الاثنين، 22 فبراير، 2010

ضاق خلقي يا صبي ... من هالشعب العربي

صباح الخير عليكم

في شغلة ملاحظها من فترة و بتمغصني ...أنه الشعب العربي مستحي من عروبته...ما بعرف بس هيك الكل بدويصير زي الأجانب و بيقلدهم بكل شي
يعني الأغاني اللي عالتلفزيون صارت زي كليبات الاغاني الاجنبية
والأفلام العربية بتصورنا كأنه احنا عايشين زي الأمريكان
البنات و الشباب بدهم أعراسهم بصرعات غريبة عمرنا ما كنا نسمع عنها
الناس بتاخد أفكار كتير سيئة و أبدا ما يتناسبنا بس لأنه هيك الغربيين بيتصرفوا
الأهل بطلوا يحطوا أولادهم الا بمدارس أجنبية...لأنه العربية ما بتنفع
الولد بيكون لسا ما بيحكي بتصير الأم تحكي معه انجليزي لأنه اللغة العربية (حفرتلية كتير) طبعا الله لا يورجيكم انجليزيات الأم كيف بتكون أصلا .. بالاخر بطلع الولد مشطوب عربي و انجليزي...أنا مرت خالي فرنسية و هيه مدرسة فرنسي بالجامعة, كانت ترفض تعلم أولادها الفرنسي لغاية ما يصير عمره سبع سنين...لأنه مخارج الحروف العربية صعبة و بدها الولد يتقنها منيح بدون ما يصير عنده تشويش من اللغة الفرنسية
الواحد بيكون قاعد بين أصحابه و كلهم مواليد و تربية عمان (بديش أحكي وين كمان لأنه كل الناس خير و بركة) و بتلاقيه صار يدحش كلمات انجليزي دحش بالكلام...وطبعا كله من اللي بيسمعه من الافلام (تذكرت فيلم كده رضا و الأخ اللي من هاي النوعية لما قال لحبيبته Happy F***en Valentines Day)
بيصير موقف معين بتلاقي الشباب بلشت ... العرب متخلفين...عربي شو بتتوقع منه و من هالحكي
اشي بيعصب صراحة...أصلا العرب همه أساس الحضارة اللي عم يتمتع فيها الغرب...واللي مش مصدق يشوف قصر الحمرا بالأندلس كيف كانت قصور العرب في وقت كان الغرب عايش ببيوت طين ... وكل الأكتشافات العظيمة اللي اكتشفها العرب في وقت الغرب كان بيفكر انه الشمس بتدور حول الأرض
بلاش...أصلا اللغة العربية كتير أحلى من أي لغة تانية...الشعر و النثر فيه منهم نصوص فعلا بتوصلك لحالة من النشوة و انتا بتقرأهم لأن الكلام وصل بطريقة كتير حلوة و معبّرة
بعدين ليش اللعة العربية صارت عيب...مع أنه القران الكريم نزل بالعربية..وما في أي كتاب سماوي تاني نزل بالانجليزية أو الفرنسية
كمان ليش أنتا بدك العرب يفيدوك؟ليش حضرتك بشو نفعت العرب أو حتى اللغة العربية؟
ليش الألماني مثلا عنده اعتزاز بلغته و حضارته و بيرفض حتى يتعلم أو يحكي بلغة تانية مع أنه كتير منهم بيحكي انجليزي منيح...
الموضوع أنا بختصره دايما بسبب التفاهة و ضعف الشخصية فبنحاول دايما ننسب حالنا لناس أحسن منا بدل ما نصير أحسن منهم
وبالاخر طبعا ما رح تصير زيهم و لا همه رح يقبلوا انهم يعاملوك كواحد منهم...لأن اللي بيتخلى عن شخصيته و هويته لا يستحق انه يصير واحد منهم...وبصراحة معهم حق

بعتذر من فيروز لأني لعبت بكلمات أغنيتها في العنوان...هي الأغنية الأصلية مشان صباحكم يحلى مع فيروز


هناك 8 تعليقات:

Rula A. يقول...

هلأ أنا معاك بالفقرة الأولى من البوست.. اني جد كتير ناس بحس انهم بستحوا من عروبتهم.. يعني أنا هداك إليوم كنت بكافيه وطلبت عصير وبراونيز.. ألي الشاب بتحب اشي تاني قلتلو لأ شكراً..
الطاولة إلي جمبي طلبت برضو اشي قريب من طلبي بس دخلت كم كلمه إنجليزي وطبعاً ثانك يو بالأخر.. طلبها أجا أسرع مني مع اني طلبت قبلها والأشياء إلي أنا طلبتها ما بدها كل هدى التحضير.. ففكر إن هل هوة قرار عشان أنا محكيت ولا كلمة إنجليزي معناتو أنا حفرتلية!!! أو يمكن هية كانوا عاملين من طلبها قبل فترة قصيرة فعشان هيك كان أسرع من طلبي..
كلشي جايز ما بحط بذمتي..

هلأ موضوع المدارس الإنجليزيه أنا بخالفك الرأي فيه..
ماما كانت اتقول كل لسان بإنسان..
يعني لو قدمت على شغل وإنت بتحكي ٣ لغات أكيد راح تكون الك الأفضلية من إلي بحكي لغتين أو وحدة!! صح؟
وهل أيام إلي مابعرف يحكي إنجليزي بكون صفر على الشمال.. فالامهات بدهم ولادهم يكونوا أحسن ولاد ويحكوا إنجليزي منيح قراءة وكتابة ومحادثة فعشان هيك بحطوهم بهيك مدارس.. وصراحة أنا مابشوف إنو هدا غلط..

مواطنون بلا حدود يقول...

Rula A.
أنا مش ضد انه الانسان يتعلم لغات...أنا بنتقد لهفة الأهل على تعليم أولادهم لغات و همه لسا العربي ما تعلموه منيح...شوفي كم واحد بيطلع عالتلفزيون بينصب الفاعل و بيرفع المفعول به...أنا بشجع انه الانسان يتعلم لغات (أنا نفسي عم بتعلم فرنسي) بس أنا ضد انه نهمل لغتنا وكأنها اشي عيب...أعطي العربية حقها أول بعدين يتعلم الواحد الليش بده اياه
مشاركتك أسعدتني

Whisper يقول...

كلنا الا ما نستخدم كم كلمه انجليزي بكلامنا بحكم التخصص و الشغل, او كلام بيجي مع السياق, بس كتير ناس زي ما حكيت بدهم يدحشو الكلام الانجليزي دحش بس فلسفه

و كتير من شبابنا ليل نهار بسمع باغاني اجنبيه و بكون مش فاهم غير كم كلمه, بس علشان انو يكون فايع وبسمع انجليزي

زوجة اخوي اجنبيه فابن اخوي يا حرام ضايع, كلمه عربي و كلمه انجليزي و كلمه بلغة والدته بتحسة مش مركز
وهيك بصير بشبابنا, ما في تركيز على شي و ما بمشو خطوه خطوه ليتمكنو من شي بعدين ينتقلو للي وراه.


موضوع "عرب متخلفين...عربي شو بتتوقع منه " هاد جد بقهرني
يعني اولا انت عربي يا اخ منك اله, ومع ان العرب القدماء قدمو كتير للعالم بكل نواحي الحياة, لكن احنا و الكم جيل اللي قبلنا و واضح انه الكم جيل اللي بعدنا خربنا اللي عملوه و قعدنا نتحسر و نلوم, مع انا احنا السبب, اذا احنا نسينا امجادنا كيف بدنا نقنع العالم فيها مع انهم مقتنعين

زكرتني بايميل وصلني بعنوان " احفاد الف ليله و ليله" شوف الفيديو اكيد راح يعجبك

http://www.1001inventions.com/media/video/library

اسفة كتير طولت بالتعليق بس الموضوع كتير بدايقني

هـ يقول...

انا مع اللي حكوه رولا وويسبر و بضيف عليه انه بالخليج بالذات انا مع موضوع المدارس الاجنبية بس بسبب ضعف المنهاج ..ولو بالاردن ما كنت سألت ..بالنسبة لاستخدام الانجليزي احيانا بكون مخرج سهل لما انسى الكلمة او ما تحضرني بسرعة فبعبر بلغة تانية لو هندي بس لانه ذاكرتي بتجنن.. اما موضوع عرب متخلفين فانا ضده تماما ومع انه اعلم اولادي الاعتزاز بلغتهم و عروبتهم .. و ان شاء الله بكره النا.. موضوع رائع مشكور

jafra يقول...

طبعا مش عم اختلف معك ابدا باللي حكيته
بالنسبة للجيل اللي طالع او حتى من ياس الاجيال اللي السابقة اللي ما عرفت تعمل شي لا للعروبة و لا للاسلام صارت تحكي و تسب على العرب
انا شخصيا و اللي بعرفوني منيح بعتز بعروبتي بشكل ما في نقاش و بالعكس بحب حتى مع الاجانب اني احكي كم كلمة عربي لدرجة انهم ببلشوا يرددوهم متل ان شاء الله و او يا زلمة او يعني و متل هيك
انا شخصيا ما عندي عقدة العروبة لاني تعاملت مع كتير ناس اجانب و شفت انو عنا ناس بسووهم الف مرة بس هي قصة احترام المجتمع و الحكومة و تقديرهم للفرد هي اللي بتفرق
بالنسبة لتربية الاولاد ما تنسى انو وجود الخدم بالبيوت و هادا ما بنطبق بس على الخليج لاني شفت بالاردن و لبنان و سوريا نماذج كتيرة من تعلق الودل بخدامتة و استخدام اللغة الاجنبية للتفاهم و التقارب
و هادا الشي بخلي عامل تهميش اللغة العربية يكبر مع دخول الولد مدرسة اجنبية و بالفعل انا شخصيا لو كان عندي ولاد كنت رح افضل يدرسوا بمدرسة اجنبية لعدة اسباب بعيدة عن اللغة و هاي القصص انا معلمة بمدرسة عربية و عم شوف كيف الاولاد عم يتعاملوا و كيف المدرسة و اصحابهات عم يستغلوا الطالب ابشع استغلال
و مطلعة على كل العيوب بكفي انو الصف فيه اربعين ولد تخيل ابنك قاعد مع 40 ولد بتنفسوا و غير نوعية و اختلاف ثقافة المعلمات و الطلبة
و هادا انا ما شفتوا بالمدرسة الاجنبية هم بستغلوا الطلاب بكتير اشياء لكن الطالب بياخد حقو ( انا هون عم بحكي على مستوى معين من المدارس الاجنبية يعني مش الكل )
اظن انو موضوع ضياع لغتنا و احترامنا لعروبتنا نتج عن تراكمات كتيرة و عامل الاهل و المجتمع و السياسات المتبعة اعلاميا
اثرت كتير
لكن في ناس كتير بتفكر زيي و زيك
و يا سيدي بالنسبة الي ما بهمني كتير اللي بتخلوا عن عروبتهم مش مهم بكفينا الرسول العربي الامي اللي زرع فينا اخلاق عالية و هم مش عاجبهم يبقوا يروحوا للغرب لنشوف شو رح يصير ؟

شكلي كتير طولت بالحكي ؟؟؟

Ahmad Merie يقول...

wallah ya a5e kalamak meyeh el meyeh o sorry ene 3m aktob bel english el m3arrabb bs bel2a5er 3arabe be treeqaten o5ra:)

el sh3b el 3arabe el mafrood yeste7e men sa5afto.. en7e6a6o el 7adare fe elwaqt el 7ali.. belnesbeh lal aflam elle betsawer el3arab zay el amirecan fa he hadafha ma7w el haweyeh el eslameyeh.. enno ya 3amme e7na MESH ERHABEYEEN... b3'ad el nazar 3n mafhoom el erhab o mafhom el jehad... bema enno el Deen el masee7e motasame7 la ab3d el 7odood.. la 7ad enno "Eza Darabak a7ad 3ala 5addeka el Ayman A3tehe 5addak el Aysar" fa beldaroora el deen el eslami lazem ykon Deen motasame7 la ab3d el 7odod.. o el jehad fe hay el 7aleh sar erhab!! o elmoslemeen bshkl 3am homma el 3arab o el eslam bemafhoom el 3'arb ho deen el erhab.. fa ethan lazem n3'ayer fekret el 3'arb 3anna o fekr shababna elle be7daro hay el aflam enno el jehad 3'alta o el deen kollo 3'alat o el deen el sa7 howe enno ma ykon 3endak deen.. b3'd el nazar 3n l 3adat wel taqaleed.. mosh el maqsad el tahajom 3ala el deen el masee7e.. elmaqsad ho el tahajom 3ala deen el 3'arb elle aslan ma elo deen .. aw deeno howe el en7etat el a5laaqe elle 3m benshoofoh aw bnesma3 3anno..
belnesbeh lal lo3'a el english.. aw franceyeh aw 3'eerha.. ho el mafrood enno ka2ommeh eslameyeh elha a3da2 aw omeh 3arabeyeh masee7eyeh elha a3daa2ha elle home a3da2 el ommeh el eslameyeh b3'd el nazar 3n el 3adaweh el ma7aleyeh aw bel a7ra el tana3nsor el deene el da5ele demn mojtama3 wa7ad, ana be ra2ye enno lazem o daroore enno net3allam lo3'at a3daa2na..! a3da2na ka 3arab!!
bs mosh la darajet netnasa haweytna l 3arabeyeh!! eshe o menno ya3ne..

amma bl nesbeh la ennak ma beddak te7ke ween kaman:P fa had ba3tebro she mo mnee7:P la2eno ana ebn 3amman el 3'arbeyeh:P

amma bel nesbeh la ajdadna fa maato el barakeh feena aw fel jayeen eza be3eedo AMJAD el ommeh el 3arabeyeh !!!
b3eed 3n 3eenhom tab3an!!
ella eza rej3o la deeenhom!!
be ra2ye el tarbeyeh el deeneyeh heye el shee ele 3m bendawwer 3aleh!!
kol shee dayman berja3 lal deen wel 3aqeedeh!!
o estammer:P

ماهر الجيلاني يقول...

بالنسبة لموضوع حكي الناس انجليزي , أنا معك الناس بس تبدا تحكي و بتبدا طتطعم" اللغة العربية بالإنجليزي أحياناً شيء مقرف
لكن ,
اللغة العربية المحكية "العامية" تختلف إختلاف كبير جداً عن اللغة العربية الفصحى, و التي هي و كما قلت لغة القرآن و اللغة التي نعتز بها
برأيّ أن الشارع يتحدّث لغة جديدة , ليست اللغة العربية , و اختلاف "لهجات الناس" و التميز العنصري جعل الناس تخلق نوع من الحلول الةسط و هيه التكلّم باللغة الإنجليزية أو إدخال بعض الكلمات في حياتنا اليومية .

و بعيداً عن بعض الشباب و البنات الذين يستخدمون الإنجليزي بغرض "الفياعة" لإانا مع الذي يتحدث بمزيج من اللغات بهدف التعبير عن رأية و ليس فقط الفياعة

فاهمني؟

SimSim يقول...

بالاخر بطلع الولد مشطوب عربي و انجليزي

ههههه جد ضحكتني

الجيل الجديد صحي على التفاهة والأغاني الهابطة والذل اللي احنا عايشين فيه .... ما بعرف شو اللي لازم نعمله لحتى يثقوا بعروبتهم ولغتهم !!؟