ضاق خلقي يا صبي ... من هالشعب العربي

صباح الخير عليكم

في شغلة ملاحظها من فترة و بتمغصني ...أنه الشعب العربي مستحي من عروبته...ما بعرف بس هيك الكل بدويصير زي الأجانب و بيقلدهم بكل شي

يعني الأغاني اللي عالتلفزيون صارت زي كليبات الاغاني الاجنبية

والأفلام العربية بتصورنا كأنه احنا عايشين زي الأمريكان

البنات و الشباب بدهم أعراسهم بصرعات غريبة عمرنا ما كنا نسمع عنها

الناس بتاخد أفكار كتير سيئة و أبدا ما يتناسبنا بس لأنه هيك الغربيين بيتصرفوا

الأهل بطلوا يحطوا أولادهم الا بمدارس أجنبية...لأنه العربية ما بتنفع

الولد بيكون لسا ما بيحكي بتصير الأم تحكي معه انجليزي لأنه اللغة العربية (حفرتلية كتير) طبعا الله لا يورجيكم انجليزيات الأم كيف بتكون أصلا .. بالاخر بطلع الولد مشطوب عربي و انجليزي...أنا مرت خالي فرنسية و هيه مدرسة فرنسي بالجامعة, كانت ترفض تعلم أولادها الفرنسي لغاية ما يصير عمره سبع سنين...لأنه مخارج الحروف العربية صعبة و بدها الولد يتقنها منيح بدون ما يصير عنده تشويش من اللغة الفرنسية

الواحد بيكون قاعد بين أصحابه و كلهم مواليد و تربية عمان (بديش أحكي وين كمان لأنه كل الناس خير و بركة) و بتلاقيه صار يدحش كلمات انجليزي دحش بالكلام...وطبعا كله من اللي بيسمعه من الافلام (تذكرت فيلم كده رضا و الأخ اللي من هاي النوعية لما قال لحبيبته Happy F***en Valentines Day)

بيصير موقف معين بتلاقي الشباب بلشت ... العرب متخلفين...عربي شو بتتوقع منه و من هالحكي

اشي بيعصب صراحة...أصلا العرب همه أساس الحضارة اللي عم يتمتع فيها الغرب...واللي مش مصدق يشوف قصر الحمرا بالأندلس كيف كانت قصور العرب في وقت كان الغرب عايش ببيوت طين ... وكل الأكتشافات العظيمة اللي اكتشفها العرب في وقت الغرب كان بيفكر انه الشمس بتدور حول الأرض

بلاش...أصلا اللغة العربية كتير أحلى من أي لغة تانية...الشعر و النثر فيه منهم نصوص فعلا بتوصلك لحالة من النشوة و انتا بتقرأهم لأن الكلام وصل بطريقة كتير حلوة و معبّرة

بعدين ليش اللعة العربية صارت عيب...مع أنه القران الكريم نزل بالعربية..وما في أي كتاب سماوي تاني نزل بالانجليزية أو الفرنسية

كمان ليش أنتا بدك العرب يفيدوك؟ليش حضرتك بشو نفعت العرب أو حتى اللغة العربية؟

ليش الألماني مثلا عنده اعتزاز بلغته و حضارته و بيرفض حتى يتعلم أو يحكي بلغة تانية مع أنه كتير منهم بيحكي انجليزي منيح...

الموضوع أنا بختصره دايما بسبب التفاهة و ضعف الشخصية فبنحاول دايما ننسب حالنا لناس أحسن منا بدل ما نصير أحسن منهم

وبالاخر طبعا ما رح تصير زيهم و لا همه رح يقبلوا انهم يعاملوك كواحد منهم...لأن اللي بيتخلى عن شخصيته و هويته لا يستحق انه يصير واحد منهم...وبصراحة معهم حق

بعتذر من فيروز لأني لعبت بكلمات أغنيتها في العنوان...هي الأغنية الأصلية مشان صباحكم يحلى مع فيروز

For one more day

العنوان لكتاب للمؤلف ميتش ألبوم...اشتريته من اسبوعين...بيحكي عن رجل فقد امه من 8 سنوات...وشوي شوي وصلت حياته للحضيض...أدمن شرب الكحول...ترك عائلته و وظيفته...حتى بنته بعدت عنه و ما عزمته على عرسها...حس أن حياته وصلت للحضيض و قرر ينتحر...و هو في طريقة بيعمل حادث و بيفقد الوعي...وبيلتقي بأمه اللي بتمضي معه يوم كامل...بيصير خلاله بيتذكر بعض المواقف اللي كانت تصير مع امه و أبوه...

الكتاب فيه مواقف حلوة و ذكريات يمكن تكون حصلت معنا و للأسف فيه الكثير من المواقف اللي كمان ممكن نكون عملناها بدون ما نحس ...وكيف أن الانسان دائما معه وقت يحسن علاقته مع أهله بس ما بيعرف هالشي الا بعد فوات الاوان...وفي كمان فلسفة حلوة عن الحياة

هاد ملخص بسيط للكتاب عشان اللي حابب يقرأه...بس أنا اللي لفتني عنوان الكتاب...مين الشخص اللي بتتمنى لو تقدر تقعد معاه لو يوم واحد بس؟وشو رح يعمل هاليوم اختلاف بحياتك؟

شدوا الحزام

صباح الخير عليكم جميعا...

أنا اسف صرلي فترة غايب بس الشغل ضاغط هاليومين و يادوب قادر أقرأ مدونات بس ما عم أقدر أكتب شي...بس اليوم قرأت تصريح بجريدة الدستور من وزير الأعلام الدكتور نبيل الشريف استفزني...هذا نص التصريح كما ورد في الدستور:

(وقال الدكتور نبيل الشريف وزير الدولة لشؤون الاتصال ولاعلام في تصريحات صحفية بعد جلسة مجلس الوزراء ان الحكومة لن تستطيع الإستمرار في نفس طريقة العمل التي درجنا عليها مطولا وتصرفنا على ان لا شيء يحدث معلنا ان الدين العام وصل الى 11 مليار دينار وعجز الموازنة غير مسبوق لذلك نحن لا نستطيع ان نتصرف على ان الامور كلها على ما يرام.
وقال ان الحكومة بدأت باجراءات تقشفية بنفسها وتتوقع من الجميع ان تتحمل هذه الاعباء تحقيقا لمصلحة الوطن..) انتهى الاقتباس

الوزير قاعد ببهدلنا و بيقولنا بطلوا دلع و غنوجة بدنا نزبط الميزانية...والله انه احنا ما بنستحي فعلا...اتارينا احنا السبب في الديون اللي عالأردن و احنا يا حرام بنتهم الحكومة انها السبب...يا عيب الشوم علينا...يالله كل واحد يضرب حاله 100 كف عقاب...بسرعة

أنا بس بدي أسأل كم سؤال خبيثات:

- كم راتبك يا باشا انتا و الباشاوات اللي كانوا مجتمعين...وكم سيارة بتخدم كل وزير و عائلته؟

- ليش الك راتب تقاعدي بعد ما تبطل وزير يستمر مدى الحياة مع انك يمكن ما تشغل المنصب الا كم سنة بس؟

- ليش كنت ساكت لما الاعلام كان يقول انه الاقتصاد الاردني ما تأثر مع انك كنت ناطق باسم حكومة سابقة و رئيس تحرير جريدة رسمية؟

- ليش ما حدا تكرم و شرحلنا كيف ممكن الموشر الاقتصادي يكون عم يرتفع مع انه الشعب عم ياكل هوا أكتر و أكتر؟

- وين عائدات المشاريع الكبيرة و قوانين تشجيع الاستثمار ودينار الجامعة و غيره؟

- ليش الدين العام زاد بس البنية التحتية عم ترجع لورا؟

- ليش الضرايب كتيرة على كل شي بس طعام القطط و الكلاب مثلا ما عليها ضريبة؟ليش جمرك السيارات الكبيرة أرخص من العادية؟ مين مستفيد من هالحكي؟

يعني عم نخفف الضرايب على اللي معهم مصاري مع انه هم اللي مفروض يسدوا عنا...وعم تزيدها عاللي منفوخ من كتر ما هو ماكل هوا؟

أنا بقول خلي الحزام زي ما هو...وجيب واحد كفؤ...واعطيه صلاحيات يوقف الهدر اللي عم بيصير و الواسطات و المحسوبيات و سوء استغلال المناصب رح تلاقي وضعنا صار ممتاز بدون شد أحزمة

يا سيدي بلاش...أصلا انا شو بيفهمني بهالحكي...أكيد انتوا بتعرفوا أكتر مني...بس بدي منك شغلة..لو شدينا الحزام ايمتى رح نفكه؟يعني أكيد انتوا عاملين دراسة للموضوع,صح؟

أقولك...خد نص راتبنا لمدة سنتين بس بعدها اضمن انه الدين العام رح ينقص..أو حتى انشالله يضل زي ما هو و ما يزيد...اتفقنا؟

والله انا زهقت من هالكلام و شايف ما في منه فايدة...يعني كل ما زادت الضرايب زاد الدين العام...كيف هاي صارت؟؟

مشان الله حدا يفهمني

ما هي الوطنية؟

مقال أكثر من رائع للكاتب أحمد حسن الزعبي...يعني هاد الكلام هالكني من زمان و ما كنتش عارف أعبر عنه بطريقة ما تزعل حدا و بطريقة أقدر أوصل اني ما بنتقص من أهمية الوطنية و الانتماء للبلد...بس المظاهر اللي صرنا نعبر فيها عن انتماءنا هي بتبعدنا أكتر عن الوطنية...أجا أبو الزعبي و حكى كل اللي بقلبي بطريقة كتير حلوة

ما هي الوطنية؟ بالتزامن مع كل مناسبة أردنية.. تنتج عشرات الأغاني (الوطنية)- وقبل أن أسهب في الكلام - أنا مضطر لوضع كلمة (وطنية) بين قوسين، لأن غالبيتها لحن وكلام وأداء أقل بكثير مما يستحقه هذا الوطن العظيم.. قلت ننتج عشرات الأغاني يتنافس على أدائها عشرات المطربين.. تكلف عشرات الآلاف من الدنانير وليس هذا المهم، المهم أن هذه (القرقعة)مدفوعة الثمن والزمن.. لا تترك بصمة حقيقية واحدة على مستوى الغناء.. أو تحرّك (سي سي) واحد من مستوى حب الوطن... *** بالأمس، استعنت (بالجوجل) في محاولة فضولية لمعرفة ما هي الكلمات التي تحملها معظم أغانينا الوطنية . .فوجدت ان 99% من الأغاني المنتجة.. لا بد ان تحمل بعض هذه المفردات: (حماك..سماك..هواك..عداك..وراك..فداك..بلدي..ولدي..سندي..زندي...بعون الله..النصر من الله.. جنود ...زنود.. خدود..حدود.. اسود..خندق..طقطق.نعشق..تخردق..تشردق.. المنية ..الردية.. الأردنية..لدوا عليّه... كحل العين..عالجنبين..مرحبتين..والله وأهلين...الخ)..أتحدّاكم ان جئتم بأغنية واحدة لا تحمل أياً من هذه الكلمات أو مرادفاتها... بالمقابل استعنت بخبراء الموسيقى لأتعرف أكثر على جهد ملحني هذه الأغاني ..فوجدنا أن جلّ ألحان هذه الأغاني ان لم يكن كلها : هي ألحان مسروقة من أغانٍ تراثية وشعبية معروفة او من ألحان قديمة لفنانين أردنيين وعرب كبار ... طيب، اذا كانت كلماتها مطروقة وألحانها مسروقة، ماذا تبقى اذن من هذه الأغاني لننعتها (بالوطنية)؟.. *** مسألة أخرى : هل الوطنية أغانٍ وزغاريت وطبل ومجوز وحسب؟ هل الوطنية.. علم على المرآة .. وشعار في ميدالية؟..اليست الوطنية أن تسند وردة في رصيف..وأن تزيل الأذى عن وجه بلدك ..كما تمسح القذى عن عين طفلك.. أليست الوطنية أن تؤدي واجبك.. ثم، ما فائدة أن تحفظ ألف أغنية عن الوطنية والانتماء..وأنت تسرق - من وطنك- الكهرباء؟. *** أعود مرة أخرى للغناء كواحدة من نماذج التظاهر بالوطنية : ترى ماذا لو أعيد تطبيق نظام خدمة العلم الآن؟.. أنا متأكد أن معظم المطربين والملحنين وكتاب الكلمات وضباط الايقاع و(دقيقي) الشبّيبة وعناصر الدبكة والمنتجين والمصفقين. .سيقفون على باب مكتب (الإعفاء) ليفصحوا عن معلوليات مزيفة.. كرمة العلي ..سايق عليك الله تغطيني. أحمد حسن الزعبي