السبت، 3 أبريل، 2010

(وإذ تأذن ربكم لئن شكرتم لأزيدنكم ولئن كفرتم إن عذابي لشديد)

اليوم نزلت عالموقع...طبعا الموقع عبارة عن خط انابيب لتزويد المصانع بالمواد الأولية...طبعا كونك بمنطقة صناعية و خط تصريف مخلفات المصانع مفتوح فالروائح هناك اشي بيسم البدن...صرت أفكر يا الله ليش هيك أنا حظي...و ليش اخترت هاد الشغل..و ليش و ليش...لحد ما مرت سيارة محملة عمال... نزلوا العمال من السيارة و على خط التصريف بلشوا ينظفوا فيه بايديهم ...طبعا الكل غايص لنصه بالخط و شغال من قلبه...انا فكرت انه كيف متحمل عيشته هاد...لا و المشكلة انه عامل يعني راتبه اشي كتير بسيط...فكرت بيني و بين حالي و قلت الحمدلله عالنعمة اللي انا فيها...لأنه في كتير ناس حالهم أسوأ
الفكرة انه الانسان تعود على اشاء بحياته لدرجة بطّل يحس بأهمية هاي الاشياء...و في حواليه من النعم اللي نسيها بس من دونها ما بيقدر يعيش...منها نعمة الصحة و التنفس و العقل و غيرها من نعم الله التي لا تحصى
دائما بندور على الاشياء اللي مش موجودة عنا و بيركبنا الهم لأنها مش عنا...بس بننسى كتير من الاشياء اللي مبسوطين فيها و غيرنا بيحلم تكون عنده....الزوجة بتدور على الفلوس اللي مش موجودة مع زوجها و بتنسى انه معطيها أمان و حب غيرها بيحلم فيه...و الزوج عينه على وحدة يمكن أحلى من مرته و بينسى الحنان و الاهتمام اللي مرته غامرته فيه... الأباء بيتذمروا من أولادهم و نسيوا انه كتير ناس انحرموا من الخلفة...و كتير أولاد بيتذمروا من أباءهم و نسيوا انه في أطفال فقدوا اباءهم و امهاتهم...
حاول فكر بأشياء حواليك بتعتبرها من المسلمات بحياتك و تخيل كيف رح تكون الحياة بدونها...وشوف كيف تقديرك للأشياء رح يزيد...و فكر بينك و بين حالك...متى اخر مرة حمدت الله فيها على نعمة البصر أو العقل أو السمع...متى حمدت الله فيها على نعمة الماء و الهواء...على نعمة وجود الدواء اذا مرضت...على نعمة الاهل و الاصحاب...على نعمة الزوجة و الاولاد؟
احمدوا الله على أصغر النعم حتى تدوم...وقبل أن تفكروا بالتذمر من أي شيء فكروا كم انتم محظوظون لوجود أشياء أخرى في حياتكم

هناك 4 تعليقات:

Sh3rawi يقول...

بالفعل كلام مزبوط 100%
انا فكرت فيها, و صعب جدا جدا انه توصل لهاي المرحلة اللي هو الاقتناع بما اعطاك الله و شكره عليها, مع محاولة الوصول للأفضل دون التذمر ...
واعتقد هاي طبيعة في الانسان انه "ناكر للجميل" و في القرآن انه لما يجي الانسان خير بشكر,و لما يشوف انه في شر "يكفر" ...
تحياتي على المدونة :)

مواطنون بلا حدود يقول...

sha3rawi..سعيد بمرورك و تعليقك
هو المشكلة انه أحيانا نظرة الناس للأشياء اللي مش عندهم بتخليهم محبطين...لأنه مهما كان الانسان غني فيه اللي أغنى...بس لو فكرنا بالأشياء اللي بنعتبرها بديهية رح يزيد تقديرنا للحياة و كل شي فيها

Whisper يقول...

الحمد لله رب العالمين على كل شي

معك حق, كتير منّا ما بفكر بابسط نعمه عايش فيها الا لمّا يبتليه رب العالمين بفقدانها,نعمة الصحه مثلا ما بنفكر فيها الا بس نمرض لا سمح الله

الله يديم نعمه علينا اجمعين

هـ يقول...

اللهم اني أعوذ بك من زوال نعمتك
أجمل دعاء تعلمته اليوم :)