الخميس، 11 نوفمبر 2010

فلاشات من الانتخابات



انتهت الانتخابات الحمدلله على خير...احنا صوتنا مش محسوب لأنه المغترب ما بيصوت...بنرتاح و بنريح..بس من لملمة الأخبار من هون و هون طلع معي شوية استنتاجات و مشاهدات:

- فيه مرشحين فازوا ب 1400 صوت...يعني فيه ناس عم بتجيب بانتخابات مجالس الطلبة أصوات أكتر من نواب ...هل ممكن هذا يفتح الباب لفئات كانت مهمشة زمان انها تفوز بالنيابة؟؟ لاعبين كرة القدم مثلا أو المطربين؟ أو صاحب شاورما ريم مثلا؟؟مين بيعرف

- أسماء الخاسرين لم تعلن منعا للاحراج...أنا برأيي لازم تعلن مشان فيه ناس خلص صار لازم يقتنعوا أنه نزلتهم عالفاضي..مشان الله بيكفي

- 70 % نسبة النواب الجدد...هاذا الاشي بيظهر رغبة الشغب في التغيير..لكن أبرز النواب الجدد هم اما معالي أو وزير سابق أو أسبق...يعني كانوا أصحاب القرار زمان...فاااااا مش متفائل صراحة بالتغيير

- نسبة المشاركة في عمان و الزرقاء منخفضة كانت...وبما انه أهل عمان و الزرقاء يعتبروا مثقفين سياسيا و القواعد العشائرية ما الها تأثير فأعتقد انه ممكن نقول انه قرار النخبة السياسية من الشعب كان مع المقاطعة لأنهم فقدوا الأمل بالتغيير

- فيه أعضاء سابقين بمجلس الأعيان خاضوا الانتخابات...معقول عضوية النواب محرزة أكتر؟؟

- ما عجبني موضوع الكوتا النسائية...يعني يا بتفوت بذراعها زي ريم بدران يا اما خليها بالبيت أحسن...ولا شو رأيكم؟

-التلفزيون الأردني يعني كان كتير بيمغص و التقارير اللي كانت تيجي من المحافظات عن جد بتضحك...زي المسلسل..قال شو مش عارف مين طلعت من بيتها و كلها أمل بالمستقبل ...واتجهت لصندوق الاقتراع حتى تختار من تعتقد أنه سيلبي طموحاتها....بالله عليك؟؟؟

- يعني بفهم أنه أي قانون لا يمكن أن يحوز على رضي كل الناس...بس انه المجلس الجديد رح يصوت على قانون الانتخاب الجديد هاي مش قادر أفهمها...يعني كيف واحد وصل للمجلس عن طريق نفس القانون رح يناقشه؟يعني برأيكم شو رح تكون النتيجة؟

- أكتر شي استفزني هو تصريحات الأمين العام لجبهة العمل الاسلامي...انه كوادره المنتشرة أوردت تقاريرها [انه نسبة المشاركة المعلنة غير حقيقية....نعم يا حبيبي؟؟؟كوادر مين و تقارير مين؟شو CIA حضرتك و احنا مش عارفين؟ في فرق بين المعارضة و التعامل كأنك دولة داخل الدولة..ولا شو يا شباب؟

- وصلني ايميل من واحد نازل على مسابقة أجمل عروسين عالفايس بوك بيطلب مني أصوتله و أدخل على سحب جائزة...و سمعت كمان انه زين عملت مسابقة كمان للمصوتين...مش عارف ليش احنا بنزعل من المال السياسي و شراء الأصوات...الواضح انه الموضوع بدمنا من زمان

- العنف اللي صار و الاعتداءات على المرشحين بيظهر انه لسه احنا قدامنا طريق طويل حتى نستوعب الديمقراطية

كل انتخابات و انتوا بخير


هناك 5 تعليقات:

Em Ommar يقول...

صباح الخير

ومبروك إنتهاء ,, الدوشه,, وباركلنا بفوز أكم من مرشح يستحقو الفوز ,, بجداره كمان

للأسف انا ما إنتخبت لإني تكاسلت اغير الدائره الإنتخابيه على بطاقتي,, بس لو كانت دائرتي نازله صح ع الهويه,, كنت رح انتخب واحد ,, والحمدلله إنه نجح لإنه اثبت جدارته من قبل,, وحتى قبل ما يوصل للمجلس بسنوات مضت

مش موضوعنا,, حابه أعلق على النقطه التانيه
إنه من اللي فازور,, كانو أصلن عندهم مراكز سياسيه بالبلد,,
انا مع ترشيحهم,, لإنه أحنا بالأصل شفنا شغلهم من قبل,, وعرفنا قديش ممكن يكون عطائهم وإخلاصهم,, ودامهم فاوزا بالعضويه,, إزن في ناس رأيها من رأي,,

تقبل مروروي,, نهارك سعيد

yosef يقول...

مساء الخير

اكيد النتيجة واضحة
حكي فاضي....وما فيش فايدة

اذا كان خصمك غريمك
لمين تشكي همك ؟؟؟؟

هذا حالنا
ومحتاجين كثير

الله يعطيك العافية
كفيت و وفيت

نيسآان يقول...

صباح الخير يا مواطن

هلا عن جد انت مقتنع ومصدق ان ريم بدران نجحت بذراعها؟؟!!!

والكوتا النسائيه ظالمه فعلاً....اذا بدكم الكوتا الصحيحه ....فهي لازم تكون 50\50

كل عام وانت بخير موااطن....اضحى مبارك

Unknown يقول...

هههههههههههههههههههههههههههههههههه
عجبتني لقطة التلفزيون الاردني و مخابرات حزب الجبهة الاسلامي ههههههههههههههه

انت رهيب و كل انتخابات و انت بخير كمان

Whisper يقول...

اول شي كل عام وانت و العائلة بالف خير و ان شاء الله السنه الجاي ربنا بكتبلك و بكتبلنا الحج :)

قصهص الانتخابات صارت زي مسلسلات التلفزيون الاردني ممله و قديمه و وبضلهم يعيدوها :$

الكوتا النسائيه انا مش معها بالمره, انا مش مع المطالبه بالحقوق و المساواه و هالقصص الطرمه المفروض ان الكل ماخد حقه وعايش و اذا بدك توصل لشي زيك زي اي واحد تاني بدك تتعب و تجتهد لتوصل بدون اي نوع من الدفش