الجمعة، 15 يناير، 2010

في القدس

مساء الخير
طولت عليكم شوي بس عنا ضغط شغل كتير اخر فترة...الله يديم الخير
امبارح كان عندي رسم لمشروع...دخلت غرفة الاجتماعات و بلشت أرسم...سمعت قصيدة (في القدس) للرائع تميم البرغوثي...اسمعوها معي


القدس محتلة و الواقع بيقول انه مستحيل نزورها و ما رح تتحرر في القريب المنظور...بس تذكرت انه في شركات سياحية أردنية كانت عاملة رحلات للي بده يروح يزور القدس...قامت قيامة جمعيات مقاومة التطبيع بالاردن على هذه الشركات...أنا اجاني تفكير
ليش يعني هذي الشغلة أصبحت جريمة؟ الواقع بيقول أنه القدس محتلة...و ما كان في اعتراض على زيارة باقي مدن فلسطين مع أنه كل المعاملات تتم عبر الجانب المحتل...يعني نفس المبدأ, طيب ليش ما نزور القدس...يعني الواحد زي ما بيشتاق يروح مكه وبيت لحم أكيد كتار نفسهم يروحوا القدس
ليش ما نروح؟ برأيكم غلط نروح القدس عن طريق فيزا من السفارة الاسرائيلية؟
مش أحسن ما رفض بحجة اننا بنقاوم التطبيع و ما شكله بحياتنا رح نزور القدس أبدا؟
يعني أنا برأيي أنه مقاومة التطبيع شيء و مقاومة واقع احتلالي مفروض علينا شيء تاني...أنا بعتبر زيارة القدس بهالطريقة هي مقاومة لواقع احتلال مش تطبيع...يعني ايجاد طريقة لممارسة طقوسك و عاداتك رغم قيود الاحتلال هو دليل قوي على المقاومة و البحث عن اسباب الحياة...وزي ما بنزور أهلنا في نابلس و غيرها أنا بعتقد أولى اننا نزور القدس
كيف أنا و أولادي رح نضل مشتاقين و متمسكين بالقدس اذا ما شافوها و لمسوا التاريخ و جذورهم فيها؟
عم بستنى رأيكم...أنا من جهتي عم بفكر بالموضوع جديا باجازتي الجاي...قولوا انشالله يصير خير
سلام

هناك 6 تعليقات:

هـ يقول...

تميم البرغوثي رائع .. أنا سمعت هالقصيدة منه في أمسية في دارة الفنون الصيف الماضي .. اما عن القدس اجاني نفس التفكير .. بس عنجد ما هان علي اروح اطلب فيزا من السفارة الاسرائيلية مشان ازور القدس و كنت ناوية ازور يافا كمان .. يمكن احلالي تضل صورتها حلوة بعقلي متل ما بتخيلها احلى من اني اروح استجدي منهم فيزا مشان ازور ارضي و اشوفهم بصولوا و بجولوا فيها عكيفهم.

مواطنون بلا حدود يقول...

كلامك مزبوط...بس شو الفرق بين اني أزور القدس أو أزور نابلس...في الحالتين ما بنقدر الا اذا اليهود سمحولنا..و اهانات عالجسر و الحواجز...يعني أنا حاسس ان المبدأ نفسه...ولا شو رأيك؟

Rula A. يقول...

Yes I remember reading that add in Al-Waseet newspaper..I see it is a good opportunity to go and visit Al-Quds..

أشرف محيي الدين يقول...

أخي مواطنون بلا حدود أسعد الله أوقاتك بكل الخير .

من هو الذي لا يمني النفس بزيارة القدس ومن هو الذي لا ينفطر قلبه شوقا وحرقة وألما على كل شبر فيها .

القدس هي وجع الأمة و هي الشامخة بأقصاها وقبتها إلى قيام الساعة .

لا نقبل أية مساومات في محبة القدس ولن ننساها مادام في جسدنا روح .

وكما قال الشاعر تميم البرغوثي (متى تبصر القدس العتيقة مرة فسوف تراها العين حيث تديرها)

أنا معك حول استياء جمعيات مقاومة التطبيع بالاردن عند الحديث عن زيارة القدس وعدم تحركهم حيال زيارة باقي المدن الفلسطينية وبصراحة هذا يثير تساؤلات كثيرة .

بالنسبة لي أنا لم أزر أي شبر من فلسطين المحتلة منذ ولدت على الرغم من أنني من أصول فلسطينية وعلى الرغم من محبتي لكل شبر هناك ولكني لا أتخيل نفسي يوما أقف أمام اليهود ليسمحوا لي بالدخول إلى أرض أجدادي .

أحترم وجهة نظرك في كل ماقلت وأسجل إعجابي وتقديري بمحبتك للقدس (بارك الله فيك ) .

كم أتمنى أن تكون هذه المحبة للقدس موجودة في قلوب كل العرب والمسلمين وأن لا يسمحوا لمخططات اليهود بالنجاح في عزل مشاعرهم عنها وإيهامهم أنها مدينة متنازع عليها بين اليهود والفلسطينيين .

القدس لكل العرب والمسلمين ومحبتها جزء لا يتجزأ من عقيدتنا كحبنا لمكة المكرمة والمدينة المنورة .

أشكرك أخي مواطنون بلا حدود ودمت بكل خير .

Whisper يقول...

سبحان الله
قبل كم يوم كنت انا و اخوي بنحكي وبناقش الموضوع

انا مع انّا نستغل فرصه انّا نزور فلسطين و باي طريقه ممكنه..

يعني المسجد الاقصى من المساجد اللي بنشدّالرحال اليها زي ما حكالنا رسولنا الكريم صلى الله عليه وسلم


اخوي طبعا ما كان مقتنع بالفكره اطلاقا, رأيه ان الختم على جواز السفر اعتراف رسمي بدوله اسرائيل :$

الموضوع بحسّه ما اله دخل بالتطبيع ولا بالاعتراف بوجود اشي اسمه اسرائيل

Yazid يقول...

انصح بقراءة كتاب مريد البرغوثي
ولدت هنا ولدت هناك

:)