الاثنين، 16 أغسطس، 2010

اجازتي...الجزء الأول

بدي أحكيلكم شوية مواقف و ملاحظات من الاجازة .... كل ما أتذكر موقف من الاجازة بحكيلكم اياه
أول موقف صار معي بمطار الملك فهد بالدمام....و أنا رايح عالمطار اجاني تلفون من زميل معنا بالشركة كان راجع من عمان بنفس اليوم اللي أنا مسافر فيه بيقول انه في تأخير بطيارة الملكية
ما عرفت شو أعمل بس قلت حرام يضل الشوفير معي و أأخره فقلتله روح خلص...طبعا موظفين الكاونتر ما حدا جاب سيرة تأخير...مع انه واجب مدير المحطة أنه يتابع هيك مواضيع
عملنا بوردينغ و ختمنا الجواز قام خبرني صاحبي انه التأخير المتوقع 5 ساعات...قلت أمري لله بستنى
الزناخةبالموضوع أنه طول 5 ساعات و ما شفنا حدا من الملكية مشان يخبرنا شو الوضع أو يسأل اذا حدا لازمه اشي...شركات الطيران التانية بالعادة بتوزع وجبات خفيفة عالمسافرين بس الملكية مش هيك أبدا...
المهم وصلت الطيارة عالأردن...أول ما تخبط الطيارة بالأرض بتبلش العالم تفتح موبايلاتها...و توقف بممر الطيارة مشان تنزل أول شي...كأنه المطار رح يهرب...بدون أدنى اهتمام بتعليمات كابتن الطيارة انه الكل يضل بمقعده و انه الموبايلات ما تشتغل...احنا شعب ما بيسمع و اذا سمع ما بيرد على حدا...و كأنه الطيار بيحكيهيك من باب سقاعة الوجه و بالتالي من واجبنا نجاكره
موظفين الجوازات محترمين كانوا صراحة بس أنا شفت أنه الزحمة على ختم الجوازات ما الها داعي كان و ممكن تنحل بسهولة...بس يمكن بريستيج و انه السياحة عنا حبطرش...الله أعلم
هلأ ما رح أحكي على مرافق المطار التعبانة لأنه المطار الجديد جاي عالطريق...فخلينا نستنى و نشوف
بس تروح تاخد الشنتة ما بتلاقي عربية للشناتي....و السبب انه الشباب اللي المفروض يساعدوا الناس بالشناتي محتلين كل العربايات و مخبينهم للزباين الدسمة اللي بتدفع...و اللي ما بيدفع الله لا يردة يدبر حاله
على تفتيش الجمارك ما في حدا يساعدك بالشناتي... 3 موظفين قاعدين عالجهازمبحلقين فيه كأنه عم يحضروا نهائي كأس العالم و مش مستعد واحد يتنازل منهم و يساعد وحده بحمل شنتة تقيلة مثلا...زي ما صار مع مرتي لما نزلت لحالها و حاولت تحمل الشنتة... و لأنها تقيلة وقعت مرتي عالأرض و وقعت الشنتة فوقها...مع هيك ما انهزت شعرة من الشباب...و رجعت حملت الشنتة بصعوبة و حطتها عالجهاز.... ول؟؟!! ما في نخوة عند الشباب؟؟؟
المهم وصلنا الاردن و مشي الحال....بكملكم الباقي بعدين

ملاحظة:
أنا اللي بيقهرني بهيك شغلات انها شغلات تنظيمية ممكن تفاديها بسهولة و ما بدها مصاري بس بدها شوية تنظيم و كل واحد يحمل مسؤولية شوي بشغله...و شوية أخلاق و ضمير...يعني ما بتكلف اشي....و هاي المفروض واجهة البلد....يعني السائح بس يصير معه موقف من هالمواقف مستحيل يقتنع انه الاردن بلد مرتب و شعبه طيب...و الله لو بيعبوا طريق المطار اعلانات لتشجيع السياحة ما رح يقتنع...و الدليل اسألوا أي سائح عربي عن الأردن...بيقولك الشعب وجهه ناشف و دايما مكشر.... السياحة بتيدأ من الانسان أول اشي بعدين بيجي كل شي تاني

هناك 3 تعليقات:

Haitham هيثم Al-Sheeshany الشيشاني يقول...

معك حق و الله.
و اسمحلي بشوية نعميم لأنو شركات -إذا بصير نسميها شركات!- الطيران العربية + مطاراتنا مسخرة للأسف.
ليس بدءا ً بالحجوزات و لا انتهاءً بحجز عربات حمل الأمتعة.

هناك قصص كثيرة و عديدة و المؤسف -كما ذكرت- أن حلها ليس بحاجة لمعجزة، فقط بعض التعامل الإنساني. فضلا ً عن كونه من صميم مثل تلك الوظيفة.

شكرا ً لك.

Whisper يقول...

تأخير 5 ساعات مش محسوب عند الملكيه اسمه ما شاء الله البوابة اللي بتقعد تستنى عندها فيها كل وسائل الراحه

دايما اللي عالجوازات كل 3 كاونترز فيه بس شب واحد شغّال لهيك بتصير الازمه

تفتيش الجمارك اللي بعد اخد الشنطه من القشاط مش فاهمه لأيش بالزبط, غير تعتسة عالفاضي

الحمد لله على سلامتها لزوجتك, مرّه سافرت انا و زوجة اخوي كانت والده جديد و معها بنتها شهرين و انا رجلي كانت مكسورة, ولااااا حد تطلع علينا و نادينا على واحد من العمّال و حكيناله انّا حنعطيه فلوس, بس ما رضي حس في ناس محرزين اكتر منّا, و مشينا و جرّينا الشنط احنا

الواحد يحكي الحق, الي من 2001 وانا بسافر سنويا عالامارات مرّه وحده اجا واحد من الشرطه وساعدني بحمل الشنطه, ما صدقت حالي وقتها :)

jafra يقول...

المشكلة انو معروف عنا برة انو شعب مثالي و منظم و بحب الترتيب و بالشغل ما في متله .. من وين جايبين هالسمعة عنا ؟
اكيد ما نزلوا على المطار