الثلاثاء، 14 سبتمبر 2010

عيد مميز


كل عام و انتم بخير و انشالله تكونوا قضيتوا اجازة عيد حلوة
هاد العيد قضيته أنا و مرتي بالسعودية فقررنا نعمل عمرة
صراحة هاي أول مرة بعمل عمرة و كنت شوي متردد و هيك مستصعب الموضوع انه الدنيا عيد و شوب و زحمة رمضان و مصاريف...بعدين بتشجيع من المدام أخدنا الخطوة و توكلنا على الله
كان اخر اسبوع من رمضان لما حجزنا ... طبعا الاسعار برمضان ناااااااااااااار...يعني انا استأت من استغلال الناس لموضوع الدين بحيث انه اسعار الفنادق بتتطلع و بتنزل حسب المواسم ... و مش بس هيك القرب من الحرم اله سعر و وقت الاقامة اله سعر يختلف في وسط الاسبوع عن نهايته...حتى نوع الاطلالة اله سعر...في اطلالة جزئية و اطلالة عالحرم بس و اطلالة عالكعبة و كله بسعره طبعا...المهم توكلنا على الله و اخترنا غرفة مع اطلالة عالكعبة المشرفة, كونها أول زيارة لمكة و حبيت تكون مميزة...زائد اني كنت ب (مود البحترة) هداك اليوم

الشي التاني هوه موضوع العمرة نفسها...طبعا كل واحد بتسأله كيف العمرة؟ ببلش يفتي و كل موقع بيحكيلك شكل و اللي عامل عمرة بزمانه بيصير شيخ الاسلام و بده يدلك...أنا ريحت راسي و طلعت على مكتبة جرير جبت أصغر و أبسط كتيب عن العمرة و قرأته و ما سمعت كلام حدا
طلعنا من مطار الدمام بلبس الاحرام و عقدنا النية من الطيارة...وصلنا مطار جدة و منها على مكة بالسيارة أول ما شفناه كانت الساعة الجديدة اللي بمكة ... حلوة كتير

بعدين وصلنا الحرم و كان زحمة كتير كتير...حطينا الشناتي بالفندق و رحنا نعمل العمرة... منظر رهيب كان لما شفنا الكعبة المشرفة
هيك احساس غريب ... أولا رهبة المكان...بعدين اشي ما كنت تشوفه الا بالتلفزيون ... و كمان اجتني فكرة انه الرسول صلى الله عليه و سلم كان هون و كل الناس اللي سمعنا عنهم و بنعرفهم كانوا هون... الصحابة...الخلفاء ... قادة الجيوش الاسلامية...صلاح الدين...عبد الناصر...عرفات...الملك حسين...الملك عبدالله...قديش بتحس حالك صغير بهالمكان...وقديش بتحس الاسلام كبير لما تشوف ناس من كل البلدان توحدوا في نفس المكان لنفس السبب...قديش استحيت من حالي اني ما اجيت قبل هيك...وانه الاندونيسي مثلا عمل مجهود يتعلم عربي بس مشان يقرأ القرءان وانا اللي بعرف عربي منيح مقصر في القراءة و الحفظ

شغلة كنت حابب لو كانت موجودة (صراحة ما بعرف اذا موجودة أو لأ) انه يكون في رحلات لمعالم مكة الدينية...يعني قديش حلوة الرحلة لغار حراء مثلا و قديش مفيدة للأطفال أو حتى الداخلين في الاسلام من جديد...رحلات لمواقع الغزوات و الأحداث المهمة مع دليل شاطر يشرح و يفصل الأحداث اللي صارت.... أنا من ناحيتي أكيد كنت بطلع هيك رحلة

كلمة حق يجب أن تقال...مجهود خرافي عم تبذله الدولة السعودية في رعاية و نظافة الحرم والنظام و مساعدة الزوار...وكل حد موجود هناك مستعد يساعدك بدون تذمر....الله يعطيهم العافية

كانت الرحلة قصير وزي الحلم بس حلوة كتير و أنا بنصح فيها ... الله يطعمها لكل مشتهي و يطعمنا العودة يا رب...
هي شوية صور من الزيارة


مدخل مكة





منظر الحرم من الغرفة





الكعبة المشرفة


مقام سيدنا ابراهيم


باب الكعبة المشرفة






هناك 4 تعليقات:

Em Ommar يقول...

وإنت بخير وصحه وسلامه

الله يسامحك,, بجد

دمعتي نزلت من شوقي لهيك مكان
من زمان عم بدعي اني اعمل عمره او حج
زمان كتير,,,بس مو زابطه

مواطنون بلا حدود يقول...

انشالله بتزبط...الله كريم

لبنــــــــــى يقول...

كل عام و انت بخير
حلوة كتير الصورة اللي بتطل فيها على الحرم من الغرفة
سمعت عن الساعة كتير
و اللي اجو من هناك عم يقولوا بس تخلص رح تكون حلوة
حمد الله على سلامتك

Whisper يقول...

كل عام وانت بالف خير
و الله يجزيها المدام كل الخير لاقنعتك...هلأ خلص قلبك سبحان الله بتعلّق بالمكان

الله يتقبل الطاعات و ان شاء الله تكون تذكرتنا بالدعاء...ربنا يكتبلنا اياها
طول رمضان وانا بدعي ربنا يسرلنا حج و عمره ان شاء الله..ربنا كريم

بالنسبة للجوله على المعالم الدينيه فأه في
في زيارات لغار حراء و لجبل احد و لمواقع الغزوات و لقبور الشهداء
بابا وماما بالعمرة راحو على كل هالاماكن

ماما من وقت الحج وهي بس تشوف منظر الكعبه عالتلفزيون او تسمع صوت السديس بتبكي و بتدعي ربنا يكتبلها الزيارة مرّه تانيه