الثلاثاء، 31 أغسطس، 2010

سؤال

امبارح كنا في نقاش على الفطور مع الشباب اللي بالشغل عن موضوع المذاهب الاسلامية الاربع
هلأ في شب كان رأيه انه المسلم لازم يتبع أحد المذاهب الأربعة و يلتزم فيه كامل و لا يجوز انك تختار و تنوع في مرجعيتك بين المذاهب أو ما يسمى بالتلفيق بين المذاهب...لدرجة أنه وصف من يقوم بهذا العمل بالمنافق في الدين من باب انه يتبع الاسهل من هذه المذاهب و بالتالي بيفصل الدين على حسب رغباته...
أنا صراحة صدمني الكلام...يعني المذاهب الاربعة صحيحة باتفاق العلماء فوين الخطأ في اتباع الصحيح بغض النظر عن اختلاف المذهب؟يعني أنا اتبع القران و السنة و هذول الأئمة رحمة الله عليهم مع الاحترام الشديد همه مجرد ناس اجتهدوا و من الخطأ اعتبارهم أصحاب ملة؟
كمان نقطة انه ربنا أعطاني عقل حتى اشغله و المسلم ما بيصير يتربى على انه تابع غير للسنة و ليس للمذهب ومن حقي أقرأ الفتاوى و أرجح بعقلي مين الصح مع التشديد على انه النية تكون صافية و مخلصة لله طبعا
ما بعرف الموضوع شغل بالي هاليومين...شورأيكم؟

الاثنين، 23 أغسطس، 2010

اجازتي ... الجزء الثاني


صباح الخير...
من 3 سنوات تقريبا من وقت ما كنت خاطب يعني و بحكم انه مرتي سورية فمن يومها و نزلتنا عالشام صارت مشوار عادي و سهل...من هداك اليوم و أنا بحس أنه في عندنا مشكلة بالسياحة في الأردن...يعني بالشام في بدل المطعم ألف و بدل المشوار ألف و بدل الفعالية فيه ألف...بعمان بتدور عالطشة دوارة...وكنت اكل هم اذا حدا بيحكيلي انه جاي عالأردن من برا لأنه مش رح أعرف وين بدي أوديه...
أنا بشوف انه فعلا عنا مشكلة بالسياحة في الأردن و من ناحيتي قطعت الأمل بالسياحة الداخلية من زمان...وبهالاجازة حجم الزهق اللي عشته بعمان أكدلي هالأشي...و برأيي انه مشكلة السياحة بالأردن الها 3 جوانب:

- الناس: يعني أهل الأردن لسه مش مقتنعين انه المواطن بيلعب دور كبير بالترويج للسياحة....التكشيرة و الوجه الناشف و المعاملة غير اللطيفة, زائد نظرة الاستهبال و الخورفة و التخويث اللي بننظرها للسياح بتخلي السائح يفكر مليون مرة قبل ما يرجع للأردن...بالاضافة انه المواطن بيعتبر السياحة شي ما بيعنيه مع انه هاد من صلب واجباته كمواطن...اذا بتحب وطنك من واجبك تخلي صورته أحلى مش تفكر اذا شغلت أغنية هبلة لعمر العبداللات بالسيارة انك صرت وطني

- الأماكن: يعني في مشكلة كبيرة من هالناحية...يعني بتمشي بعمان ما عندك الا المطاعم و المقاهي...صرنا رواد بالسياحة البطنية و الأرجيلية...بالمقابل الأماكن الحلوة اللي ممكن الواحد يروح يسترخي فيها قليلة جدا...يعني الواحد أحيانا بيحتاج أماكن بس يقعد و يهدي أعصابه...مثل الحدائق الحلوة اللي بتلاقي دمشق مليانه منها على الرغم من أنه زحمة العمران في دمشق أكثر من عنا بكثير...ممكن كمان أنشطةمجانية للناس مثل ما كان يصير بشارع الوكالات و زي فعاليات مهرجان الأردن...صحيح انه ما في دعاية كافية لهيك أنشطة بس الناس بتنبسط فيها كتير ... و لما يكون في شي ببلاش المواطن بيحس انه الحكومة سائلة فيه لو بشي تافه وبيخف ضغط الحياة عنه شوي... و السائح بيحس انه احنا دولة تهتم بالترفيه عن الشعب و انه شعبنا مثقف و متحضر

- تنظيم قطاع السياحة: هاد الجانب فيه مشكلة كتير كبيرة...يعني ادارة قطاع السياحة بدها ناس عندها خبرة حقيقية مش ناس بتسافر تشوف شو في برا و بتحاول تطبقه بدون تفكير هالاشي بيزبط عنا ولا لأ.... الناس ببلاد تانية بتعمل شيء من لا شيء...على قولة أحد الكتاب انه الناس التانية بيجيبوا تنكة مصدية بيعملوا عنها قصة و بيزبطوا المكان حواليها و بتصير معلم سياحي....احنا ماسكين هالبحر الميت و نازلين ترويج للسياحة العلاجية لحد ما قرب ينشف البحر...طيب و بعدين؟ يعني لازم سياحنا يكونوا ختايرة و مكرسحين ببلاد برة؟ ليس الخليجي بيحكيلك عن لبنان و الاماكن اللي زارها و الطبيعة و بتلاقيه بينصحك تروح هناك أكتر من اللبناني نفسه و بس تحكيله الأردن بيقولك المستشفى التخصصي ؟ ليش ما عنا نشاطات ثقافية و فنية بنعلن عنها و بنحضر الها زي ما بيصير بأبوظبي مثلا؟سيبوني من مهرجانات المطربين لأنه هاي مش ثقافة...هدول المطربين أي فندق أو نادي ليلي ممكن يدفعلهم و ييجوا يغنوا...أنا بحكي عن الموسيقى اللي هيه غذاء الروح...و العروض المسرحية الهادفة و المسرحيات الموسيقية...زي مسرحية صقر قريش لفرقة انانا و مسرحيات فيروز و غيرهم؟

كمان الدعاية الها دور...يعني أنا هلكت و أنا بحاول أخطط اجازتي مسبقا حتى أحضر شي من مهرجان الأردن ( أو مهرجان صيف عمان يمكن اسمه) الفعاليات الثقافية المجانية و دور بهالمواقع ما بتلاقي جدول فعاليات...كل كم يوم بعملوا تغيير للأعلانات اللي بالشوارع لنشاطات بعد كم يوم...يعني صار عندي انطباع انه ما في تخطيط للفعاليات و انه اللي بيزبط بنعلن عنه....بينما في سوريا بتصدر نشرة عن وزارة الثقافة مثلا فيها كل الفعاليات الثقافية الشهرية بدار الأوبرا و قلعة دمشق

زائد انه بحس انه ما في دراسة لتكلفة السياحةحتى دايما نقارن حالنا بالدول المجاورة....فعلا ممكن تحصل عرض 3 أيام بلبنان و يكونوا أرخص من ليلة بالعقبة...رحلات تركيا السنةمن الأردن ضربت أرقام قياسية لدرجة أنه بعض المكاتب لازم تحجز عندها قبل اسبوعين لأنه اسبوع بتركيا بسعر ليلتين بموفنبيك البحر الميت...زائد انه لازم يكون في رقابة عالمطاعم و الفنادق و المرافق السياحية و العاملين فيها واللي بيقدموا خدمات للسياح و ببيعوا تذكارات سياحية و حتى على سواقين التكسي للحد من ظاهرة خورفة السياح...لأنه اذا السائح حس انه احنا شعب نصاب بعمره ما رح يرجع يزورنا الا مضطر...وكمان رقابة على العاملين بالسياحة لضمان انهم يتحلوا باللباقة الكافية لعدم (شل أمل ) صورة الأردن الخارجية...بلكي بطلنا نسمع من الناس انه احنا جفصين و وقحين و حرامية و نصابين و كذابين و دفشين

يعني مثال جامع لكل هاد هوه البترا...لما دخلت التصويت فزعنا كلنا صوتنا و نجحت و صارت من عجائب الدنيا اليبعة الحديثة...طيب شو صار من هداك اليوم لليوم؟ سألت واحد صديقي لبناني زار البترا قاللي (يعني خسارة الفلوس و التعب...دفعنا مبلغ غير منطقي لزيارة منطقة سياحية ما فيها مرافق محترمة و كل المشوار ريحة اخراجات الحيوانات بانفي و معي مرافق بدوي محسسني اني بشتغل عنده....بتمشي ساعة و بتكسروا رجليك ما بتلاقي مكان ترتاح فيه يكون سعره منطقي) أنا صراحةما زرت البترا و ما بعرف اذا كان بيبالغ بكلامه بس واضح جدا انه ما انبسط من التجربة أبدا

لما بكون على أي طريق خارجي بالأردن و بقرأ اعلانات الترويج للسياحة بحس انه فيها نوع من الترجاية لسائح فات عالأردن و ما انبسط و قرر يغير وجهته لبلد تاني بحس الاعلان رح ينطق انه مشان الله بس ضلوا كمان شوي... و أنا بالنسبة الي بس أشوف هالاعلان بقول بنفسي...الله يلعنك ما أكذبك

الاثنين، 16 أغسطس، 2010

اجازتي...الجزء الأول

بدي أحكيلكم شوية مواقف و ملاحظات من الاجازة .... كل ما أتذكر موقف من الاجازة بحكيلكم اياه
أول موقف صار معي بمطار الملك فهد بالدمام....و أنا رايح عالمطار اجاني تلفون من زميل معنا بالشركة كان راجع من عمان بنفس اليوم اللي أنا مسافر فيه بيقول انه في تأخير بطيارة الملكية
ما عرفت شو أعمل بس قلت حرام يضل الشوفير معي و أأخره فقلتله روح خلص...طبعا موظفين الكاونتر ما حدا جاب سيرة تأخير...مع انه واجب مدير المحطة أنه يتابع هيك مواضيع
عملنا بوردينغ و ختمنا الجواز قام خبرني صاحبي انه التأخير المتوقع 5 ساعات...قلت أمري لله بستنى
الزناخةبالموضوع أنه طول 5 ساعات و ما شفنا حدا من الملكية مشان يخبرنا شو الوضع أو يسأل اذا حدا لازمه اشي...شركات الطيران التانية بالعادة بتوزع وجبات خفيفة عالمسافرين بس الملكية مش هيك أبدا...
المهم وصلت الطيارة عالأردن...أول ما تخبط الطيارة بالأرض بتبلش العالم تفتح موبايلاتها...و توقف بممر الطيارة مشان تنزل أول شي...كأنه المطار رح يهرب...بدون أدنى اهتمام بتعليمات كابتن الطيارة انه الكل يضل بمقعده و انه الموبايلات ما تشتغل...احنا شعب ما بيسمع و اذا سمع ما بيرد على حدا...و كأنه الطيار بيحكيهيك من باب سقاعة الوجه و بالتالي من واجبنا نجاكره
موظفين الجوازات محترمين كانوا صراحة بس أنا شفت أنه الزحمة على ختم الجوازات ما الها داعي كان و ممكن تنحل بسهولة...بس يمكن بريستيج و انه السياحة عنا حبطرش...الله أعلم
هلأ ما رح أحكي على مرافق المطار التعبانة لأنه المطار الجديد جاي عالطريق...فخلينا نستنى و نشوف
بس تروح تاخد الشنتة ما بتلاقي عربية للشناتي....و السبب انه الشباب اللي المفروض يساعدوا الناس بالشناتي محتلين كل العربايات و مخبينهم للزباين الدسمة اللي بتدفع...و اللي ما بيدفع الله لا يردة يدبر حاله
على تفتيش الجمارك ما في حدا يساعدك بالشناتي... 3 موظفين قاعدين عالجهازمبحلقين فيه كأنه عم يحضروا نهائي كأس العالم و مش مستعد واحد يتنازل منهم و يساعد وحده بحمل شنتة تقيلة مثلا...زي ما صار مع مرتي لما نزلت لحالها و حاولت تحمل الشنتة... و لأنها تقيلة وقعت مرتي عالأرض و وقعت الشنتة فوقها...مع هيك ما انهزت شعرة من الشباب...و رجعت حملت الشنتة بصعوبة و حطتها عالجهاز.... ول؟؟!! ما في نخوة عند الشباب؟؟؟
المهم وصلنا الاردن و مشي الحال....بكملكم الباقي بعدين

ملاحظة:
أنا اللي بيقهرني بهيك شغلات انها شغلات تنظيمية ممكن تفاديها بسهولة و ما بدها مصاري بس بدها شوية تنظيم و كل واحد يحمل مسؤولية شوي بشغله...و شوية أخلاق و ضمير...يعني ما بتكلف اشي....و هاي المفروض واجهة البلد....يعني السائح بس يصير معه موقف من هالمواقف مستحيل يقتنع انه الاردن بلد مرتب و شعبه طيب...و الله لو بيعبوا طريق المطار اعلانات لتشجيع السياحة ما رح يقتنع...و الدليل اسألوا أي سائح عربي عن الأردن...بيقولك الشعب وجهه ناشف و دايما مكشر.... السياحة بتيدأ من الانسان أول اشي بعدين بيجي كل شي تاني

الأحد، 15 أغسطس، 2010

خلصت الاجازة

خلصت الاجازة و رجعنا عالسعودية....دايما الواحد بيحس انه الاجازة بتمر طيران...و أصعب شي الرجعة عالدوام...بس منيح انه الرجعة اجت برمضان و الدوام خفيف...صحيح كل سنة و انتوا سالمين
شو انطباعي عن الاجازة؟ ممممم....كتير مشاعر مختلطة, و أنا اجازتي مقسمة بين عمان و دمشق بحكم انه زوجتي سورية....فكان الانطباع بيختلف من يوم للتاني...حلوة, بتزهق, عجقة, قصيرة, طويلة...يعني حسب الوضع...بس الشيء الأكيد كان طول الاجازة هوه الشوب...مش معقول...يعني مزبوط عايشين بالخليج و الحرارة نار و رطوبة...بس وين ما كان في مكيفات...بعمان انتا و حظك...الله يعين العالم عن جد....اللي كان يهون علي الشوب لما نروح على الشام و نطلع بلودان...كأنك بدلت الفصول ... سبحان الله
انطباعي عن الاردن انه لسه حلو و بلدنا اللي بنحبها....بس حسيت انه البلد ما عم تتطور...لسه شغلات سخيفة و مش منطقية المفروض عالجناها زمان موجودة عنا ... و الشعب كل ماله عم يصير أسوأ (طبعا مش الكل هيك)
وانطباعي عن الشام دايما حلوة....بتحس المدينة فيها روح و مليانة حركة و تفاصيل الجمال فيها بكل مكان
على كل حال التفاصيل بحكيلكم اياها بعدين
هلأ بس حبيت أسلم عليكم و أعايدكم برمضان... رمضان كريم و للحديث بقية انشالله