نظريات بدون إثبات

عندما يكون لديك شعور مسبق بالكراهية تجاه شخص ما, يصبح لديك استعداد كبير لعدم تقبل كل ما يصدر منه...بل ستتولد لديك قناعة بأن كل ما يقوله أو ما يفعله هو موجه ضدك حصرا....

نصيحة: لا تعط نفسك ذلك القدر من الأهمية

*********************************************************************

نظريات بدون إثبات: سلسلة من استنتاجاتي اليومية...و طريقة أخرى كي أقول لنفسي أن تكف عن / أو أن تبدأ التفكير بهذه الطريقة

أنا مريييظظظظظ

شكلي انصبت برشحة صيف من النوع المقرف...يعني سيلان أنف و وجع راس و تسطيل و تعب و هلاك

مش هاذا موضوعي...الموضوع كيف سبحان الله بقدرته و بعلمه ممكن كائن حقير لا يرى بالعين المجردة يبهدل واحد شحط وزنه أكتر من 100 كيلو و يهد حيله...يشرشحه و يخليه مثل السطل اللي بيتعاطى حشيش و أفيون...و يخليه حاير بين الحر القاتل عشان يتحسن ولا المكيف مع استمرار تدهور الحالة...ويسد نفسه عن الأكلات اللي بيحبها و يخلي الناس تضحك على طريقة كلامه و على منظر سيلان أنفه (في رواية أخرى برابيره)

كيف الناس بيغرها قوتها و مالها و سلطتها و بتنسى انه ربنا شايفه و متحكم بمصيره و قادر على شقلبة أحواله بين يوم و ليلة...و سبحانه بيسلط عليه أضعف خلقة دليلا على عظمته جل جلاله و حقارة خصمه

سبحان الله و بحمده, سبحان الله العظيم

علاقات العمل

إجمالا أنا بحس إني شخص غير محبوب في نطاق العمل...مش مكروه بس غير محبوب.. بحافظ على التعامل الرسمي مع زملاء العمل...بقوم بأنشطة معهم خارج أوقات الدوام لكنها من باب المجاملة فقط...باختصار لا أؤمن بوجود علاقة صحية بين الموظفين لأنه بالأخر كل واحد رح يعمل لمصلحته هوه...زائد اني انسان صريح و ما بجامل ولا بشلن وهادا النوع من الشخصيات مش كتير محبوب ببيئة العمل بالذات

الخلاصة...أنا بمحيط العمل انسان مش اجتماعي و ما بجامل ولا بحط واطي لحدا...وبكره المجاملات و الابتسامات المصطنعة...وبحب كل انسان يكون اله خصوصية بشغله و حياته الخاصة...يعني بحب أعمل فقاعة حوالين حياتي و ما بحب حدا يدخلها أبدا...أبدا

في نوعية زملاء في العمل بكرهها و نفسي أفجرها بالمكتب...بسبب انهم بينتهكوا خصوصيتي و بيفرتكوا هاي الفقاعة...المشكلة انه ما بتعرف شو بدك تعمل معهم...تنزل فيه بوكسات؟؟؟ما رح يتفهموا الموضوع بالشركة...تجامله و تجاريه؟؟؟مستحيل لأني فوق ما أنا متضايق على الفقاعة تبعتي رح أتضايق كوني جاي على حالي و بكذب و بجامله...أسكتله؟؟طيب و فقاعتي شو رح يصير فيها؟

- من هاي النوعية اللي بيجي بيحكيلك عن حاله شو عمل امبارح أو بيحكيلك قصة فيلم حضره أو تفاصيل أكيد ما بتهمني...ما بهمني وين سهرت أو مع مين أو قديش انتا فايع و صحبتك حلوة...بس حل عني

- وكمان النوع اللي بيفكر الناس بتحبه...يعني بيجي بيقعد على حفة المكتب...أو بيستعمل الكمبيوتر تبعك بدون اذنك أو بيرد على موبايلك...بتلاقيه على باب بيتك فجأة و بدون سابق انذار...لأنه أكيد أنا بحبه و أكيد عادي انه يعمل هيك....بس بدي أقولك شغلة..على فكرة أنا ما بحبك و ما تستعمل أشيائي بدون اذن بلاش ألعن #$$@%^^*

- النوع اللي بيمغصني هوه النوع اللي بميل للمس غير المبرر...يعني اذا بده يشجعك بيحط ايده على كتفك...أو بيمزح معك فبيفركلك شعرك...أو بيعطي لنفسه الحق يقولي قديش أنا ناصح...أو اذا بوطي حلو أو بلوزتي مش لايقة عالبنطلون( أه في ناس بتحكي هيك من الشباب) ... بس يا واطي يا مش متربي يا شاذ...بعدين مين انتا مشان تعطي رأيك بكرشي أه ؟

- النوع اللي سابق سنه ...هاذ أنا بحبه...مش حبا فيه طبعا...بس لأني أشطر واحد بينكس هاي الفئة فبرتاح نفسيا لوووول يعني بيجيك مهندس امبارح طالع من حفلة تخرجه بيقولك أنا مهندس زيي زيك و لازم تستشيرني بكل اشي...طبعا بياكل اللي فيه النصيب و بيلبد

- النوع اللي بيزعل منك اذا ما صبحت عليه كل يوم و اذا ما سلمت عليه كل يوم و اذا ما شاركت بنشاط هوه مقترحه...طيب ما فهمت اني مش طايق أهلك؟أكتبلك اياها على صباحي كل يوم مشان توصلك؟

- الموظف الجوجل...اللي بدون ما تسأله بيكون سامعك و انتا بتحكي عن موضوع معين و بيصير يقولك على فكرة هاي الشغلة اسمها كذا و بتقدر تعمل كذا ... يا زلمة مين سأل أهلك انتا...بعدين مش أنا اللي بعطي زيادات اخر السنة و لا بوزع نجمة للشاطرين...احلق من هون

ما تقولوا عن هالبوست انه مش زابط و ما إله معنى...اعتبروها فشة فل لأنه في ناس بالشغل معي هيك...ونفسي أقضي عليها

أسماء

مرحبا...

بعد غيبة قصيرة عن المدونة كنت لا زلت قريبا من مدونات الاصدقاء و مطلعا عليها دون انقطاع

حدث معي 3 أشياء ...نزلت اجازة و أخذت دورة PMP

لكن أهم حدث هو أننا عم نستنى عضو جديد في عائلتنا الصغيرة ... عواصف من الأفكار و التجارب و خليط من الفرح و القلق و التعب تجعل التجربة تبشر بحياة جديدة و مختلفة كليا

الاسبوع الماضي الدكتور خبرنا أنه عالأغلب المولود حيكون بنوته

لا أخفيكم انه هذا ما تمنيته كوننا 3 شباب بالعيلة كتير من الأحيان كنت أحس أهمية وجود انثى في حياتنا تضيف لمسة رقة و جمال للبيت...الحمدلله أنه ربنا عوضنا عن هالموضوع ...ن شاء الله ربنا بيكمل بالسلامة و بتوصل بصحة و عافية

هلأ بدي مساعدتكم باختيار اسم للبنوته مع استثناء الاسماء حلا و راية و زينة لأنهم أقوى المرشحين حاليا و طبعا أحلى اسم (سارة) اللي هوه اسم زوجتي...يللا ورجوني همتكم

واللي بيختار اسم و بيطلع هوه رح أعزمه عالعشا بالمكان اللي بيختاره بعمان (بشرط مش أكتر من ليرتين و خمسة و سبعين قرش )

قرار

منذ أن أصبحت لغة الحوار لا تخلو من شتم و تخوين و (تناحة)

منذ أن بدأت أشعر أن كتاباتي لا تحدث الأثر الذي كتبت لأجله

منذ أن شعرت بفقدان التواصل مع من أكتب لهم

منذ أن شعرت بأني لا أخذ مكاني في (ميدان التدوين)

منذ أول مرة أحسست بخوف من كتابة شيء ما

منذ أن شعرت بأن علي أن (أحسب حساب كل كلمة بقولها)

منذ شعرت بأن صوتي لم يعد له صدى

قررت أن أترجل...فهناك في ساحة التدوين من هم أقدر و أبلغ

سأترجل...لكن سلاحي و فرسي سيبقيان بجانبي

هل حقا نريد ملكية دستورية؟

بعد الأحداث اللي صارت امبارح و كوننا بعاد شوي عن الأحداث و في محاولة لفهم ما يجري مع قياسه بالصورة الكبيرة لمحاولات التغيير في الوطن العربي...راودتني بعض الخواطر فيما يخص الحراك الشعبي في الوطن العربي عامة و في الأردن بشكل خاص

الأسبوع الماضي كانت أول مرة بسمع بحركة 24 أذار (مش انتقاصا للحركة و لكن ربما بسبب التقصير الإعلامي)...دورت على الحركة و شفت المطالب اللي بيطالبوا فيها...كلها مطالب يعني لا غبار عليها و من الممكن تحقيقها مع الوقت و بالألية المناسبة...لكن لي تعليق على موضوع الملكية الدستورية و الحكومة الوطنية المنتخبة...صراحة أنا خايف من اللحظة اللي حيصير فيها الحكومة عنا منتخبة فعلا...لأنه اذا كان الشعب غير قادر على انتخاب مجلس نواب حقيقي فكيف بالحكومة...كل واحد مهما كان مستوى تعليمه وقت الانتخابات بيرمي تعليمه و مفاهيمه و قيمه و بيركض ينتخب قريبه و ابن عشيرته و أبو صاحبه...أمانة كم واحد شارك بالأنتخابات على أساس البرنامج الانتخابي مش على أساس المعرفة الشخصية؟

المطالبة بالحكومة الدستورية بيتطلب وجود أحزاب ناضجة سياسيا قادرة على افراز نخب سياية و اقتصادية و تتمتع بقواعد جماهيرية تعطيها الشرعية...و أحزاب أخرى قوية و لديها ما يأهلها لتمارس دور المعارضة القوية الضاغطة و المراقبة...في الأردن لا يوجد لدينا لا هذا ولا ذاك...اللي مسميين حالهم نخب سياسية لا تفقه في السياسة شيئا و لا تزال تحركها المصالح الخاصة و الجهوية و مصالح البزنس...وأنا أخاف على الأردن من هيك أشكال...أعطوني اسم واحد فقط يصلح ليكون رئيس وزراء يكون أمين على مصالح جميع فئات الشعب...أخشى ما أخشاه أن تفرز الحكومة المنتخبة رئيس وزراء من أعضاء حركات البيانات اللي ما رح يفوت فرصة لسحب المزيد من الجنسيات و لتعزيز مفهوم الشرق - غرب أردني...أو أعضاء مجالس ادارة الشركات و المنتفعين الذين سيتسلحوا بشرعية الشعب لتبرير السرقات و الفساد...علينا قبل أن نطالب بحكومة دستورية أن نثقف نفسنا ديمقراطيا و سياسيا بممارسة دور المعارضة...عندها و عندما يتطور مفهوم الحكم و الرقابة نستطيع أن نطمئن على مستقبل البلد بأيدي حكومة منتخبة...الوضع الحالي لا يسمح و الشعب فشل في اختبار الوحدة الوطنية في مباراة كرة قدم فما بالكم في انتخابات تفرز سلطة؟

عندما تتبلور لدينا الممارسة الديمقراطية التي تغلب المصلحة العليا مع تقبل الانتقادات تعالوا طالبوا بديمقراطية و حكومة منتخبة

أنا مع الحركة في محاربة الفساد و لكني أرفض الملكية الدستورية...القصر هو الوحيد الذي يقوم حاليا بدور الرقابة على تصرف الشخصيات العامة و ذات النفوذ و هو الوحيد القادر على الموازنة بين الأردنيين على اختلافهم...فنحن جميعنا لدينا انتماء أخر غير الأردن...العشيرة و الأصل...الملكية هي الطرف الوحيد المراعي للأطراف جميعها و هو القادر على ربط الأردنيين مهما اختلفوا على مفهوم الانتماء للوطن

بعدين المشكلة في شعبنا العربي أن الذي حركه ليس حركات سياسية ناضجة لديها برنامج واضح و تصور للمرحلة بعد تحقيق المطالب...مثلما حدث في مصر...تنحى الرئيس و الشعب لا يملك برنامج لإدارة المرحلة التالية...و الشعوب الأخرى خرجت أيضا بداعي ردة الفعل لما يحصل في تونس و مصر و ليست بدافع نضج سياسي...و الدليل على أنه حتى الهتافات كانت (ملطوشة) من تلك الثورات...الشع يريد اسقاط الرئيس.. و مصطلح البلطجية و الأجندات...يعني تقليد جعلني بصراحة أعزف عن مشاهدة الأخبار...جميل أن يكون لديك شعب مثقف و واعي و يعتصم و يتظاهر و لكن هل نحن من الضحالة السياسية لدرجة أننا لا نستطيع حتى أن نخرج بشعاراتنا و أهدافنا الخاصة؟

أنا مع مطالب الشعوب و لكن على الشعوب ان تؤمن بالديمقراطية شعارا و تطبيقا...وإلا فاننا نكون كمن أعطى السلاح للجاهل فقتل كل من حوله و انتحر

المشكلة في العلاقات الزوجية...2

بعد استعراض الأراء حول الخلافات الزوجية...اسمحولي أدلي بدلوي في الموضوع...

أنا هاي الأسباب استنتجتها من طريقة تعامل اصدقائنا من الجنسين مع أزواجهم...والحمدلله خلتني أقدر مرتي أكتر و أكتر...الله يخليلي اياها

من أسباب المشكلات المشتركة كان:

عدم الأستعداد للزواج:

المعظم بيحدد سن معين للزواج سواءا للشب أو البنت...خلص أذا وصل الانسان لهذا السن لازم يتجوز...هيك بيصير أحد الطرفين أو التنين غير ناضجين فكريا للزواج و غير مستوعبين الفكرة...أنا ضد وضع سن للعنوسة لأنه تأخير الزواج أحيانا بيكون مطلوب للبعض...ومع الزام الأزواج بدورات تدريبية على التعامل مع العلاقات الزوجية و الطرف التاني...مشان هيك بنشوف كتير حالات لعرسان جداد بيقولولك الزواج ربطة...الزواج مصاريف...الزواج خنقة و السبب انه ما كان مهيأ للتغيير الكبير اللي صار بحياته

التوقعات :

يعني كل واحد بيكون عنده تصورات عن العلاقة الزوجية .. هاي التصورات بتختلف في مصادرها من التلفزيون للكتب و المجلات والندوات...وأحيانا من الأسرةالأصلية للشخص...يعني, بيتجوز الواحد بيتوقع مرته تعامله مثل امه ...تغسل و تكوي و تطبخ و تعطيه كل وقتها و تسامحه اذا غلط و ما تسأله وين رايح ...و المرأه بتتوقع زجها متل أبوها...بيدللها و بيعطيها مصاري و بس و ما بيطلب منها تعمله أي شي...بالأخر بيصير الزوج اللي ما بيدلل مش رومنسي و ما بيحب مرته...واللي ما بيلبي كل طلباتها بخيل ... واللي ما بتطبخ و بتكوي و بتجلي بتكون (مش نافعة) و اللي ما بتسامحه على أخطاؤه و بتسأله بتكون مجنونه ...واللي ما بتسبه هيفا مش حلوة و اللي ما بيضحي مشان مرته زي بطل الفيلم الفلاني أو الرواية الفلانية مش رجال...واللي ما بيعرف أحلام مستغانمي ما بيفهم بالحب

القوالب الإجتماعية:

يعني الثوابت في مفاهيم الحياة الزوجية, مثل: الحماية بتكره الكنة, وأخت الزوج قوية, أصحاب الزوج العزابية فاسدين بالضرورة, زميلة زوجي بالعمل أكيد حاطه عينها عليه, الحامل لازم تتدلل, الخلفة لازم بعد لزواج على طول...العروس ما بيصير تشتغل بالبيت...هاذا الإشي بيعمل سوء فهم لكتير من المواقف ما بيكون اله داعي

الغيرة و حب التملك:

كتير من الأزواج فاهم العلاقة الزوجية على انها صيغة من صيغ التملك...الزوج بيغار على مرته فما بيخليها تطلع أو تحكي مع حدا...و الزوجة نفس الموضوع...ممنوع الزوج يطلع لوحده....بالنهاية بيصير ما في علاقات اجتماعية و التنين بيقعدوا بخلقة بعض 24 ساعة فما بيكون في أي أحداث جديدة أو موضوع ممكن حدا يحكيه للتاني...وهون بيصير الملل عنصر قاتل في العلاقة...

في نوع تاني من الغيرة خاص بالنساء فقط...وهيه ان الزوجة بتغار من حماتها و العكس كمان صحيح...وخدلك على جكر و نكد

تبادل الأدوار بشكل مخالف للطبيعة:

يعني طبيعي يكون في تقاسم للأدوار بالحياة الزوجية لكن المفروض توزيع الأدوار يكون حسب طبيعة كل واحد....الأسرة مثل الشركة تمام..ما بينفع يكون فيها أكتر من مدير (قبل ما يهجموا علي الصبايا أنا ما بحكي عن الإدارة المطلقة, بحكي عن ادارة يكون لكل واحد فيها دور واضح و فعال و تشاركي)ما بيصير الزوجة تلعب دور الرجل و العكس صحيح, و هادا بيننتج عنا واحدة من مشكلتين.. اما البيت حيكون بدون ادارة أو رح يكون في 2 مدراء و الحالتين رح ينتجوا فشل ذريع

الزن و تعباية الراس:

يعني أحيانا كتير بيكونوا الزوجين متفاهمين و متوصلين لأتفاق على أمور معينة...هون بيجي تدخل العالم...شو مرتك عم تخليك تجلي...مرتك منعتك تطلع..شو انتا خروف؟ مجنونة انتي ما تخليه يجيبلك هدية على عيد الشجرة؟!! لووول ...ما تعودي جوزك على هيك بكره بيركبك و شو انتي خدامة عنده و عند أهله و من هالحكي اللئيم اللي فيه الكتير من الأسفنة في العلاقات...و من استنتاجي بيكون الطرف المأسفن بيحاول يخلي كل الناس زيه...يعني المرأة اللي ما بتطبخ لزوجها بتنقهر لما مرة أي حدا بتطبخ...بتخاف من انه زوجها يبلش يقارن و بتحس حالها مقصرة...منشان هيك بتحاول انه الكل يصير متلها

انعدام الحوار:

طبعا لا يمكن يكون الزوجين متفاهمين و تفكيرهم متطابق 100% و هادا بيرجع لطبيعة التحديات اليومية...من هون نقاش المشكلات فورا من دون تأخير بيساعد على حلها قبل ما تكبر...وأحيانا بيوضح سوء تفاهم غير مقصود ممكن مع الزمن كان يعمل مشكلة...ونصيحة لا تناموا على زعل لأنه المشكلة (البايتة) حلها كتير أصعب من (الطازة) لووول..و مناقشة المشاكل أحيانا بتخلي الطرفين يتعرفوا على جوانب جديدة في تفكير الأخر و بالتالي ممكن اذا فهمت طبيعة التفكير معرفة سبب التصرف أو توقعه...وهذا بيجنبنا حدوث مشكلة ناتجة عن عدم فهم الطرف التاني وعدم القدرة على التنبؤ بتصرفات الشريك..طبعا الحوار بده عقول متفتحة و تفكير عقلاني و وفاء بالألتزامات المتفق عليها..

في النهاية أكيد هي مش كل الأسباب و أكيد مش كلها بتنطبق على جميع الأسر...و أكيد في أسباب غيرها

بتمنى للجميع حياة زوجية سعيدة

المشكلة في العلاقات الزوجية

بعد الخبرة البسيطة في الحياة الزوجية (الله يديمها علينا نعمة) و بعد تحليل عميق للعلاقات الزوجية لمن هم حولي و للمجتمع بشكل عام ...حاولت البحث عن أسباب عدم انسجام الأزواج مع بعضهم...مع العلم أن الزوج و الزوجة على الأغلب بيكونوا مناح و محترمين كل واحد لحاله بس لما يجتمعوا تحت عريشة الزوجية بيتحولوا لأشخاص تانيين

أنا عندي تحليل للمشكلة بس حابب أعرف رأيكم بالأول

ليش ممكن العلاقة الزوجية تنحرف عن المسار الطبيعي الهادي و تأخذ أشكال تتدرج في بشاعتها و أنحرافها عن ما كان متوقعا؟

ملاحظة: لن يتم نشر التعليقات الا يوم الخميس ان شاء الله حتى لا يكون هناك اراء متأثرة بأراء أخرى ... عشان الشفافية و مكافحة الفساد :]

فاقد الشيء لا يعطيه

رسالة الى الشعوب التي طالبت بالتغيير...رسالة الى كل الكتاب و الصحفيين و المدونين..رسالة الى المحللين و المنظرين...رسالة الى من استفاق من نومه و ألبس نفسه صفة الوطنية و نزعها عن غيره...رسالة لمن لبس تاج المعرفة و الحكمة السياسية و أعلن أنه رسول الحرية...لمن أعطى نفسه صفة العصمة...الى كل انسان

القاعدة الأولى للديمقراطية...اذا لم يكن لديك استعداد لتقبل رأي الأخر فأنت لا تختلف عن أي دكتاتور لعنته سابقا

و اذا لم تقبل العمل بالديمقراطية فلا تطالب بها لأنك أول عدو لها

اذا لم يعجبك رأيي فأنت حر...أما أن تسخر مني و تنعتني بالعميل و تحاول أن تسكتني...فاعلم أني سوف أثور على ثورتك قريبا

قريبا جدا..

لو كنت رئيسا مكلّفا... الجزء الثاني

سكرت التليفون مع صاحبنا في الديوان...أخدت معي عدة تشكيل الوزارة...كاسة قهوة لاب توب و شوية ورق للخرابيش و قعدت عالبرندة

قلت خلينا نبسط الأمور...الموضوع مثل تشكيل فريق كرة قدم...لاعبين و خطة و بعدين بيبلش الشغل, أصلا همه بيسموه الفريق الوزاري (أخ بس لو معي رقم عدنان حمد)

طيب خلينا نشوف مراكز الفريق, أو الوزارات...عنا الدفاع و المالية و الداخلية و الخارجية و الاعلام ...شو في كمان؟

بحبشت عالنت عن الوزارات اللي نسيتها...يااا باااييييييييييي....طلع عنا 25 وزير...من وين بدي أجيبهم هدول؟طيب ليش أصلا في 25 وزارة؟ والله الموضوع بده شغل

فكرت أستعين بمهارة (الشف) اللي كنا نستعملها بشف التقارير أيام الجامعة...بشوف أسماء الوزراء بأخر 5 وزارات و اللي بيتكرروا بجيبهم و الباقي بيتدبر...بعدين قلت لأ...لوكانت الأسماء القديمة نافعة ما كانوا جابوا واحد زيي ما حدا بيعرفه مشان يشكل وزارة...معناها المطلوب همه أصحاب الكفاءات فعلا...وبما إنه الكفاءات اللي بالأردن عم بتهاجر فقررت انه الوزراء لأول مرة يكونوا من المغتربين...ليش لأ؟ والله في ناس ناجحين كتير و ماسكين شركات كبيرة كتير و أصحاب شركات بالملايين...والإدارة من حيث المبدأ واحدة...من ادارة شركة بسيطة لأدارة بلد...و أكيد هدول أول ناس الهم مصلحة انه البلد يتحسن مشان يقدروا يرجعوا و يعيشوا حياتهم بالأردن

عملت بحث عن أصحاب الشركات و المدراء الناجحين و حتى أصحاب قصص النجاح و حضرت قائمة و قررت أنطلق من السبت

طلعت السبت على شركة و طلبت مقابلة صاحب الشركة

أنا: السلام عليكم بدي أقابل السيد فلان

السكرتير: فلان فلان ؟ صاحب الشركة؟

أنا : أيوه

السكرتير مع انتسامه سقعة: و مين حضرتك

أنا: رئيس الوزراء الأردني

السكرتير(محشش): طيب لحظة...رن عالمدير و قله رئيس الوزراء الأردني بده يقابلك

المدير: مين يا خوي؟ قله مشغول؟ معاه تلفون من المرحوم جمال عبد الناصر...أنا فاضي للمسخرة؟

قلتله يا أخي زي ما بقلك...لو سمحت أنا بدي نص ساعة من وقتك مش أكتر

قال طيب أعطيني 5 دقايق

المهم دخلت عنده:عرفته عن حالي و ورجيته نسخة من خطاب التكليف...اعتذر عن سوء التفاهم و قال تفضل بشو بقدر أخدمك؟

قلتله أنا حابب انه استعين بالخبرات الأردنية اللي بره و أشوف شو في نصائح

قلي اسمع: أنا لو الموضوع بايدي...كان خليت 5 وزارات...الداخلية و الخارجية و المالية و الاعلام و الدفاع و الباقي بعين الهم وزير واحد بس يقوم فيهم كلهم لأنه ما الهم داعي..أصلا وكيل الوزارة هوه اللي بيشتغل كل الشغل...هيك بتكون قللت المصاريف و وجع الراس...و كل وزير بتقعد معه يوم كامل بتوجهه

أنا: معك 100% بس هاد الحكي ما بينفع و انتا عارف

المدير: قال طيب...هدول الوزارات الخمسة اللي فوق تشاور مع جلالته فيهم هوه بيفيدك أكتر واحد

أنا: و الباقي؟

المدير: لا تخاف: انتا بس افتح تلفونك...رح يجيك تلفون من شيوخ العشاير كل عشيرة بدها حصة...بساعة بيكون كل الوزارات تعبّت عندك

أنا: طيب و اللي ما اله عشيرة شو مين بيمثله

المدير: اله رب العالمين...

أنا: طيب حضرتك ما بدك تصير وزير؟

المدير: لأ... شو بدي بهالشغلة....إرضاء الناس غاية لا تدرك...خليني هون بحالي أحسن...بكره اذا صرت وزير بيصير الكل يقولك فلان عمل و فلان سوى...بيشرشحونا بالجرايد لأنه احنا متعودين عالنقد وبس...وأي قرش بيجيني من شغلي هون رح يقولوا أبصر من وين جابه...شو بدي بهالشغلة

رجعت عالبيت...أكتر من 50 تلفون بالساعة الكل بيطلب وسايط...العشائر و الأحزاب و النقابات و التيارات...حلقتلهم كلهم عالناعم و قررت أخد قيلولة

صحيت و فتحت الجرايد لقيت بيان استنكار من الإخوان المسلمين لاختياري لأني محسوب على العلمانيين...و استنكار من اليساريين لأني محسوب على المتشددين...و استنكار من العشاير لأني مش ابن عشاير ومش معروف قرعة أبوي من وين...و استنكار من المتقاعدين العسكريين لأني مش عسكري...و استنكار من رجال الأعمال لأني كادح و لا أنتمي لطبقة رجال الأعمال... و استنكار من نقيب النهندسين لأني مش دافع رسوم النقاية و استنكار من الدكنجي اللي جنب بيتنا لأني ما بشتري من عنده و استنكار من أخوي لأني ما دبرتله شغل بالخليج ... الوحيد اللي ما استنكر هوه ابن العشيرة الأكبر من كل العشائر...وابن الحزب الأكبر من كل الأحزاب...عشيرة المواطن العادي اللي بده مصلحة البلد...وحزب المواطن الأردني من شنى الأصول و المنابت ... مسيحي كان أو مسلم...شرق أردني أو غرب أردني...شمالات أو من الجنوب...فلاح أو مدني...عامل أو صاحب عمل

بيني و بينكم ... منيح انه طلع الموضوع كله تخيلات