الاثنين، 21 يونيو، 2010

رحيل .... و ألم


اليوم أخوي سافر يشتغل بالبحرين...رجعت بالايام 4 سنين لورا...وقت سافرت و تركت أهلي...
فعلا وقت الفراق مؤلم جدا....يا الله كيف كانت المشاعرمؤلمة و الأجواء حزينة...كأني تركت في عمان قطعة مني دايما نفسي أرجعلها
فعلا أقرب شعور للموت هو الفراق
تترك أهلك و أصحابك...ذكرياتك و عمرك اللي عشته...يا الله كم أفتقد كل زاوية من البيت...كم أفتقد حنان أمي...و هيبة أبي
كم أفتقد تمضية الوقت مع أولاد أخوي... ومع الناس و في شوارع عمان
كل رجولتك و قوتك تنهار لحظة الوداع...كل انجازاتك في العمل في الخليج تفقد قيمتها أمام لحظة أو حدث لم تعشه مع أهلك...
يا ترى هل من شيء بالدنيا ممكن أن يكون بقيمة وقفتك مع أهلك لما يحتاجوك؟هل من شيء يعوض عدم حضورك ولادة أول حفيدة في العيلة؟
واللي بيزعل أكتر من كل هاد أنه بتحس جذورك في الغربة كل يوم عم تنزرع أعمق و أعمق...لأن كل مرة برجع اجازة و بشوف الوضع بعمان بشوف الرجعة صارت أصعب...الله يسامح اللي كانوا السبب و اللي مش عم يحسوا فينا...احنا بالنسبة الهم حسابات و فلوس عم تتحول للبلد...بدون أدنى احساس وقيمة لعمرنا اللي عم يضيع
لأ...الله لا يسامحهم...أه ما يسامحهم...اللي كان السبب بنزول دمعة أمي كل ما أرجع اسافر...واللي خلّى ابن أخوي اللي عمره 3 سنين يبكي لأنه حس أنه بكره ما رح يشوف أبوه ويعانقه
حسبي الله هو نعم الوكيل عاللي كان السبب

الاثنين، 7 يونيو، 2010

بالله عليك تسكت

من فترة و أنا فاقد الرغبة بالكتابة أو حتى التعليق على أي خبر من الأخبار...حاسس حالي فقدت الاهتمام بالمناقشة و التعليق و المجاكرة...كل ما يجي خبر عالتلفزيون بيسم البدن ما بحرق أعصابي فيه...ببساطة بغير المحطة...لكن اللي رح أحكي عنهم هلأ حيجننوني...بس بما اني ما لي طولة بال حاليا على النقاش...بدي أقول لكل واحد فيهم (بالله عليك تسكت)

- عزام الأحمد بيقول في تصريحات على أحد مواقع فتح أن غزة ليست بحاجة الى مساعدات و انه السلطة عم تبعت مساعدات بشكل متواصل للقطاع عشان هيك ما بنقدر نقول انه غزة محاصرة....يعني بديش أحكي عنك أي كلمة...مواقفك اللي بتخزي لحالها بتحكي...بس يعني العالم كله تحرك مشان يفك الحصار و حضرتك عايش بعالم تاني...بالله عليك تسكت

- خالد مشعل بيقول انه حركة حماس تقبل بدولة فلسطينية في حدود ال67....طيب والباقي شو وضعهم؟ بعدين تعال هون..مين أعطاك الحق تحكي هالحكي...يعني بصفتك شو؟كيف بتقرر عن الناس اذا بتقبل باسرائيل أو لأ؟ كيف بتعطي شرعية للأحتلال اللي وجود و شعبية الحركة اللي بتمثلها حضرتك قائمة على (محوها من الوجود)؟ بالله عليك تسكت

- التلفزيون المصري بيقول على لسان أحمد أبو الغيط أنه مصر عم تتحرك دوليا لرفع الحصار الأسرائيلي عن غزة...طيب شو رأيك ترفع الحصار المصري و بلا جميلة العالم؟كأنه مصر مش هيه اللي مغلقة معبر رفح و كأنه الجدار اللي تحت الارض مش الحكومة المصرية اللي بانيته...أقولك, بالله عليك تسكت