الأربعاء، 30 ديسمبر 2009

يومي باختصار

التهاب حاد بالجيوب الانفيه نتج عنه وجع راس مخليني افكر اجيب مفك أغزّه براسي...و عيوني حمرا والشرر بيطق منها فالكل متجنبني
وصراع مع حالي اخد حبة Panadol Sinus ولا أصمد كوني ما بحب الدوا
هادا غير اني ما نمت منيح امبارح و حاسس رح افقد وعيي من النعس و قلة النوم
عندي شغل متلتل و مش عارف كيف بدو يخلص و أنا بهالحالة...فقررت أعطي حالي نص اجازة مرضية...يعني ما بروح, بضل بالدوام بس ما بشتغل اشي لأني مش قادر و مش طايق...قررت أقضي اليوم عال Facebook و لأجل الصدف السعيدة اليوم خربان
فهيني قاعد عم بقاوم النوم...وهاي شغلة كتير صعبة صدقوني...و منيح انه الكل حاسسني اليوم مقبعة معي فعم يتجنبوني
الله يمضي هاليوم على خير
سلام

الثلاثاء، 29 ديسمبر 2009

ما بتروح الا عالمنيح

كيفكم؟
اليوم كان عنا presentation بشركة أرامكو...و لأني جديد بالشركة أخدوني مستمع بس و ما خلوني أشارك فيه
قعدنا والله...و بلشوا الشباب يحكو...أنا انصدمت...الشباب بلشت تعطي ألوان و عرقوا...والانجليزي صار يوناني
و المفروض عم نشرح لمهندسين بس عم نشرح كأنهم أطفال...باختصار اشي بيخزي صراحة
طيب ليش أنا ما شاركت بالموضوع...مش فلسفة ولا استعراض عضلات...بس منطقيا أنا الوحيد عندي خبرة مبيعات و تسويق بالاضافة لشهادة الهندسة...ليش ما اخدوا رأيي عالأقل؟
ببساطة لأني ما بحشر حالي و لأني مسالم و مسكين و بخجل...
بتلاقي ناس عندهم مؤهلات أقل و عم ياخدوا امتيازات أكتر...بس لأنهم كتيرين غلبة و حكي
طيب أنا ما بقدر أصير مقرف زيهم...وبخجل أطلب اشي الي...حتى الزيادة السنوية بعمري ما ناقشت فيها
ليش هيك احنا بنحب اللي بضحك علينا و اللي بيدّعي أشياء مش موجودة فيه؟
ليش المقرف و الغلباوي بنعطيه حقه و المسكين اللي ما بيحكي بناكله
يا ترى العيب من مين؟مني أنا اني بسكت و لا بالناس اللي بتسيء التقدير؟
هل لازم أتغير و أصير انسان وقح و حشري ومسّيح جوخ ممتاز مشان أتطور و اخد حقي؟
أو لازم أهتم برأي الناس فيي و أضل ساكت مشان أضل الموظف الادمي المحترم اللي ما بيغلّب؟
والله اشي بيقهر

الأحد، 27 ديسمبر 2009

الى غزة في ذكرى العدوان

لأن الكلام لن يستطيع أن يعبر...ولأن كلماتنا لن تكفي أن نعتذر
أقل ما يمكننا أن نفعله هو...أن نتذكر
فان نسينا سنصبح شركاء في العدوان...لأن التذكر هو أضعف الايمان
في ذكرى العدوان يأتي عدوان اخر من مصر...هي نفسها اللي (حردت) عندما اتهمناها بأنها طرف في الحرب
لم تستطع الشقيقة الكبرى أن تتركنا ننسى ... فها هي تبني جدارا لتحمي اليهود و تحمي موتنا البطيء
ربما الخنوع و الاستسلام انساهم بان أهل غزة هم من يصنعون الحياة بأيديهم...و عندما يموتون يموتون ليعطوا الحياة لمن بعدهم
يريدون جدارا يطفئ نور العزة و الكرامة وهم ان شاء الله لن يزيدوها الا اتقادا
لك الله يا غزة...وكفى

الجمعة، 25 ديسمبر 2009

Merry Christmas and Happy New year

اليوم الجمعة...ملل ملل ملل
فتحت ال Facebook كان مليان تهاني لأخواننا و أصدقائنا المسيحيين
أنا فقدت الاحساس بأي عيد من فترة لأمه العيد هوه نفسه فقد كتير من معانيه
صراحة كل الأعياد صارت بتعمل نتيجة عكس معناها...يعني صار النا قرايب ما نشوفهم الا من العيد للعيد بس لأنه مش ضروري نعمل صلة رحم ...وما بنتذكر نقول لأمهاتنا الله يعطيكي العافية الا بعيد الام...و الحب بين الرجل و مرته صار بس بعيد الحب
أنا كمان شايف انه ما في شي حوالينا بيستاهل نعيد مشانه...أوضاع العراق و غزة و غيره كتير بتخلي الواحد يخجل انه يفرح
بس امبارح شفت منظر الاطفال ببيت لحم عم يحتفلوا و من غزة و العراق بعيد المسلمين الاطفال و الناس مبسوطين رغم الحصار و الاحتلال...بتحس اديش الانسان جبار و اديش بنقدر نخلق الفرح من وسط الحزن
لازم نضل نفرح مهما صار و نضل ندور عالامل لو كان على ضوء شمعة
بس الاهم ما ننسى اخواننا في فلسطين و العراق و في كل مكان
كل عام و انتم بخير
هي الاغنية عجبتني و بتشرح اخر نقطة حكيتها

الثلاثاء، 22 ديسمبر 2009

قوم عندك دوام

صباح الخير..
يمكن اليوم أول مرة بصحى نعسان لهالدرجة...أصلا أنا مش كتير متأكد اذا صحيت ولا لأ
يا ترى ممكن الواحد يشبع نوم؟
ليش لازم نصحى كل يوم عالدوام بدري؟
كنت اسمع عن اصحاب الي انه دوامهم مريح...يعني بيروح ايمتى ما بدو بس المهم يداوم 42 ساعة بالاسبوع..يعني كل واحد ملك نفسه
يا الله شو كنت احسدهم...و أضل أفكر ليش أنا حظي هيك؟
و مرة قدمت على شغل بالسعودية كانت المكتب هوه البيت...تعني ممكن أداوم بالبيجاما أو يحكي معي زبون أقوله اسف ما سمعت تلفونك كنت بتحمم...والله الفكرة كانت عاجبتني...بس انا بطبعي بحسبها كتير فما وافقت
الخلاصة انه لا يمكن تحس حالك شبعت نوم...من أيام المدرسة لأيام الجامعة و الشغل كان الوالد يصحينا بكير
بكير زيادة شوي...لأنه برأيه مش لازم البني ادم يصحى على دوامه فورا...و كان من أنصار اطلع ابكر ما بتعرف شو بيصير معك عالطريق
بعدين رحت على دبي و صار الواحد لحاله يعني خلص رح اشبع نوم و أخيرا...بس على مين يا معلم..اذا ما بتصحى بكير رح تعلق بالازمة
وهلأ اجيت عالسعودية بلد الكسل و النوم...محسوبكم تجوز و من يومها نسيت النوم و أحلامه...لأنه زوجتي الله يخليها فوق راسي ما بيحلالها الحكي الا وقت النوم...و طبعا هيه نايمة منيح و انا بالشغل
حاسس الموضوع تافه بس هادا اكتر شي ممكن يطلع معي و انا بهيك حالة
و بدي أفش غلي ... بدي أنااااااااااااام
سلام

الاثنين، 21 ديسمبر 2009

قول للزمان ارجع يا زمان

صباح الخير...
ما بعرف ليش خطرت على بالي الاغنية اليوم الصبح مع انه مش وقت أم كلثوم أبدا
يمكن لأني لسبب من الاسباب امبارح عملت جردة لحياتي و كان نفس أغير أشياء معينة فيها...
بالمجمل كنت راضي عن حياتي...بس كنت أتخيل لو قدرت أغير أشياء معينة شو كان رح يصير؟
ليش اختراع الة الزمن ما نجح؟
يا ترى في وقت اتدارك اللي راح والا خلص ؟
هل هذا كافي يعطينا حافز نخلي قيمة حياتنا أكبر و نفكر 100 مرة قبل ما ناخد قرار؟
هل من العدل انك تكون في مرحلة انه لازم تاخد قرار يمكن يغير حياتك مع انه عالأغلب ما بيكون عندك خبرة حتى تاخد قرار صح؟
يا ترى لو الانسان كان يعرف قديش معه وقت بهالدنيا كان رتّب حياته بصورة أحسن؟
ما بعرف بصراحة...اللي بعرفه انه في تغيير كبير في أسلوب حياتي لازم يصير...وقريبا انشالله
لو اجت فرصة ترجع بالزمن...شو بتغير بحياتك؟

الأحد، 20 ديسمبر 2009

هل نحن مفصومون؟

قبل أيام كان لازم أطلع على مطار الدمام...و بما اني جديد بالبلد طلبت سواق من الشركة يروح معي عشان يدلني عالطريق...
قام المهندس المسؤول قلي أوكي...اطلع انتا بسيارتك و الشوفير بسيارة...قلتله ليش يعني نطلع بسيارتين اذا رايحين و راجعين سوا...
قال كيف بدك تقعدو هاد بسيارتك...قلتلوا عادي يا بشمهندس كلنا اولاد تسعة...قال زي ما بدك بس انا عشانك
انا اللي صدمني انه المسؤول متدين كتير...طيب هو الدين بيقولنا نعمل هيك؟
ليش نروح بعيد...أنا نفسي دايما بدافع بشراسة عن الدين الاسلامي و لهلأ ما عم ألتزم بصلاتي منيح
و بس أروح البيت ألاقي حد صافف باب العمارة و هو مش من سكانها بعصب...
بالمقابل اذا رجعت بالليل و ما لقيت صفة بتسلبط على أي بناية تانية و بصف عندها
السؤال اللي شاغل بالي هو...هل نحن مفصومون؟؟
هل احنا بنحب انتقاد العالم لمجرد الانتقاد و اذا مرينا بنفس الموقف رح نتصرف بنفس الطريقة؟
جاوبوني يا جماعة...يا ترى احنا مفصومين؟؟؟
و صباح الخير

السبت، 19 ديسمبر 2009

صباح فيروزي

صباح الخير

بما انه يوم السبت الواحد بيقوم على دوامه بالعافية...و بيكون نعسان و حاسس انه مش فاهم اشي...الشي الوحيد اللي ممكن الواحد يحكيه أو يستوعبه هو صوت فيروز...حبيت أشارككم بهالاغنية...كان نفسي أحطلكم اياها فيديو أو حتى أوديو بس صراحة ما بعرف كيف

في قهوة ع المفرق في موقده وفي نار
نبقى انا وحبيبي نفرشها بالاسرار

جيت لقيت فيها عشاق اتنين زغار
قعدو على مقاعدنا سرقو منا المشوار

يا ورق الاصفر عم تكبر عم تكبر
الطرقات البيوت عم تكبر عم تكبر
بتخلص الدني وما في غيرك يا وطني
بتضلك طفل زغير



متل السهم الراجع من سفر الزمان
قطعت الشوارع ماضحكلي انسان

كل صحابي كبرو وتغير اللي كان
صارو العمر الماضي صارو دهب النسيان
يا ورق الاصفر عم تكبر عم تكبر
الطرقات البيوت عم تكبر عم تكبر
بتخلص الدني وما في غيرك يا وطني
بتضلك طفل زغير



الخميس، 17 ديسمبر 2009

So you think you can Blog?!!

كيفكم؟ من زمان كنت مقرر ابدأ التدوين و خلص كتير كنت متحمس...بس فكرة انه ما حد رح يقرأ اللي عم بكتبه و اني رح أكون بحكي مع حالي و زي الاهبل خلتني أتراجع....نقلت على شغل جديد و الوضع رااااااايق...السعودية بلد بطيء و بالنسبة لواحد كان بدبي الوضع شبه ميت...هيك صار عندي وقت أقرأ مدونات ... و من مدونة لمدونة حسيت حالي رجعت دخلت بالجو و تحمست... و حمستني Whisper كمان اللي يا ريت تقبل اني اسميها صديقتي الجديدة...وانشالله خير...

يالله انا بدي اروح لأنه على غير العادة صار عندي شغل...بس النا قعدة ثانية قريبا...قولوا انشالله

سلام