الاثنين، 7 يونيو 2010

بالله عليك تسكت

من فترة و أنا فاقد الرغبة بالكتابة أو حتى التعليق على أي خبر من الأخبار...حاسس حالي فقدت الاهتمام بالمناقشة و التعليق و المجاكرة...كل ما يجي خبر عالتلفزيون بيسم البدن ما بحرق أعصابي فيه...ببساطة بغير المحطة...لكن اللي رح أحكي عنهم هلأ حيجننوني...بس بما اني ما لي طولة بال حاليا على النقاش...بدي أقول لكل واحد فيهم (بالله عليك تسكت)

- عزام الأحمد بيقول في تصريحات على أحد مواقع فتح أن غزة ليست بحاجة الى مساعدات و انه السلطة عم تبعت مساعدات بشكل متواصل للقطاع عشان هيك ما بنقدر نقول انه غزة محاصرة....يعني بديش أحكي عنك أي كلمة...مواقفك اللي بتخزي لحالها بتحكي...بس يعني العالم كله تحرك مشان يفك الحصار و حضرتك عايش بعالم تاني...بالله عليك تسكت

- خالد مشعل بيقول انه حركة حماس تقبل بدولة فلسطينية في حدود ال67....طيب والباقي شو وضعهم؟ بعدين تعال هون..مين أعطاك الحق تحكي هالحكي...يعني بصفتك شو؟كيف بتقرر عن الناس اذا بتقبل باسرائيل أو لأ؟ كيف بتعطي شرعية للأحتلال اللي وجود و شعبية الحركة اللي بتمثلها حضرتك قائمة على (محوها من الوجود)؟ بالله عليك تسكت

- التلفزيون المصري بيقول على لسان أحمد أبو الغيط أنه مصر عم تتحرك دوليا لرفع الحصار الأسرائيلي عن غزة...طيب شو رأيك ترفع الحصار المصري و بلا جميلة العالم؟كأنه مصر مش هيه اللي مغلقة معبر رفح و كأنه الجدار اللي تحت الارض مش الحكومة المصرية اللي بانيته...أقولك, بالله عليك تسكت

هناك 7 تعليقات:

Em Ommar يقول...

كنت عم بنتقل من مدونه للتانيه,, ولقيت اسمي هون بالصدفه :-)

شكلك رح تحكيلي كمان انا" بالله عليكي تسكتي "

مواطنون بلا حدود يقول...

أهلا فيكي...أنا بتابع مدونتك على طول...و أكيد احكي اللي بدك اياه دايما...على حسابك
بس ما فهمت كيف لقيتي اسمك هون بالصدفة؟

Em Ommar يقول...

بصراحه ,, مش متزكره هاي المدونه
و وصلتها بالصدفه ,, وتفاجئت بإسمي فيها

هاد كان قصدي

شكرن إلك ع الترحيب (f)

Whisper يقول...

والله اذا بديت احكي للناس اللي ببالي "بالله تسكت" ما بخلّص وما بخلص :$
وانا متعوده انام ببيتنا و ما انام ببيوت حد تانيه...خالتي مثلا :)

بس شكرا الك..فشيتلنا قلوبنا شوي :)

مواطنون بلا حدود يقول...

والله و أنا كمان بحب بيتنا كتير...و ما بحب أنام عبد حدا...أصلا خالتي علاقتي فيها مش منيحة أبدا لووول
الله بيعين
وبالمناسبة ال (New Look ) حلو كتير

toota يقول...

والله معك حق ..
ياريت يسكتون احسن
بس يحكو يخربووو الدنيا مانعرف بدنا نعلم اطفال ولا نعلم الرجال كيفو يصرو رجال
مصيبه

بس بحيك على موضوعك وان كانت محشوه بكلمات تختبيء تحتها كم هائل من الغضب

بس فعلا
بالله عليك تسسسسسسسسسسسسكت
ياريت فيهم يسمعون هي الجمله كتير بليغه لهيك ناس
بتحكي حكي وبتحشي حشي بالكلام بدون اي معنى .

يعطيك يارب اللف عافيه

مواطنون بلا حدود يقول...

toota...معك حق في كتير غضب كان جواتي...بس أحيانا بحس الكلمات ما بتوفي اللي نفسي أحكيه
شكرا لمرورك و أهلا فيكي في مدونتي المتواضعة