السبت، 2 أكتوبر 2010

تشويش



صباح الخير...
امبارح كان في خبر على الجزيرة يتعلق بالتشويش اللي صار على بث الجزيرةلكأس العالم....الخبر بيقول انه التشويش كان من الأردن و تحديدا من مدينة السلط....طبعا بعد ما طلع الخبر بثواني كانوا الشباب نازلين شتم للقناة و كيف انها دايما بتستغل الفرص (للنيل) من الأردن ... و صديق شخصي من السلط فورا كتب على ال Facebook انه الجزيرة ما بتفهم و انه تروح تزبط اجهزتها و أعلى ما بخيلهم يركبوه!!

هلأ أي واحد عاقل استعمل الحد الأدنى من مخه المفروض يخطر على باله كم نقطة:

- التحقيق اللي صار عملته جهةعالمية متخصصة و بالنهاية كان مطلوب منها تقدم تقرير عن الجهة المسؤولة سواءا كان من الأردن أو غيره

- الموضوع ما كان يخص الجزيرة وحدها...الفيفا اتضرر و و العرب سات كمان تضرر وما أعتقد انه هدول الجهات الهم مصلحة باتهام الأردن بأي شكل من الأشكال

- اذا كان الاتهام صحيح ( وأنا أعتقد انه صحيح) فالأجدر انه نعلن عن فتح تحقيق بالتعاون مع الجهات المتضررة حتى نظهر صورتنا الحقيقية باهتمامنا بمحاربة الجرائم و رفضنا لهيك أعمال

- لو الاتهام صحيح و كان صادر من السلط فهاد لا يعني انه السلط كلها متهمة...يعني اذا طلع واحد سوري و عمل جريمة بالأردن شو بنقاطع سوريا كلها يعني؟

- بعدين حتى بالمراحل الأولى من عملية التشويش أصدرت الجزيرةبيان قالت انه التشويش (قد) يكون من مصر أو من أسرائيل...وما جابت سيرة الأردن...وبعدين لما شافوا انه مش من ضمن قدراتهم هالاشي قرروا يكلفوا جهة مختصة بالتحقيق...يعني مشان ما يكون الاتهام زور...وهاي الجهة هيه اللي اكتشفت انه الأردن هوه مصدر التشويش...يعني لو الجزيرة بدها تتهم كان اتهمت من زمان

ردة فعل العالم عالمواقع و عال Facebook باختصار بتبين قديش احنا غير عمليين و ما بنسعمل عقلنا الا بالمناسبات...بس المصيبة الأكبر بتفرجي قديش احنا نتقبل النقد و بنسعى وراء الحقيقة... يعني لو استعمل الشعب مخه و انتخب اشخاص فعليا قد المسؤولية,شو رح يصير؟رح يجي بائب محضر استجواب لوزير و بدون ما نسمع أي شي من اللي بيحكيه رح تطلع عشيرة الوزير و تتصدى للدفاع عن كرامة العشيرة ضد من يريدون النيل منها و رح يحملونا جميلة بكل الناس اللي دافعوا عن الوطن منهم و تقوم قيامتهم....والوزير الغلطان مش مهم شو عمل...و نرسخ ظاهرة (فاسد مسنود أحسن من شريف مقطوع)

بعدين من شان الله حلوا عن قطر...مش دفاعا عن قطر بس يا أخي احنا المتضررين...يعني بلد عربي و من أكبر المصدرين للغاز في العالم...بدل ما نحسن علاقتنا فيه بلكي بنحل مشكلة الغاز المصري اللي انحرمنا منه و اللي رح يرفع أسعار الكربا...لأ بنخرب علاقتنا فيه لأنه هم اللي بحاجتنا...وسوق العمالة الضخم المفتوح في قطر الأردنيين محرومين منه لأنه احنا بحاجتهم مش همه بحاجتنا....أنا ما بقول نتذلل الهم كمان بس ما في داعي علاقتنا فيهم تخرب من ورا خبر في قناة

والله اللي صار بيبين انه لسه عنا كتير مشاكل نحلها....احنا مش عقلانيين و لا بنفكر بالمصلحة العامة....الحوار اذا مش بمصلحتنا بنقلب الطاولة على المتحاورين...لا نقبل اتهام و لا ندافع عن انفسنا لأننا نعتقد أننا فوق النقد...و عصبيتنا و (جاهليتنا) بتخلينا نضر حالنا...لسّه بكير علينا انتخابات و بكير علينا ديمقراطية


اضافة: مقال ممتازللكاتب فهد الخيطان متعلق بالموضوع


هناك 6 تعليقات:

sheeshany يقول...

و الله الفقرة الأخيرة ما خلت لحدا مجال يزيد أي شيء :)

Doomish يقول...

I totally agree with your last 2 paragraphs.

However, I don't agree nor disagree with the report findings, but keep in mind, that with a margin of error 10% as one Jordanian specialists said, it would be an somewhere from Jordan to the meditiranion sea
With that in mind, and with recent Aqaba bombings blamed on egypt and later found that Israel behind it, I wouldn't be surprised that Israel is behind this play, as as of late, they were hostile to Jordan and try to exploit our problems with other Arab entities

Let's hope that this report is wrong

لبنــــــــــى يقول...

معك حق بكل كلمة
حتى نحنا بطبيعتنا الاجتماعية اليومية ما بنتقبل النقد ابدا حتى على المستوى الشخصي
يعني نحنا عم نكابر
شو صار لو التشويش من عنا و تعاونا لنفتح ملف تحقيق
بس شو رايك كمان يصير محكمة عدل دولية لانو من تجربة جيرانا الشغلة مسلية

شفت مش بس بنحب النقد و كمان بنتمسخر

Whisper يقول...

معك حق بكل كلمه
للاسف بعض العقول عنّا مسكره وما بتستوعب لا استقبال ولا ارسال الا اللي مزروع فيها من عصبيه جاهله و هبله لامور واضحه ما في اختلاف عليها...بنسو فيها حقوق الناس و بس بركزو على حالهم الهم حق او لأ مش مشكله

وبالنسبة للانتخابات الحاليه...فهي ابعد ما تكون عن الديمقراطيه

فلسا بكير علينا بالنسبة للديمقراطيه

Em Ommar يقول...

شو بدك تعلق عاد لو سمعت محمد الوكيل وهوه بيصيرخ ع الريق ع نفس الموضوع

مواطنون بلا حدود يقول...

Haitham هيثم Al-Sheeshany الشيشاني
شكرا

Doomish
شكرا لمرورك...الموضوع هو في طريقة تعاملنا مع اللي صار بغض النظر عن الطرف المسؤول
jafra
ما بدها لا محكمة ولا اشي ... من حق الأردن يطلب اثبات على الاتهام و من حقه الدفاع عن نفسه
ًWhisper
شكرا للمرور...هيه مش الانتخابات اللي غير ديمقراطية..احنا اللي ما عنا هاي الثقافة
UmmOmar
من حسنات الغربة انه ارتحنا من هالشغلات...ضحكة هالزلمة لحالها بترفع الضغط فكيف كلامه؟ بس شو حكى؟