الأحد، 9 مايو، 2010

يوم المغتربين




صباح الخير...
من 4 سنوات و بالتحديد أول مرة نزلت اجازة من بعد ما صرت مغترب خطرتلي فكرة انه لازم يكون في يوم بالسنة اسمه يوم المغتربين
يعني مع كل قرف الغربة بتنزل اجازة عالاردن و كل فكرك انك رح تنزل تنبسط بس بيطلعلك مليون شغلة بتخليك ندمت انك نزلت اجازة
هادا اليوم لازم تعطل فيه الدوائر و الشركات بس مش بالأردن...بالخليج بس...اه انته شو دخلكم تعطلوا على ظهورنا؟
المهم...لازم ينعمل احتفال يلقي فيه مندوب عن جمعية عائلات المغتربين الأردنيين كلمة بيهني فيها المغتربين بعيدهم...وبيوعدهم باسم جميع الاهالي انه ما رح يتطلعوا علينا كبنك العائلة المفتوح دائما من باب انه احنا بس قاعدين بنلم مصاري تحت المكيفات و انه الف او الفين دينار بالشهر ما بيهزوا فينا شعرة...وانه في حال جبنالهم هدية مش كتير غالية لما ننزل اجازة ما رح يحقدوا علينا و يطلعوا علينا اشاعات من باب انه مليانين مصاري و عاملين حالنا بنشحد...و انهم بيتفهموا انه الهدايا بس للأقارب من الدرجة الأولى بس
بعدين بيجي وزير الخارجية بيلقي كلمة بيقول انه بيعتذر عن تقصير السفارات في حقنا و انه واجبنا عليهم كبير...و انه الموظفين بالسفارات بيتأسفوا عن المعاملة الزفت اللي بيعاملونا اياها بسفاراتنا اللي المفروض تكون سند و عون النا بالغربة
ووزير الداخلية بيلقي كلمة كمان بيبوس فيها لحيتنا اذا موظف الجمارك أو الجوازات بالمطار مارس علينا خفة دمه أو طلع فينا عقده المكبوته...أو اذا شرطي سير حب يخالفنا من باب انه خليه يتخالف ولا بس قاعدين يلموا مصاري بالخليج؟
أهم واحد هوه مدير الملكية الأردنية...بيعتذر عن زناخة ال Land Crew و المضيفين و تحميل الجمايل و النفترة بوجهنا...و عن خطوط تلفونات المكاتب التابعة للملكية اللي بتشبه خطوط برامج المسابقات في رمضان
نقيب السواقين العمومي و ممثل عن السواقين الخصوصي كمان بيلقي كلمة بيعتذر لو حدا حب يتناغش و كسر علينا بالسيارة يعني لازم نسامحه برضه النمرة الخليجية مستفزة للمشاعر
مندوب أصحاب المحلات و المطاعم تعهدوا بأنه ما يعاملونا كخرفان و بنوك متنقلة...
كلمة كمان من مجلس الأباء بيتعهد أنه اذا اجالهم عريس بيشتغل بالخليج ما يزيدوا مطالبهم عليه أضعاف لأنه (مليان مصاري)
بعدين بختام الحفل بيكون فيه غدا فيه من كل الاشياء اللي بنفتقدها...منسف مسخن مفتول كبة و كنافة...و يتم توزيع تنكة جبنة و تنكة زيت على كل مغترب
شكلي شطحت كتير بأفكاري...أو اني عن جد جعت...يالله خلص بيكفي
قربت الاجازة....جايلك يا عمان...جهزي حالك

هناك 8 تعليقات:

Whisper يقول...

طيب ما بمشي اهالي المغتربين ياخدو اجازه??
مهو الحفل طويل وما في مجال للدوام
من الاخر
يا لعيب يا خريب
يا بنعطل يا بنفرض عليكم تجيبو لاخوانكم و خواتكم في العالم التدويني هدايا :)
انتو اختارو

تيجو بالسلامه يا رب
اخوي جاي باول 6 ان شاء الله
كل يوم بحكي بسأل شو بدنا وجد بدنا سلامته و يجي بالسلامه
ما بنكر اني بحب الهدايا,بس اي شي برضيني :)

nissan يقول...

مساء الخير
اول شي ...الله يلعن ابو الغربه ...جربتها سنه وحده...عاطله كتير
تاني شي...هلا عن جد انتو بالغربه ما بتلموا المصاري بالشوالات؟
والله هاي الفكره السائده....ظلمناكم
تالتا...ان شاء الله بتوصل بالسلامه وبتستمتع بكل الاكلات والعزايم...برضو لمة الاهل حلوه
رابعا...ايش جايبلنا معك هدايا؟؟؟:)

Haitham هيثم Al-Sheeshany الشيشاني يقول...

فشيتلّي قلبي :)
متغرّب من سنتين و نص و كل شي حكيتو عشته و عايشته!
الصيفية هاي ما حأنزل إجازة و العائلة فقط حيروحو 3 أسابيع (فقط!!!! بالضبط :])
و من الآن بدأ الحكي و التدخل من الكلّ

:)
يقطع الغربة، جد :(

غير معرف يقول...

حطيت ايدك ع الوجع!! مين هاد الي ماخد الفكرة انه بنلم شوالات فلوس يا عالم يا ناس مشان الله والله يادووب عايشين شوفوف الايجارات هون كيف و الاحلى من هيك لما يشوف في الاجازة معك فلوس ما بعرف انه هدول فلوس الاجازة و ما معك غيرهم,, انا مرة ابن عمتي زعلت اني ما جبتلها هديه!! عااادي
انا اجازتي بشهر 9 مطووووله وااااااع :"(

غير معرف يقول...

عن جد من الآخر, كلام صحيح مية بالمية وبتفق معك بكل شي!!!! يعني إحنا بالغربة صرلنا أكثر من 35 سنة بالنسبة لأهلي يعني ما عاشوا أبدا في البلاد وأنا من يوم ما انولدت, ومش ما خدين أي شي منها غير التعتير وما لمنا شوالات أبدا ولا قاعدين على بيار نفط نفسي هالناس تفهم عاد مش هيك التخلف يعني وفوق هاد كله بتحس حالك غريب في الغربة طبعا ولما ترجع عبلادك!!!! شو نعمل بحالنا كمان ما بحلوا عنا بضلوا ينقوا: "طيب ما بدكم ترجعوا؟" "متى سن التقاعد عندكم؟" طيب لاقولنا مصالح وشغل بالبلد عشان نرجع!!!! يعني كافيين خيرنا شرنا ومع هيك ما حد تاركنا بحالنا!!!!

سلامي

Sereen

غير معرف يقول...

استكمالا لتعليقي السابق, هديك المرة كنا بالسوق وسمعنا أغنية الغربة, سألت ماما متى يا حسين بدنا نرجع عالضيعة؟؟؟ والله ما انا عارفة عنا شكلنا ملزقين هون!!! كل كا تخطر الأغنية عبالي بنادي ماما حسين (باللبناني) :)) بس هالأغنية بتقلب مواجع!!

sereen

مواطنون بلا حدود يقول...

Whisper..اذا بتجيبوا معكم أكل زاكي بنعزمكم معلش
Nissan...لأ الشوالات ما بتكفي عم نجيب جرافات تعبي المصاري...جايبلكم معي كل اشي انتوا بس استنوني
هيثم...معلش التدخل على وقت الاجازة احسن ما يكون على طول السنة
غير معرف 1 ... بيعين الله وبالنسبة لأبن عمتك انا بقول اقطع علاقتك فيه أريحلك
غير معرف 2 ...الحال من بعضه أنا كل ما بشوف حدا بيقولي أنه اجا على اساس سنتين مشان يجمع مصاري و يتجوز و هلأ صرلوا 30 سنة...فالوضع يدعو للتفاؤل شكله

مياسي يقول...

حطيت ايدك عالوجع

انا اهلي صارلهم بره شي 35 سنه وبرضو مضروبين بحجر كبير

ما انتو بره ما انتو بره اشي بيفلق!!

وعلى قولتك شوالات مصاري كأنو ما في هم ولا تعتير ولا قرف معزب ووكيل ولا اي شي!!

غير على قولة خالتي النق عالمغترب اللي معظم الوقت بيطلع على راسو او راس عيالو لا سمح الله!!