السبت، 10 يوليو، 2010

احنا بسينما ولا وين بالزبط

صباح الخير من عمان...هاد أول بوست من عمان...رح أكتبلكم احداث صارت معي بالاجازة...مش بالضرورة بالترتيب بس رح احاول اكتب كل شي
امبارح قعدت انا و مرتي نفكر شو بدنا نعمل...طبعا عمان ملياتة أماكن حلوة فبالاخر قررنا نروح نحضر سينما
ولأنه مرتي ما بتحضر الا عربي رحنا نحضر فيلم عسل اسود لأحمد حلمي
الفيلم رائع و حلو كتير صراحة...بس اكتشفت انه الشعب الأردني ما عنده أبدا ثقافة السينما
أول شي لما تروح تقطع التذكرة...يعني كأنه دور مخبز...واللي قدامك بيقعد يشاور كل أصحبه القريب منهم واللي على بعد 20 متر ...انه أي كرسي و هون نقعد ولا هون...ساعة بياخد لأنه فعلا قرار تاريخي وين بدك تقعد و لازم مجلس الشورى ياخد قرار بهالموضوع
المهم...الفيلم كان 10:45 و الناس للساعة 11:30 و همه لسا بيجوا...بتضطر تبعد لهاد و تستنى حدا يمر قدامك و طبعا الشب اللي مسؤول عن الجلوس بيشيك عالتذكرة تبعتك 100 مرة...غير الناس اللي بتقطع تذكرة بمكان و بتقعد بمكان تاني بعرفش ليش و خدلك مفاصلة عالكراسي كأنك بباص مؤسسة...وحدة مع أولادها بتقطع تذاكر بكراسي مفرقة و بتصيؤ تترجى العالم مشان يقعدوا كلهم بنفس الصف
كمية الأطفال اللي بالسينما أكتر من الحضانة اللي جنب بيتنا...أعمارهم أكيد مش أعمار ناس بتفهم شو يعني سينما...وظيفتهم الوحيدة العياط و النكد من باب اضافة موسيقى تصويرية للفيلم
المهم بلش الفيلم...ظهر أحمد حلمي...بلش التصفيق و التصفير!!!! شو احنا بمسرح؟يعتي لحد هلأ مش ملاقي تفسير لهالاشي
طبعا بدون ما احكي قديش السينما سيئة و صغيرة و ريحة الحمامات و الصورة اللي كل شوي بتروح ...أي لو جايب نسخة من البلد كانت الصورة أحسن....بس معلش هاد كان اختيار خاطئ من طرفي
هلأ بنص الفيلم بتحس انه مجلس الوزراء موجود معك بالسينما...يعني الموبايلات ما سكتت...و اسمع انا بالسينما بعدين بحكي معك...والله رنيت عليك مشان تيجي معنا بس انتا ما رديت...والله الفيلم مش كتير لو حضرنا اللمبي أحسن....عايش مع الأخ كنت لدرجة اني حسيت انه لازم أتعرف عليه هوه و صاحبه لأني صرت أعرف كتير عنهم
صوت أكل البوشار و شرب البيبسي كمان من المؤثرات الصوتية اللي ما بتغيب...جاروشة الله وكيلكم...كأنه الأخ عم يحملنا جميلة انه اشترى بوشار...غير المعلقين اللي لازم يشرحلك الفيلم و ليش هيك صار و يترجم أي كلمة انجليزي لصاحبة و يعيد الجملة اللي حكاها الممثل...وطبعا الضحكة عبارة عن وصلة مدتها لا تقل عن 30 ثانية
باختصار أنا بعتقد انه على باب السينما لازم يحطوا لزقة على تم كل واحد فايت حتى ما نسمع صوته ابدا...الفيلم حلو كتير بس أعتقد اني حضرت منه 65% بس...و رح أحضره كمان مرة بس ينزل بالبحرين انشالله

هلأ خارج الموضوع عندي ملاحظة :
4 بنات في عمر المراهقة محجبات حجاب من النوع الفايع كانوا بالسينما بدون مرافق و طلعوا من الفيلم عال 1:00 صباحا تقريبا و أخدوا تكسي للبيت ... شو لهالدرجة صرنا كوول؟يعني شوفير التكسي لو حول طريقه بنص هالليل و أخد البنات وين ما كان شو بيصير؟ بيقولوا أهلها الله لا يوفقه هالشوفير ما عنده ضمير...و ما بيقولوا انه اللي بيخلي بناته لهالوقت بره و يروحوا لحالهم انه هوه اللي ما عنده شرف
بيعين الله...
صحيح اللي عنده اقتراحات لأماكن حلوة يحكيلي

الخميس، 1 يوليو، 2010

اجازة

و أخيرا مروا الايام ببطء قاتل...و اليوم أنا نازل على عمان
يا عمي جو الاجازةغير...نفسيته الواحد بتكون حلوة و مروق علأخر....ما بيفكر بأي اشي...لا بشغل و لا بمصاريف و لااااااا اشي
شعور انك حتشوف أهلك و أصحابك و جيرانك و أهم شي مرتك :)
حتى مع اني ما تعرفت على حدا فيكم شخصيا بس مجرد فكرة انه ممكن أصادف أي حدا فيكم بالشارع أو بمطعم أو عالأشارة حتى لو ما عرفنا بعض بتخليني مبسوط
و برغم كل المشاكل اللي بنسمع عنها بس الأردن بيضل أحلى

يا أخي الشعور غير لما تكون بين أهلك و ناسك
من الصبح و أنا بغني أغاني السفر...حمد الله عالسلامه يا جاي من السفر يبع راغب علامة و تبعة عمرو دياب حمدالله عالسلامه هلا هلا اشتقنا ليكم ياما...و كل اغنية فيها كلمة سفر أو استقبال ... يعني المزاج رايق عالأخر الحمدلله...انشالله يضل هيك
يالله ادعولي أوصل بالسلامه و بنشوفكم على خير انشالله