السبت، 10 يوليو 2010

احنا بسينما ولا وين بالزبط

صباح الخير من عمان...هاد أول بوست من عمان...رح أكتبلكم احداث صارت معي بالاجازة...مش بالضرورة بالترتيب بس رح احاول اكتب كل شي
امبارح قعدت انا و مرتي نفكر شو بدنا نعمل...طبعا عمان ملياتة أماكن حلوة فبالاخر قررنا نروح نحضر سينما
ولأنه مرتي ما بتحضر الا عربي رحنا نحضر فيلم عسل اسود لأحمد حلمي
الفيلم رائع و حلو كتير صراحة...بس اكتشفت انه الشعب الأردني ما عنده أبدا ثقافة السينما
أول شي لما تروح تقطع التذكرة...يعني كأنه دور مخبز...واللي قدامك بيقعد يشاور كل أصحبه القريب منهم واللي على بعد 20 متر ...انه أي كرسي و هون نقعد ولا هون...ساعة بياخد لأنه فعلا قرار تاريخي وين بدك تقعد و لازم مجلس الشورى ياخد قرار بهالموضوع
المهم...الفيلم كان 10:45 و الناس للساعة 11:30 و همه لسا بيجوا...بتضطر تبعد لهاد و تستنى حدا يمر قدامك و طبعا الشب اللي مسؤول عن الجلوس بيشيك عالتذكرة تبعتك 100 مرة...غير الناس اللي بتقطع تذكرة بمكان و بتقعد بمكان تاني بعرفش ليش و خدلك مفاصلة عالكراسي كأنك بباص مؤسسة...وحدة مع أولادها بتقطع تذاكر بكراسي مفرقة و بتصيؤ تترجى العالم مشان يقعدوا كلهم بنفس الصف
كمية الأطفال اللي بالسينما أكتر من الحضانة اللي جنب بيتنا...أعمارهم أكيد مش أعمار ناس بتفهم شو يعني سينما...وظيفتهم الوحيدة العياط و النكد من باب اضافة موسيقى تصويرية للفيلم
المهم بلش الفيلم...ظهر أحمد حلمي...بلش التصفيق و التصفير!!!! شو احنا بمسرح؟يعتي لحد هلأ مش ملاقي تفسير لهالاشي
طبعا بدون ما احكي قديش السينما سيئة و صغيرة و ريحة الحمامات و الصورة اللي كل شوي بتروح ...أي لو جايب نسخة من البلد كانت الصورة أحسن....بس معلش هاد كان اختيار خاطئ من طرفي
هلأ بنص الفيلم بتحس انه مجلس الوزراء موجود معك بالسينما...يعني الموبايلات ما سكتت...و اسمع انا بالسينما بعدين بحكي معك...والله رنيت عليك مشان تيجي معنا بس انتا ما رديت...والله الفيلم مش كتير لو حضرنا اللمبي أحسن....عايش مع الأخ كنت لدرجة اني حسيت انه لازم أتعرف عليه هوه و صاحبه لأني صرت أعرف كتير عنهم
صوت أكل البوشار و شرب البيبسي كمان من المؤثرات الصوتية اللي ما بتغيب...جاروشة الله وكيلكم...كأنه الأخ عم يحملنا جميلة انه اشترى بوشار...غير المعلقين اللي لازم يشرحلك الفيلم و ليش هيك صار و يترجم أي كلمة انجليزي لصاحبة و يعيد الجملة اللي حكاها الممثل...وطبعا الضحكة عبارة عن وصلة مدتها لا تقل عن 30 ثانية
باختصار أنا بعتقد انه على باب السينما لازم يحطوا لزقة على تم كل واحد فايت حتى ما نسمع صوته ابدا...الفيلم حلو كتير بس أعتقد اني حضرت منه 65% بس...و رح أحضره كمان مرة بس ينزل بالبحرين انشالله

هلأ خارج الموضوع عندي ملاحظة :
4 بنات في عمر المراهقة محجبات حجاب من النوع الفايع كانوا بالسينما بدون مرافق و طلعوا من الفيلم عال 1:00 صباحا تقريبا و أخدوا تكسي للبيت ... شو لهالدرجة صرنا كوول؟يعني شوفير التكسي لو حول طريقه بنص هالليل و أخد البنات وين ما كان شو بيصير؟ بيقولوا أهلها الله لا يوفقه هالشوفير ما عنده ضمير...و ما بيقولوا انه اللي بيخلي بناته لهالوقت بره و يروحوا لحالهم انه هوه اللي ما عنده شرف
بيعين الله...
صحيح اللي عنده اقتراحات لأماكن حلوة يحكيلي

هناك 6 تعليقات:

sheeshany يقول...

حمدا ً لله على سلامتك و أتمنى أن تستمتع بالإجازة.

بالنسبة لملاحظتك على السينما، اسمح لي بالقول: يا ما حتشوف هالصيفية!

مواطنون بلا حدود يقول...

شكرا كتير على مرورك و على امنيتك الي باجازة سعيدة...الحمدلله لحد الأن الاجازة حلوة و انشالله تضل هيك
الله بيعين بس فعلا تركيبة المجتمع عم تتغير ...بس للأسف التغيير للأسوأ

Dr.Mohammed يقول...

و الله كلامك صحيح ، عشان هيك انا بنصحك اذا بدك تروح سينما حاول ما تروح بنهاية الاسبوع ، حاول تروح بنص الاسبوع و اختار اوقات بدري شوي عشان تخلص من هالعجقه هاي، لانو بالفعل بتقلب حضانة عنا بالسينما و بعدين مهما كان نوع الفيلم اكن انيميشن و لا رعب و لا للكبار بتلاقيهم موجودين ، الاحلى من هيك لما تبلش حرب رمي البوشار!!!

لبنــــــــــى يقول...

حمد الله على السلامة
كيف عمان
:(
كتير اشتقنالها بس راحت للسنة الجاية

يعني هاي العمايل كلها بالسينما كيف لو كان مسرح شعبي
في اشياء كتير لازم نتعلمها شكلو
مش بس دخلة السينما

الله بعين

نيسآان يقول...

صباح الخير يا مواطن والحمدلله على السلامه
بنصحك تزور الاماكن الطبيعيه والشواطئ الساحره!!!!
welcome to jordan !!!

Whisper يقول...

الحمد لله عالسلامه

حاول ابعد عن سينما المولات, و المولات اجمالا لانها بالعطله الصيفيه بتقلب مدارس

شارع الرينبو كتير حلو للتمشايه و في كوفي شوبات حلوه

حدائق الحسين حلوه تاخد فطورك وتروح تفطر هناك, بس مش يوم عطله

اذا خطرلي شي بحكيلك :)

بالنسبة للشوفات اللي شفتها...لسا الخير جاي عالطريق :)