الاثنين، 21 يونيو، 2010

رحيل .... و ألم


اليوم أخوي سافر يشتغل بالبحرين...رجعت بالايام 4 سنين لورا...وقت سافرت و تركت أهلي...
فعلا وقت الفراق مؤلم جدا....يا الله كيف كانت المشاعرمؤلمة و الأجواء حزينة...كأني تركت في عمان قطعة مني دايما نفسي أرجعلها
فعلا أقرب شعور للموت هو الفراق
تترك أهلك و أصحابك...ذكرياتك و عمرك اللي عشته...يا الله كم أفتقد كل زاوية من البيت...كم أفتقد حنان أمي...و هيبة أبي
كم أفتقد تمضية الوقت مع أولاد أخوي... ومع الناس و في شوارع عمان
كل رجولتك و قوتك تنهار لحظة الوداع...كل انجازاتك في العمل في الخليج تفقد قيمتها أمام لحظة أو حدث لم تعشه مع أهلك...
يا ترى هل من شيء بالدنيا ممكن أن يكون بقيمة وقفتك مع أهلك لما يحتاجوك؟هل من شيء يعوض عدم حضورك ولادة أول حفيدة في العيلة؟
واللي بيزعل أكتر من كل هاد أنه بتحس جذورك في الغربة كل يوم عم تنزرع أعمق و أعمق...لأن كل مرة برجع اجازة و بشوف الوضع بعمان بشوف الرجعة صارت أصعب...الله يسامح اللي كانوا السبب و اللي مش عم يحسوا فينا...احنا بالنسبة الهم حسابات و فلوس عم تتحول للبلد...بدون أدنى احساس وقيمة لعمرنا اللي عم يضيع
لأ...الله لا يسامحهم...أه ما يسامحهم...اللي كان السبب بنزول دمعة أمي كل ما أرجع اسافر...واللي خلّى ابن أخوي اللي عمره 3 سنين يبكي لأنه حس أنه بكره ما رح يشوف أبوه ويعانقه
حسبي الله هو نعم الوكيل عاللي كان السبب

هناك 6 تعليقات:

Whisper يقول...

ابشع احساس بالدنيا هو احساس الغربه, واللي مين ما كان حواليك بتضل حاسس ان في شي ناقص.

ذكرتني بأخوي اول مرّه تغرب سافر بعد الجامعه عالسعوديه, بحكي اول ما وصلت و قعدت بغرفتي بالسكن صرت اسأل حالي شو اللي عملتو بحالك؟؟شو اللي جابك هون؟ بحكي شعور فراغ رهيب جواتي حسيت

الله يهونها عليكم و علينا, و ان شاء الله تنحل كل المشاكل و ترجعو لاهاليكم و تستقرو بينهم :(

nissan يقول...

معلش ...شو اللي جبرك على المرّ؟؟؟
اكيد في لحظات حلوه بتروح منكم لكن تاكد انه الاهل هون بيسفقدوكم بنفس اللحظه الحلوه هاي اكتر شي...وبيتمنوا وجودكم معهم تشاركوهم الفرح

Um Omar يقول...

اكتر شي بكره بالدنيا ,, الوداع
حتى لو يكون اللقاء باليوم التاني

الله يعينك ويصبرك ع البعاد

غير معرف يقول...

اااااااااااااااخ بس هاد الي بحكي كل يوم شو بمنعني ابوس ايد امي الصبح شو بمنعني اطلع مشوار مع اخوي شو بمنعني احضر زواج صاحبي و شو و شو و شو
كل اجازة بتروحها بتحس خالك غريب اكتر حتى اهلك بعاملوك متل الغريب,, بعتبروك ضيف و ما بحبوا يزعجوك
نفسي اكون هلأ في حضن امي تلعبلي بشعري حتى انام
الله لا يسامحهم بس

Haitham هيثم Al-Sheeshany الشيشاني يقول...

الله يوفقو يا ربّ
الغربة، صعبة بل و لعينة!
:(((

أحمد صـلاح يقول...

الغربة درس صعبة في الحياة ، فليستعين بالله .