الاثنين، 24 يناير، 2011

الطالب المسكين و المعلمة المتوحشة.... The student and the beast

طبعا أكيد شفتوا الفيديو للطالب المسكين اللي بيتعرض للإضطهاد من معلمته
أنا كنت حاسس انه في اشي خطأ بالفيديو و ما كنت قادر أفهمه...يعني معقول واحد بيرتكب جريمة بيصور حاله؟ وليش هالإهتمام الغريب
خصوصا أنه معروف أنه موضوع زي هيك رح يحرك الرأي العام؟
عن جد الموضوع ضل مجنني لحد اليوم الصبح و قرأت مقالة للأستاذ شرف أبو رمان
فعلا هاد تفسير منطقي جدا...ليش الأن بالذات طلع الفيديو...مش أول مرة بتحصل اساءة لطالب... و الطالب اللي فقد عينه قبل فترة أعتقد خسارته أكبر من المسكين اللي فوق فليش صار التضخيم لهالحادثة بالذات؟
أنا مش من أنصار نظرية المؤامرة بس أعتقد أن التوقيت و الطريقة و المحتوى كان مدروس و مقصود لضرب التعاطف الشعبي مع قضية نقابة المعلمين...لأنه في ظل تحرك الشارع الأخير ضد الحكومة و التحرك الجدي للمعلمين المطالبين بنقابة لا أعتقد أن أي (زلمة ابن زلمة) كان سيخرج و يصرح أي تصريح ضد النقابة
الموضوع في عبرتين...لا شيء من حولنا بيصير لله...فكر في الأسباب و الدوافع و التوقيت و من الطرف المستفيد...حتى لا تكون (خروفا) تساق لتحقيق أهداف ناس معينة....العبرة الثانية انه اعلامنا (أهبل) و بس بده ينتقد الحكومة (أو يفرجي حاله انه معارض) في حين أنه عبارة عن حجر شطرنج مش أكتر أو عالأقل (مش عارف وين الله حاطّه)
بس ملاحظه عالهامش...في الخبر (واشار الى انه فور التبليغ قام بالتدقيق بالفيديو والاستماع الى اللهجة واللكنة التي تتحدث بها المعلمة ومن ثم حصر عدد من المدارس الـ"50" المختلطة في المديرية التي تتوفر فيها خزائن بالوان محددة والواح نظيفة وطاولات مستديرة وعددها 3 مدارس تتوفر فيها هذه الطاولات)... 50 مدرسة ما فيها إلا 3 بس بطاولات جديدة و ألواح نظيفة...و مدير التربية نافش ريشه أنه هو اللي كشف المعلمة...أي روح زبط البلاوي اللي عندك بعدين بتلعب دور كونان
اذا كنا سنتكلم عن مشاكل التعليم...فالموضوع أكبر من طالب (أكل كتلة) إقرأوا هالمقال لو سمحتوا

هناك 8 تعليقات:

Haitham هيثم Al-Sheeshany الشيشاني يقول...

أنا متفق أن هناك تهويلا ً
و في الصباح عندما قرأت مقال ياسر أبو هلالة خطر لي ما كتبت هنا

أولوياتنا ملخبطة ... جدا ً ! و تعاملنا ليس لإيجاد حلول بل للبهرجة في الأغلب

Rain يقول...

this is exactly what I've been thinking about
thank you for the article and the links

Baseball يقول...

Salam Aleikom

Ya3ni allow me to interfere and comment here... w elkalam mesh 3annak by the way sayed 'Mowatenoon' :-)

ya3ni kol elli shafu el vedio en7amago w galo hadi mesh thahira hadi 7ala fardeyya... w hadi el m3allmeh la tumathel el madares el7ukumeyya fe al Ordon...

tab ma ana enbara lsani w ana ga3ed bagool had el vedio 3ebara 3an 3AYYENEH men elli beseer belmadares el 7ukumeyyeh!!! W enno el balawi fe madares el 7kumeh ma wagafat 3ala hek w enno beseer abla men hek kaman!! w ana ba3raf balawi akbar men hek bekteer w ba3raf asatzeh w mudereen metsatreen 3ala shaghlat a3naf men hek!!! Bas elkol bedo yemsa7 jookh w ygool "hadi el mudarreseh la tumathel el mu3allem el 2ordoni"

fish 7ada fina men wlad frer w kollna fotna madares 7ukoomeh w bne3raf shu ya3ni!

Ya 3ammi otrukoona men el 3awa6ef w 7ada ye7ki behai el mawadee3 bel3agel!

Ay na3am el vedio be7azzen bs had lazem ykun da3weh to reconsider the situation in Jordanian public schools in general... men na7eyat enno el tollab mesh makhdeen 7aghom w men na7eyat enno el m3allmeen mesh ma5deen 7aghom!

And by the way -although the timing inspires some things lol- but I do not think that it is a conspiracy... sheklo el vedio bada teslayeh w kharaj 3n el say6ara...

Wassalamo Aleikom ya 6ayyeb :-)

* Rain I was intending to post this comment on your blog this morning bs computeri 3allag w nseet el mawdoo3 w hassa tzakkart :-)

مواطنون بلا حدود يقول...

Haitham هيثم Al-Sheeshany الشيشاني
أهلا فيك...و انتا الصادق ما عنا أولويات من أصله...في (عنتريات) و بس
Rain
هلأ قرأت الموضوع تبعك...ان شاء الله الفكرة توصل بس
Baseball
أهلا فيك...صراحة مش قادر أفهم شو اللي بدك اياه من التعليق ولوين بدك توصل بس أظن احنا متفقين عالفكرة العامة...المدارس فيها الكثير من البلاوي...وهذا اللي أنا قصدته بالضبط...وبالنسبة للمؤامرة...فكر منيح و شوف التضخيم اللي صار...صدقني رح تقتنع بالموضوع...
برحب فيك دائما

Baseball يقول...

Well I am sorry en3ajaget belshare7 w ma 7aket el fekra el 2asleyya lol

Elli kan gasdi men el kalam enno wade3 el madares el 7ukomeyyeh bshekel 3am saye2, w eno ellom mesh bs 3ala el asatzeh wel m3almeen... badalma n3alej mashakel el sa6e7 'like teachers having fun by filming a scared student and laughing at him', khaleena n3alej thuroof el3amal lal m3almeen hadol, wade3 el sufoof elli 3m yga3du el tolab feeha... el sfoof elli sgoofha 3m tnazel mai 3altolab wel m3almeen sawa...

had kollo el malaf lazem yenfate7...

And by the way, ana bashuf eno ensha2 naqabeh lal mu3alemeen ray7a tsa3ed be7al hai el mashakel, mesh r7 t3aqedha...

I hope I delivered the idea in a clearer way now :-)

Thanks for bearing to read :-)

مواطنون بلا حدود يقول...

هيك أنا بتفق معك 100%
و أهلا فيك مرة تانية

naysan يقول...

صباح الخير
طبعاً...المخفي اعظم في المدارس الحكوميه وكلنا عارفين واغلبنا كان له حظاً من العنف التعليمي بطريقه او بأخرى في مرحله ما من حياته
لكن سبحان الله بطبعنا....نسكت حتى نجد كبش فداء نصب جام غضبنا عليه.
الموضوع اكبر ومتشعب اكثر من مجرد طفل تعرض لبهدله وقتله او معلمه سيئه المفروض انها خريجه جامعيه ومؤهلها لا يقل عن معلم صف او تربية طفل.
تعليمنا من سيء لاسوأ كما هو حالنا و سياساتنا و قراراتنا وانتخاباتنا .

شكرا لرابط مقال ياسر ابوهلاله...بالضبط ما في حدا بيسمع مطالب اهالي منطقه او بيشاورهم حتى.

موقع البوابة الالكتروني يقول...

تحية:
تمت الإشارة إلى هذه التدوينة على موقعنا على الرابط:
http://bit.ly/fxctVC