أنا اسف صرلي فترة غايب بس الشغل ضاغط هاليومين و يادوب قادر أقرأ مدونات بس ما عم أقدر أكتب شي...بس اليوم قرأت تصريح بجريدة الدستور من وزير الأعلام الدكتور نبيل الشريف استفزني...هذا نص التصريح كما ورد في الدستور:
(وقال الدكتور نبيل الشريف وزير الدولة لشؤون الاتصال ولاعلام في تصريحات صحفية بعد جلسة مجلس الوزراء ان الحكومة لن تستطيع الإستمرار في نفس طريقة العمل التي درجنا عليها مطولا وتصرفنا على ان لا شيء يحدث معلنا ان الدين العام وصل الى 11 مليار دينار وعجز الموازنة غير مسبوق لذلك نحن لا نستطيع ان نتصرف على ان الامور كلها على ما يرام.
وقال ان الحكومة بدأت باجراءات تقشفية بنفسها وتتوقع من الجميع ان تتحمل هذه الاعباء تحقيقا لمصلحة الوطن..) انتهى الاقتباس
وقال ان الحكومة بدأت باجراءات تقشفية بنفسها وتتوقع من الجميع ان تتحمل هذه الاعباء تحقيقا لمصلحة الوطن..) انتهى الاقتباس
الوزير قاعد ببهدلنا و بيقولنا بطلوا دلع و غنوجة بدنا نزبط الميزانية...والله انه احنا ما بنستحي فعلا...اتارينا احنا السبب في الديون اللي عالأردن و احنا يا حرام بنتهم الحكومة انها السبب...يا عيب الشوم علينا...يالله كل واحد يضرب حاله 100 كف عقاب...بسرعة
أنا بس بدي أسأل كم سؤال خبيثات:
- كم راتبك يا باشا انتا و الباشاوات اللي كانوا مجتمعين...وكم سيارة بتخدم كل وزير و عائلته؟
- ليش الك راتب تقاعدي بعد ما تبطل وزير يستمر مدى الحياة مع انك يمكن ما تشغل المنصب الا كم سنة بس؟
- ليش كنت ساكت لما الاعلام كان يقول انه الاقتصاد الاردني ما تأثر مع انك كنت ناطق باسم حكومة سابقة و رئيس تحرير جريدة رسمية؟
- ليش ما حدا تكرم و شرحلنا كيف ممكن الموشر الاقتصادي يكون عم يرتفع مع انه الشعب عم ياكل هوا أكتر و أكتر؟
- وين عائدات المشاريع الكبيرة و قوانين تشجيع الاستثمار ودينار الجامعة و غيره؟
- ليش الدين العام زاد بس البنية التحتية عم ترجع لورا؟
- ليش الضرايب كتيرة على كل شي بس طعام القطط و الكلاب مثلا ما عليها ضريبة؟ليش جمرك السيارات الكبيرة أرخص من العادية؟ مين مستفيد من هالحكي؟
يعني عم نخفف الضرايب على اللي معهم مصاري مع انه هم اللي مفروض يسدوا عنا...وعم تزيدها عاللي منفوخ من كتر ما هو ماكل هوا؟
أنا بقول خلي الحزام زي ما هو...وجيب واحد كفؤ...واعطيه صلاحيات يوقف الهدر اللي عم بيصير و الواسطات و المحسوبيات و سوء استغلال المناصب رح تلاقي وضعنا صار ممتاز بدون شد أحزمة
يا سيدي بلاش...أصلا انا شو بيفهمني بهالحكي...أكيد انتوا بتعرفوا أكتر مني...بس بدي منك شغلة..لو شدينا الحزام ايمتى رح نفكه؟يعني أكيد انتوا عاملين دراسة للموضوع,صح؟
أقولك...خد نص راتبنا لمدة سنتين بس بعدها اضمن انه الدين العام رح ينقص..أو حتى انشالله يضل زي ما هو و ما يزيد...اتفقنا؟
والله انا زهقت من هالكلام و شايف ما في منه فايدة...يعني كل ما زادت الضرايب زاد الدين العام...كيف هاي صارت؟؟
مشان الله حدا يفهمني
هناك 3 تعليقات:
6awwel balak ya ibn il 7alal, inta seed il fahmeen wil 3arfeen,
il mawdo3 la inta 7a tifhamo, walla abu abooy r7 yifhamo.. fala twajje3 rasak innak tifhamo...
il nas ily zayna bigulu allah yjeerana min il a3tham, oo la 7awl wala quwa illa bil allah!!!
اي حزام؟؟؟؟ هو ضل شدو الحزام!!!! ما احنا بطلنا قادرين نتنفس
ازيدك من الشعر بيت...وزير سابق عرف انه راح يطير بالوزاره الجديده, قام جاب نسبه عجز و اخد معلوليه من الوزاره اللي هو ماسكها لانه يعدّ موظف فيها, وحاليا بياخد راتب وزير سابق, و راتب تاني معلوليه من الوزاره اللي كان يشتغل فيها :)
هاد يشد الحزام ما اختلفنا :)
زي ما حكى علاء...الافضل ما نفهم لانّا ممكن ننجلط ونروح فيها
Ala' JA & Whisper الواقع بيخلي الواحد يشد شعره من اللي عم بيصير...بس شو بدنا نعمل...بعين الله
إرسال تعليق