أخد قيلولة
صحيت و فتحت الجرايد لقيت بيان استنكار من الإخوان المسلمين لاختياري لأني محسوب على العلمانيين...و استنكار من اليساريين لأني محسوب على المتشددين...و استنكار من العشاير لأني مش ابن عشاير ومش معروف قرعة أبوي من وين...و استنكار من المتقاعدين العسكريين لأني مش عسكري...و استنكار من رجال الأعمال لأني كادح و لا أنتمي لطبقة رجال الأعمال... و استنكار من نقيب النهندسين لأني مش دافع رسوم النقاية و استنكار من الدكنجي اللي جنب بيتنا لأني ما بشتري من عنده و استنكار من أخوي لأني ما دبرتله شغل بالخليج ... الوحيد اللي ما استنكر هوه ابن العشيرة الأكبر من كل العشائر...وابن الحزب الأكبر من كل الأحزاب...عشيرة المواطن العادي اللي بده مصلحة البلد...وحزب المواطن الأردني من شنى الأصول و المنابت ... مسيحي كان أو مسلم...شرق أردني أو غرب أردني...شمالات أو من الجنوب...فلاح أو مدني...عامل أو صاحب عمل

بيني و بينكم ... منيح انه طلع الموضوع كله تخيلات



الاثنين، 14 فبراير، 2011

Tahrir got talent

بعد نجاح الثورة في مصر فرحت كما معظم العرب ليس بسقوط طاغية فقط...بل بولادة أمل بالتغيير و الاستجابة لمطالب الشعوب
ما حدث في ميدان التحرير و حتى في مصر كلها أثبت أن الشعوب لم تتحول كلها للنموذج السيء للشباب الذي نراه كل يوم في كل مكان
ما حدث في ميدان التحرير أثت أن الشعب العربي و خصوصا الشباب مقسوم الى قسمين أو بالأحرى وضح الفرق بين نوعين من الناس:
وضح الفرق بين من يضحي بنفسه في سبيل وطنه و من يضحي بوطنه في سبيل نفسه
بين تامر حسني الذي يبكي دموعا كاذبة من (كتلة الميدان) و وائل غنيم الذي بكى شهداء التحرير
بين سالي زهران التي قدمت روحها قبل جسدها للوطن و بين غادة عبد الرازق التي تبيع جسدها على التلفزيون كل يوم لمن يدفع
بين (تسالي) أحلام مستغانمي التي أصبحت مصدر الهام الشباب الفكري و كتابات أحمد فؤاد نجم
بين شباب يهتف ضد برشلونة و يخرج في مسيرات احتفالية بالفوز و شباب يهتف ضد النظام و يعسكر أمام الدبابات
بين إعلام يزور الحقائق و إعلام يحقق في كل تزوير
بين (ممثل) يدافع عن الشعب في أفلامه وفي الحقيقة يتهمه بالجنون و الدعارة و التعاطي على التلفزيون و فنان كان من أول الناس اللي نزلوا الميدان ليعبر في الحقيقة عما كان يدور في أفلامه
بين من يستغل الظروف للسرقة و الإعتداء و بين شباب حاربوا حتى يسترجعوا بلدهم الذي سرق منهم
بين من يتحرش بكل النساء في كل مكان و بين من كان يحمي النساء المتظاهرات من الإعتداء
بين شباب تحركه الطائفية ليقاتل جاره المسيحي و شباب تحركه الوطنية للدفاع عن بني وطنه مهما اختلف دينهم
بين شباب تحركه العنصرية و القبلية و شباب عرف أن كل بني وطنه هم عشيرته
بين شباب star academy و Arab got talent وشباب ميدان التحرير
أنا اخترت ميدان التحرير...انت مع مين؟

الخميس، 10 فبراير، 2011

لو كنت رئيسا مكلّفا... الجزء الأول

اليوم و أثناء متابعتي للأخبار المحلية...استعرضت السير الذاتية للوزراء الجدد...اكتشفت أن عددا لا بأس به هم من المهندسين

دققت في سيرة وزير الداخلية مثلا,كان مهندسا في الأمانة ثم عمل في شركة مقاولات في الخليج يحمل شهادة في الهندسة المدنية

فكرت في نفسي...أنا معي شهادة هندسة عملت في الأردن سنتين و لا زلت في الخليج أعمل في شركة مقاولات...بالعربي عندي نفس المؤهلات و الخبرة...فكرت لماذا لا أصبح وزيرا؟

فكرت أيضا في المشاورات التي تحدث لاختيار الوزراء...يا ترى على أي أساس يتم الاختيار و كيف بيبلغوا الوزراء...طبعا أنا مش واصل ولا حدا بتاريخ عيلتنا كله ممكن يفيدني عن ما يحدث خلال المشاورات...فأطلقت العنان لمخيلتي

تخيلت نفسي في بيتي بالسعودية قاعد بلعب بلاي ستايشن و زوجتي بتقلي تلفونك بيرن بدون رقم ...وقفت اللعبة و رديت

أنا: ألو

الطرف الثاني: ألو أيوه المهندس علاء؟

أنا: أهلين مين معي

الطرف التاني:معك فلان الفلاني من الديوان الملكي...

أنا: الأردني ولا السعودي؟

الطرف التاني: نعم؟ أه, لا الأردني

أنا:حيّاك الله تفضل؟

الطرف التاني: يزيد فضلك..حبينا نبلغك انه جلالة الملك أصدر قرار بتكليفك برئاسة الوزارة و تشكيل الحكومة الجديدة و معك صلاحيات اختيار الأسماء بدون أي ضغط و اللي بيضغط عليك هي رقمي الخاص و أنا فورا برفع الموضوع لجلالته

أنا: أوكي هات الرقم....بس عفوا على هالسؤال لا تواخذني...يعني شو مشان المصاري و ما مصاري؟ يعني خدمة البلد على عيني و راسي بس الواحد عنده مصاريف و انتا عارف؟

الطرف التاني: يا سيدي قد ما كان راتبك بالخليج منعطيك زيه

أنا: ماشي أنا راتبي هلقد

الطرف:بس؟؟ خلص بسيطة انحلت المشكلة...استقيل و بتتعين هون براتب و رتبة وزير

أنا: قديش يعني؟

الطرف التاني: الراتب الأساسي (....)

أنا: لااااا...بدك أترك راتبي و أجي على هدول؟ لا شكرا

الطرف التاني: اسمع...زيد عالرقم اللي فوق مياومات و علاوات و بدل سفرات و بدل سكن و سيارات و امتيازات...يعني بطلع 5 أضعاف اللي بتاخده

أنا: اوكي اذا هيك ممتاز...ابعتلي الأوفر عالأيميل...مصدق من وزارة العمل و وزارة الخارجية و نقابة المهندسين وقاضي القضاة و المحكمة الشرعية و مديرية الأمن العام و الدفاع المدني و المخابرات و الأحوال المدنية و بدي كتاب عدم ممانعة من وزير الداخلية ...

الطرف التاني: ول ول لشو كل هدول؟

أنا: و الله صراحة ما بعرف بس كل معاملة بعملها بتقولولي صدقها من كل الجهات اللي الها دخل و اللي ما الها فمن باب الاحتياط يعني بلاش تلزم بعدين

الطرف التاني: ماشي يا سيدي...

أنا: واذا ما فيها ثقلة دم يعني, بما انك رايح رايح جددلي جواز السفر معك اسمك زلمة واصل...لأني خايف أروح يطلعلي موظف ابن حلال يكتشف انه ابن عمة خالة مرت أخو جده أبو أبوه لجوز خالتي أصله فلسطيني و لسه بالضفة عايش بعدين بيسحبوا مني الجواز

الطرف التاني: طيب..خلص اتفقنا يعني؟

أنا: اتفقنا بس عندي شرط...أنا ما رح أستقيل من هون...بجرب و بشوف الوضع اذا منيح بستقيل

الطرف التاني: ماشي ماشي خلصنا بس

أنا: على بركة الله...شو المطلوب مني هلأ؟

الطرف التاني: احنا حجزنالك على أول طيارة عالأردن مشان تبلش مشاوراتك ... الطيارة بكرة الساعة 7

أنا: وين وين؟طوّل بالك...لسا اجازتي من هون ما استحقت و بيطلعليش اجازات هلأ و رح يخصموا من الراتب...فش مجال نخليها عالصيف؟

الطرف التاني: يارجل بقولك جلالة الملك و رئاسة حكومة و انتا بتقولي اجازة؟

أنا: و الله يا خوي مهو اذا طلعت بلا اجازة بيكنسلوني نهائي من هون...انتا بترضالي اياها؟ بعدين تأشيرة الخروج و العودة بدها تجديد و المعقب السعودي ماخد اجازة يومين...فبدك تستنى

الطرف التاني: يا زلمة شو اللي بتحكيه...بدك اياني أقول لجلالته أنه المعقب ماخذ إجازة و بتقدرش تيجي لبعد بكره؟ الله يرضى عليك احكي اشي منطقي و الله بيقلبوا الدنيا علي و عليك بعدين

أنا: طيب شو أعمل؟ بعدين علي قرض سيارة هون لسه ما خلص

الطرف التاني: احنا بنتكفل فيه مو مشكلة بس انتا تعال

أنا: لاااااااااااااا؟ مشان يفضحوني الجرايد و يطلعوني باخد مصاري الدولة لجيبتي؟لا ياخوي شكرا

الطرف التاني: يستر على عرضك حلّها

أنا: طيب اسمع...قديش معي وقت مشان أشكل الحكومة؟

الطرف التاني: يعني ما في وقت محدد...خذ وقتك بس يعني بالعقل

أنا: خلص أعطيني لأخر النهار و بحكي معك و بقولك كيف بدنا نحلها

الطرف التاني: ماشي بس الله يخليك لا تتأخر علي

أنا: لا ولا يهمك...بس اسمع برنلك من خطي الأردني بتحكي معي...مشان ما يحسب عليك دولي يعني

الطرف التاني: كيف؟اه اوكي كتر خيرك (من وين لقطوا هالأشكال؟)

يتبع...