على خلفية استقالة الوزير ملحس و بمراجعة للحوار اللي حصل في لقائه بالصحفيين و مراجعة الواقع الصحفي و الاعلامي بالأردن و خصوصا المواقع الألكترونية...عندي تعقيب صغير
صحيح انه الكلام ما بيصير يطلع من وزير و انه المفروض يتحكم بأعصابه...بس الواضح انه الزلمة انفجر مرة وحده
أولا الاعلام الاردني من فترة مش بعيدة أخذ منحى جديد وهوه حرية الرأي لدرجة الوقاحة...المشكلة مش بحرية الرأي المشكلة في انه نسبة كبيرة من الأخبار ليس لها مصدر توثيق...و معظمها (قص و لصق) من مواقع تانية...يعني ممكن اتهمك بأنك حرامي و أشهر فيك لمجرد انه (علمت الجريدة الفلانية أو صرح مصدر رفض الكشف عن اسمه) يعني صار فيه سباق للعنتريات الصحفية من النقد غير المبرر للحكومة عالطالعة و النازلة حتى انه في جريدة الكترونية عينت موظف خاص لمتابعة هفوات رئيس الوزرا على تويتر و أخبار تسجيل ابنه بالجامعة و تركت البلاوي اللي بدها متابعة
ثانيا الحركة الاعلامية للأسف صارت حركة منتفعة...يعني جرايد بتهاجم العملية الانتخابية و بنفس الوقت بتفرد مساحات لاعلانات المرشحين...و بتهلل لمرشح معين ما حدا سمع فيه و بتنشر غسيل مرشح تاني...يتم نشر خبر لمصلحة جهة و أخبار مهمة لا تنشر بدون سبب
الوزير هاجم مذيعة في التلفزيون لأنها صارت تضحك في حوارها معه لأنه عم يحكيها بموضوع واضح انها مش فاهمة فيه اشي...و مبلغة الوزير بموضوع المقابلة و تفاجأ انه عم تحكيه بأشياء تانية من باب اضافة الاثارة...بصراحة هاد التصرف ما فيه احترام...لو كان مقصود بيكون خرج عن أخلاق المهنة و عم تحاول تحرج وزير عالهوا و هو وزير من الوزارات الضعيفة يعني أكيد ما بسترجي تعمل هيك مع وزير الداخلية مثلا...و لو كان غير مقصود فمصيبته مثل ما قال الوزير انه المذيعة و المعد مش عارفين وين الله حاططهم
كمان الوزير هاجم محمد الوكيل لأنه ( سخيف و سمج ) و أنا لا أملك الا اني أوافقه على هالاشي...و الوكيل عامل حاله (نصير الغلابه) بنفس الوقت مش عارف معلومات بسيطة كتير عن موضوع هوه اللي أثاره
الاعلام الأردني أنا برأيي يمر بأسوأ حالاته...و الدليل التلفزيون الاردني اللي أشك انه في حدا بيتابعه...يعني كل شي حلو كان من فترة 10 سنين بطل موجود...واللي بيعرف حجم الواسطة بالتعيينات فيه بيعرف قديش فيه خلل
أنا مش مع اللي عمله الوزير بس أتفق معه في كتير من الأشياء اللي حكاها...اعلامنا فيه مشاكل أكبر من تجريح مذيعة و معد لأنه زي ما حكى الوزير...هاي اهانه للأردن
هناك تعليقان (2):
الصحافه و خصوصا الالكتروني صار تقريبا مبيوع هاي واضحه و الجزء التاني من الصحافه المكتوبه صار بعيد عن مهاجمة ما يضر بمصالح الشعب و في خطوط حمراء بطلو يتعدوها و الحريّه الصحفيه صارت معتمده على كاتالوج مكتوب فيه عن شو تحكي و عن شو ما تحكي
انا و بالصدفة كان عنّا ناس بتابعو الاخبار و كان الي 20 سنه مش شايفتها, حضرت اللقاء, اسلوب المذيعه ابدا ما كان لائق بالتعامل مع الوزير و هلأ من توضيحك فهمت ليش....
و لكن برضه الوزير كان اسلوبه بالحوار مش متمكن ابدا و اللي فهمته ان هو مش فاهم شو اللي بحكو فيه
وانا معك بأن اللي حكاه الوزير ما كان لائق و كان ممكن اذا فعلا المذيعه والمعد غلطانين يبين غلطهم بادله و يبهدلهم بطريقه ادبيه دبلوماسية المفروض تكون موجوده عند شخص بمكانه
اما بالنسبة للوكيل....فلاااااااااااا تعليق :$
مساء الخير
انا ما حضرت اللقاء لانا في البيت نادراً ما تابع التلفزيون الاردني والاسباب معروفه
لكن حابه اعلق على مذيعات التلفزيون الاردني لانه من زمان فاقعه منهم
معظمهن" الا واحده او تنتين" على الاكثر بثقافه معدومه ...ومثل ما حصل مع الوزير المعني بيحصل مع كتير لكن بتمر بدون مشاكل
بعض منهم تصل فيهن السخافه الى درجة المياعه كمحاوله منهن لاظهار انهن كووول او خفيفات دم
والبعض الآخر جديّات زياده عن اللزوم
"زي ابو الهول"
معظم الاسئله اللي بتنسأل للضيوف تقليديه وبديهيه واجاباتها معروفه سلفاً يعني بنحضر البرنامج ساعه كامله وما بنطلع ولا بمعلومه جديده
وبيقاطعوا الحديث بمناسبه وبدون ومناسبه
بيكفي هالقد ...سلام
إرسال تعليق