الأحد، 7 مارس، 2010

الاعلان بال(خاوة)

لاحظت اخر فترة لما بفتح ايميلي انه معظم اللي عم يوصل هو اعلانات لشركات كتير...من اعلانات العقارات لاعلانات رحلات العمرة و حتى اعلانات الفياغرا وغيرها...بعض الاعلانات بيوصل من شركات معروفة أنا تعاملت معها قبل هيك و بالتالي فهمت من وين جابوا ايميلي (بس ما يروح بالكم للفياغرا و الله ما بستعمله هههههه)...بس الغالبية العظمى لشركات أول مرة بسمع عنهم و مش قادر أفهم كيف وصلولي

أول شي خلينا نحلل من وين ممكن هالشركات تحصل ايميلات العالم....ممكن انت تكون تعاملت مع شركة و طلبوا ايميلك للتواصل و ارسال العروض مستقبلا على ايميلك...هادا الشيء يتم بمعرفتك و رغبتك و لا غبار قانوني أو أخلاقي عليه....الطريقة التانية انه ممكن تتعامل مع شركة و يطلبوا ايميلك أرو رقم تلفونك بدون توضيح السبب و بعدين بصيروا يبعتولك ... و هاد الشي فيه نوع من الاحتيال المبطن برأيي...يعني مثلا, بتشتري بنطلون من محل معين, بعدين بتغير رأيك و بتقرر تبدله أو ترجعه...بيجي موظف الكاش بيطلب منك توقع على الفاتورة مع رقم موبايلك أو ايميلك...طبعا أنا صارت معي أكتر من مرة و زي الأهبل كنت بكتب...بعدين خطر على بالي أسأل شو علاقة موبايلي أو أيميلي يالموضوع...الموظف رد علي كأنه مفضّل على لأنهم رح يبعتولي اذا في تنزيلات بالمستقبل...قلتله بس انا ما بدي تبعتولي...قال هيك سياسة المحل!!! قلتله سياسة المحل بتمشي عليك كونك موظف فيه..بالنسبة الي بتعرض علي هاي (الخدمة) و اذا وافقت منيح ما وافقت مش من حقك تطلب رقمي...طبعا رماني بنظرة احتقار كاني ناكر للمعروف و قلي على راحتك انت حر...ممكن كمان تتصل بمعهد تسأل عن دورة لغة مثلا...ما بيعجبك الموضوع (أو السعر) و ما بتسجل...بس على مين, كل يومين رح يبعتولك مسج بلكي غيرت رأيك...

كمان طريقة (انا بعتبرها بتعيبنا كمهندسين المفروض محترمين و بنفهم) انه بتوصلنا دعايات لأنشطة نقابية و دعايات للمرشحين لانتخابات النقابة عن طريق تلفوني و ايميلي اللي انا المفروض حاططهم للتواصل مع النقابة في أمور تخص انتسابي...يا ترى انكشاف هاي المعلومات الشخصية لحساب ناس معينين ما فيه انتهاك لقانون السرية لمعلومات المهندسين المنتسبين...و يا ترى مين ممكن يعرف عني معلومات شخصية انا ما بحب اكشفها لمين ما كان؟

شركات الخلوي كمان بتعطي نفسها الحق انها تمررلك رسائل اعلانية و اعلامية غصب عنك...هاد الشي تعدى السرقة و انتهاك الحرية الشخصية للوقاحة و (لوي الدراع) لأنها هيه مشغلة الخدمة و مش عاجبك لا تحمل موبايل (بس أظن أنه هالموضوع صار اله ضوابط بالأردن, صح؟)

طيب على فرض أنه احنا لسه عايشين بالقرن الثامن عشر و قوانين حقوق الانسان فيما يتعلق بحماية الخصوصية لسه ما حدا بيعرف فيها...بدي أحكي من منطلق تجاري...لما يوصاني ايميل من شركة بتعرض علي انها توصل أي اعلان انا برغب فيه لقائمة من الاف الايميلات...يعني الأخ عامل بزنس على ضهري و ضهر غيري...و نفس الحال بينطبق على شركات الخلوي...طيب وين نصيبي أنا؟ مش المفروض انه الي حصة كوني بساهم بايميلي؟

انا طرحت الموضوع ك (فشّة خلق) لأنه مضايقني و لأني كمان ما بفهم بالجوانب التقنية للموضوع و اللي يمكن لازم تنذكر...مشان هيك طبعا خدوا راحتكم بالتعليق و الاضافة

هناك 5 تعليقات:

Rula A. يقول...

زيما قلت.. هادا أسلوب الخاوه.. إنو بضلوا يبعتوا ويزهقوا الواحد عشان بالأخر تشتري راحت بالك وتسويلهم إلي بدهم إياه بإنك تشتري منهم أو تحكي معهم تلفون تشتكي عليهم وهيك بالنسبه الهم أجت فرصة تانيه جديده بإنهم يقنعوك بمنتجهم على التلفون..

Whisper يقول...

يا سبحان الله هلأ هلأ وصلتني مسج بتحكيلي ان رقمي ربح مبلغ نقدي اوموبايل او نغمة وباعتينلي رقم خلوي برضة وهالشي كتير غريب :$ ال اتصل فيه و 70 قرش للدقيقة :)

حاولت اكتر من مرة اني اوقف هالرسائل دائما بوقفو اسبوع زمن وبعدين برجعو :$

مواطنون بلا حدود يقول...

Rula A. بس هاد الشي ما بيصير...لازم يكون في جهة تتولى الدفاع عن خصوصية و راحة البني ادم...ما بيصير هيك
Whisper انا سمعت انه هالشي صار ممنوع بالاردن,مزبوط؟

Ala' JA يقول...

I am just like you especally regarding the mobile messages, and especially the ones with the ad3eyeh or 2ayat !!!! y3ny if you delete them, bit7is inno rabna r7 yiskhatak!!!

other than that the mobile messages, y3ny fe abrad min wijih il shirkeh illy btib3at il message yam 3ala wa2t nomet b3d il duhur!!! y3ny ysim badanhom 3ala badan heik marketing oo promotions!!!

I totally agree with everything you said!!!

Whisper يقول...

لا مش ممنوع, لسا اليوم الصبح عالاذاعة كانو يناقشو هالشي, وحكو عن موضوع جديد للنصب عالتلفون ان في ناس بتصلو فيهم و بحكولهم ان في فرصة شغل الهم في بلد خليجي بس ابعت المبلغ الفلاني لنكملك اجراءات الفيزا والسفر, وفي ناس للاسف بصدقو وببعتو

و في متصلين حكو انهم شكو لشركة الاتصالات اللي تابعين الها و حكولهم ما النا دخل :$