الطالب المسكين و المعلمة المتوحشة.... The student and the beast

طبعا أكيد شفتوا الفيديو للطالب المسكين اللي بيتعرض للإضطهاد من معلمته

أنا كنت حاسس انه في اشي خطأ بالفيديو و ما كنت قادر أفهمه...يعني معقول واحد بيرتكب جريمة بيصور حاله؟ وليش هالإهتمام الغريب

خصوصا أنه معروف أنه موضوع زي هيك رح يحرك الرأي العام؟

عن جد الموضوع ضل مجنني لحد اليوم الصبح و قرأت مقالة للأستاذ شرف أبو رمان

فعلا هاد تفسير منطقي جدا...ليش الأن بالذات طلع الفيديو...مش أول مرة بتحصل اساءة لطالب... و الطالب اللي فقد عينه قبل فترة أعتقد خسارته أكبر من المسكين اللي فوق فليش صار التضخيم لهالحادثة بالذات؟

أنا مش من أنصار نظرية المؤامرة بس أعتقد أن التوقيت و الطريقة و المحتوى كان مدروس و مقصود لضرب التعاطف الشعبي مع قضية نقابة المعلمين...لأنه في ظل تحرك الشارع الأخير ضد الحكومة و التحرك الجدي للمعلمين المطالبين بنقابة لا أعتقد أن أي (زلمة ابن زلمة) كان سيخرج و يصرح أي تصريح ضد النقابة

الموضوع في عبرتين...لا شيء من حولنا بيصير لله...فكر في الأسباب و الدوافع و التوقيت و من الطرف المستفيد...حتى لا تكون (خروفا) تساق لتحقيق أهداف ناس معينة....العبرة الثانية انه اعلامنا (أهبل) و بس بده ينتقد الحكومة (أو يفرجي حاله انه معارض) في حين أنه عبارة عن حجر شطرنج مش أكتر أو عالأقل (مش عارف وين الله حاطّه)

بس ملاحظه عالهامش...في الخبر (واشار الى انه فور التبليغ قام بالتدقيق بالفيديو والاستماع الى اللهجة واللكنة التي تتحدث بها المعلمة ومن ثم حصر عدد من المدارس الـ"50" المختلطة في المديرية التي تتوفر فيها خزائن بالوان محددة والواح نظيفة وطاولات مستديرة وعددها 3 مدارس تتوفر فيها هذه الطاولات)... 50 مدرسة ما فيها إلا 3 بس بطاولات جديدة و ألواح نظيفة...و مدير التربية نافش ريشه أنه هو اللي كشف المعلمة...أي روح زبط البلاوي اللي عندك بعدين بتلعب دور كونان

اذا كنا سنتكلم عن مشاكل التعليم...فالموضوع أكبر من طالب (أكل كتلة) إقرأوا هالمقال لو سمحتوا

خذوا الحكمة من أفواه ... الأمريكيين

هذا الأسبوع كنت امارس عادتي اليومية بتقليب قنوات التلفزيون فوقعت عيني على سيدة أمريكية معروفة كنت قد منعت نفسي من رؤية (سحنتها) لفترة... هيلاري كلنتون

كانت الاستضافة ضمن برنامج كلام نواعم...و هو البرنامج الذي يدس كثيرا من (السخام) المنمق في عقول نسائنا

ويساعد على تحرير المرأة من ظلم المجتمع لتقع ضمن عبودية (سخافتها)...

المهم...ليس البرنامج هو ما أريد انتقاده بقدر ما هو نظرتنا للغرب بشكل عام و الأمريكان بشكل خاص على أنهم المخلصون و القدوة

ابتسامات الحضور كانت (من الذان للذان) و هي تشرح نظرتها للمرأة العربية في المستقبل و كيف أنها تريد جعل نساءنا قادة...لم يغظني كلامها فرأيها معروف و لكن تلك النظرات على الوجوه التي تظنها ستبكي من الفرحة لرؤيتها و سماعها تشجع نساءنا

في مشواري اليومي أضطر لمقاومة رغبتي في ضرب رجل الأمن الذي يصب سيول (سقاعة وجهه) علي بينما أكاد أشعر أنه سيقبل يد الأمريكي الذي يقود سيارته أمامي لتكرمه بالمرور عليه

حتى موظفو المحلات التجارية يكادون يحملون الأجانب عن الأرض حملاو فجأة في أقل من أجزاء الثانية يتأبطون شرا لمجرد رؤية أي زبون عربي

نريد أن نقلد الأجانب في كل الأشياء حتى السيئة منها...المهم أنها من عندهم و بالتالي من المؤكد أمها أحسن مما لدينا

نريد أن نربي أولادنا على اتقان لغتهم حتى قبل أن يتقن الأولاد لغتنا

نريد أن نصبح مثلهم في كل شيء...أو على الأقل أن نشبههم...

سنحبهم حتى لو لم يحبونا

سنخلع عاداتنا عند عتبة أبوابهم و نلبس ما يرضونه لنا

سنشتم أنفسنا و اباءنا

سنلعن سنسفيل حالنا اذا أرادوا...بس مشان الله يرضوا علينا

بين العلم و الحضارة

صباح الخير...

حدث معي موقف الأسبوع الماضي كان فيه كتير من الأمور المزعجة اللي بتوضح ليش احنا شعوب متعلمة و لكننا بعيدين عن أن نكون شعوب متحضرة...أنا دايما بميل للنقد بس بتزيد حدة انتقادي للأشخاص المتعلمين أكثر لأنه المفروض أن العلم نور بس عنا العلم هو شهادة و بس

تمت دعوتنا لحضور حصة تدريبية على استخدام برنامج كمبيوتر من قبل الشركة المطورة...وشيء طبيعي أنه الدعوة كانت لشركات مختلفة...التدريب كان ممتاز و رائع و الفائدةتحققت الحمدلله...بس بعض المواقف كانت مزعجة...والمزعج أكتر انها كانت من ناس مهندسين و أصحاب شركات ... يعني المفروض ناس بتفهم...

- أول شي الشركة الداعية وجهت دعوات و طلبت ارسال تأكيد في حالة الحضور و أسماء الأشخاص المنتدبين...طبعا حتى يتم طباعة الكتيبات و تحضير نسخ البرنامج على عدد الحضور...المحاضر علق بأن العدد كان المفروض يكون 20 حسب التأكيدات اللي وصلته بس فعليا زاد العدد عن 35...أنا كنت بشوف هي الظاهرة بس بالأعراس و كنت بقول يالله في عالم جاهلة...بس طلع الموضوع ماله علاقة بالجهل

- في الدعوة المرسلة تم التأكيد على موضوع الحضور قبل الموعد ب 15 دقيقة حتى يتم تنزيل البرامج و اتمام عملية الجلوس و البدء في الموعد المحدد...وطلبوا من كل الحضور أن يحضروا لاب توب ... طبعا ما حدا بيقرأ و ما حدا بيلتزم و بدأت المحاضرة الساعة 9:30

- طبعا زي ما قلت ان المحاضرة كانت مفروض الساعة 9 بس في ناس اجت السلعة 9:30... و 10:00... و 10:30...و هيك حتى 11:30...وطبعا كل مايدخل حدا جديد...غبر التشويش اللي بيعمله..وبنادي للمحاضر انه ما أخد كتيب و ما نزل البرنامج و بدو كرسي...و التشويش و المقاطعة مستمرة

- برغم تذكير المحاضر بضرورة ضبط الخلويات على وضع الصامت طبعا التلفونات ما سكتت...و برغم جحرات المحاضر ما انهزت شعرة من الشباب...و معظمهم كان يرد عالتلفون جوه المحاضرة...لدرجةانه المحاضر قال واضح انكم ما رح تحطوا التلفونات عالصامت بس عالأقل اللي حياخذ مكالمة ياخدها بره و يرجع

- في كتير ناس كانوا يسألوا المحاضر أسئلة متشعبة و خاصة بعمل كل واحد فيهم و بيسأل المحاضر عن مشكلة مر فيها و مواضيع لا تهم الا السائل نفسه...هاد التصرف فيه أنانية كبيرة و سرقة لوقت المحاضرة...مع أنه المحاضر طلب من اللي عنده أسئلة خارج موضوع المحاضرة انه يأجلها لبعد ما نخلص بس كأنه بيحكي مع كراسي مش مع مهندسين

- بعد المحاضرة وزع المحاضر تقييم...طبعا نسبة كبيرة ما عبت التقييم و طلعت فورا...و نسبة كمان عبت عالعمياني...مع انه هدف التقييم مش بس تقييم المحاضر ... كمان كان في مجال تقديم اقتراحات لمواضيع محاضرات و شو نوعية الوسائل المساعدة اللي ممكن تستخدم...يعني في فائدة كمان للحضور

- الغدا كان عبارة عن حرب...وفي ناس روحت بعد الغدا فورا...حتى في ناس أعطت تقييم سيء للمحاضرة لأن الغدا كان دون المتوقع....واضح انه الهدف كان الاستفادة العلمية

هاي المشاهدات أكيد ما رح تغيير هدول الناس...بس اعتبروها دليل على أن العلم و التعليم شيئ و الحضارة شيئ تاني...فقط عندما يجتمع الاثنان يصبح العلم نور

I insult you...you hate me...we are happy family

كل عام و انتم بخير و لو متأخرة

الأسبوع الماضي رحنا نتعشى في المول ...قعدنا في قسم العائلات...على الطاولة اللي جنبنا كان في عائلة عربية .. أب و أم و طفلين

مش من عادتنا نتبع للناس بس الحوار اللي صار شدنا غصب عنا

الرجل بيقول لمرته: قليلة أدب...قسما بالله المرة الجاي كف على وجهك

المرأة: .....

الطفل بيقول لأمه: قليلة أدب (تقليدا للوالد المحترم)

الرجل لأبنه: اخرس يا حيوان

الزوجة ساكته و عم تطعمي ابنها اللي قبل شوي قال عنها قليلة أدب... و الزوج عم يلعب مع الطفل الأصغر و يغنيله:

I love you...you love me ... we are happy family

انتهى المشهد

المشهد بيتفرع منه يمكن 50 بوست عن العلاقات داخل العائلة...بس من قد ما أنا زعلان و الافكار تدفقت عندي عملت زحمة بالكلمات والشتائم يمكن...بدي وقت لحتى أفرزها...بس انتوا شو رأيكم باللي صار؟

فلاشات من الانتخابات

انتهت الانتخابات الحمدلله على خير...احنا صوتنا مش محسوب لأنه المغترب ما بيصوت...بنرتاح و بنريح..بس من لملمة الأخبار من هون و هون طلع معي شوية استنتاجات و مشاهدات:

- فيه مرشحين فازوا ب 1400 صوت...يعني فيه ناس عم بتجيب بانتخابات مجالس الطلبة أصوات أكتر من نواب ...هل ممكن هذا يفتح الباب لفئات كانت مهمشة زمان انها تفوز بالنيابة؟؟ لاعبين كرة القدم مثلا أو المطربين؟ أو صاحب شاورما ريم مثلا؟؟مين بيعرف

- أسماء الخاسرين لم تعلن منعا للاحراج...أنا برأيي لازم تعلن مشان فيه ناس خلص صار لازم يقتنعوا أنه نزلتهم عالفاضي..مشان الله بيكفي

- 70 % نسبة النواب الجدد...هاذا الاشي بيظهر رغبة الشغب في التغيير..لكن أبرز النواب الجدد هم اما معالي أو وزير سابق أو أسبق...يعني كانوا أصحاب القرار زمان...فاااااا مش متفائل صراحة بالتغيير

- نسبة المشاركة في عمان و الزرقاء منخفضة كانت...وبما انه أهل عمان و الزرقاء يعتبروا مثقفين سياسيا و القواعد العشائرية ما الها تأثير فأعتقد انه ممكن نقول انه قرار النخبة السياسية من الشعب كان مع المقاطعة لأنهم فقدوا الأمل بالتغيير

- فيه أعضاء سابقين بمجلس الأعيان خاضوا الانتخابات...معقول عضوية النواب محرزة أكتر؟؟

- ما عجبني موضوع الكوتا النسائية...يعني يا بتفوت بذراعها زي ريم بدران يا اما خليها بالبيت أحسن...ولا شو رأيكم؟

-التلفزيون الأردني يعني كان كتير بيمغص و التقارير اللي كانت تيجي من المحافظات عن جد بتضحك...زي المسلسل..قال شو مش عارف مين طلعت من بيتها و كلها أمل بالمستقبل ...واتجهت لصندوق الاقتراع حتى تختار من تعتقد أنه سيلبي طموحاتها....بالله عليك؟؟؟

- يعني بفهم أنه أي قانون لا يمكن أن يحوز على رضي كل الناس...بس انه المجلس الجديد رح يصوت على قانون الانتخاب الجديد هاي مش قادر أفهمها...يعني كيف واحد وصل للمجلس عن طريق نفس القانون رح يناقشه؟يعني برأيكم شو رح تكون النتيجة؟

- أكتر شي استفزني هو تصريحات الأمين العام لجبهة العمل الاسلامي...انه كوادره المنتشرة أوردت تقاريرها [انه نسبة المشاركة المعلنة غير حقيقية....نعم يا حبيبي؟؟؟كوادر مين و تقارير مين؟شو CIA حضرتك و احنا مش عارفين؟ في فرق بين المعارضة و التعامل كأنك دولة داخل الدولة..ولا شو يا شباب؟

- وصلني ايميل من واحد نازل على مسابقة أجمل عروسين عالفايس بوك بيطلب مني أصوتله و أدخل على سحب جائزة...و سمعت كمان انه زين عملت مسابقة كمان للمصوتين...مش عارف ليش احنا بنزعل من المال السياسي و شراء الأصوات...الواضح انه الموضوع بدمنا من زمان

- العنف اللي صار و الاعتداءات على المرشحين بيظهر انه لسه احنا قدامنا طريق طويل حتى نستوعب الديمقراطية

كل انتخابات و انتوا بخير

بعد أن فات الأوان

استيقظ من نومه مبكرا...لعن وظيفته التي حرمته من النوم لساعات أطول في يوم الاجازة بسبب تعوده الاستيقاظ مبكرا
نهض من فراشه ليغسل وجهه...أحس ببرودة الماء تغسل ما تبقى في نفسه من رغبة في النوم...
مسح وجهه بفوطة رائحتها منعشة...فزوجته تحرص على أن تنتقي بعناية رائحة معطر الغسيل
فتح الشباك و تنشق بسيم الصباح المنعش...استمتع بالهدوء لأول مرة منذ زمن...تأمل كل التفاصيل في الغرفة ...كل قطعة مختارةبعناية حتى انك تستطيع أن تتلمس كل ما هو موجود ليخبرك قصته...تستطيع أن ترى الحب موجودا في كل زاوية
شعر بمقدار الحب و الدلال الذين تحيطه زوجته بهما... بمقدار حرصها بأن يكون كل شيء على أجمل صورة
و بحرص زوجته على تلبية أصغر احتياجاته...بل بحرصها على احتواء غضبه و سخطه و اهاناته المتكررة التي لم يكن يشعر كم هي مؤلمة...يالله كم هو مقصر في حقها...
قرر أن يستثمر استيقاظه المبكر لأجلها و أن يجعل يومه لها لأول مرة منذ مدة لا يذكرها
نزل الى الحديقة و جمع لها باقة من الورود التي تحبها
تزين لها
أعد الفطور و تذكر كل ما تحبه و أعده ... نثر أوراق الورد على الطاولة
استجمع مشاعره ليقول لها كم يحبها
وضع صورتها على طاولة الفطور و فكر
كم كانت ستفرح لو كانت لا تزال هنا

الوزير و المذيعة

على خلفية استقالة الوزير ملحس و بمراجعة للحوار اللي حصل في لقائه بالصحفيين و مراجعة الواقع الصحفي و الاعلامي بالأردن و خصوصا المواقع الألكترونية...عندي تعقيب صغير

صحيح انه الكلام ما بيصير يطلع من وزير و انه المفروض يتحكم بأعصابه...بس الواضح انه الزلمة انفجر مرة وحده

أولا الاعلام الاردني من فترة مش بعيدة أخذ منحى جديد وهوه حرية الرأي لدرجة الوقاحة...المشكلة مش بحرية الرأي المشكلة في انه نسبة كبيرة من الأخبار ليس لها مصدر توثيق...و معظمها (قص و لصق) من مواقع تانية...يعني ممكن اتهمك بأنك حرامي و أشهر فيك لمجرد انه (علمت الجريدة الفلانية أو صرح مصدر رفض الكشف عن اسمه) يعني صار فيه سباق للعنتريات الصحفية من النقد غير المبرر للحكومة عالطالعة و النازلة حتى انه في جريدة الكترونية عينت موظف خاص لمتابعة هفوات رئيس الوزرا على تويتر و أخبار تسجيل ابنه بالجامعة و تركت البلاوي اللي بدها متابعة

ثانيا الحركة الاعلامية للأسف صارت حركة منتفعة...يعني جرايد بتهاجم العملية الانتخابية و بنفس الوقت بتفرد مساحات لاعلانات المرشحين...و بتهلل لمرشح معين ما حدا سمع فيه و بتنشر غسيل مرشح تاني...يتم نشر خبر لمصلحة جهة و أخبار مهمة لا تنشر بدون سبب

الوزير هاجم مذيعة في التلفزيون لأنها صارت تضحك في حوارها معه لأنه عم يحكيها بموضوع واضح انها مش فاهمة فيه اشي...و مبلغة الوزير بموضوع المقابلة و تفاجأ انه عم تحكيه بأشياء تانية من باب اضافة الاثارة...بصراحة هاد التصرف ما فيه احترام...لو كان مقصود بيكون خرج عن أخلاق المهنة و عم تحاول تحرج وزير عالهوا و هو وزير من الوزارات الضعيفة يعني أكيد ما بسترجي تعمل هيك مع وزير الداخلية مثلا...و لو كان غير مقصود فمصيبته مثل ما قال الوزير انه المذيعة و المعد مش عارفين وين الله حاططهم

كمان الوزير هاجم محمد الوكيل لأنه ( سخيف و سمج ) و أنا لا أملك الا اني أوافقه على هالاشي...و الوكيل عامل حاله (نصير الغلابه) بنفس الوقت مش عارف معلومات بسيطة كتير عن موضوع هوه اللي أثاره

الاعلام الأردني أنا برأيي يمر بأسوأ حالاته...و الدليل التلفزيون الاردني اللي أشك انه في حدا بيتابعه...يعني كل شي حلو كان من فترة 10 سنين بطل موجود...واللي بيعرف حجم الواسطة بالتعيينات فيه بيعرف قديش فيه خلل

أنا مش مع اللي عمله الوزير بس أتفق معه في كتير من الأشياء اللي حكاها...اعلامنا فيه مشاكل أكبر من تجريح مذيعة و معد لأنه زي ما حكى الوزير...هاي اهانه للأردن

تشويش

صباح الخير...

امبارح كان في خبر على الجزيرة يتعلق بالتشويش اللي صار على بث الجزيرةلكأس العالم....الخبر بيقول انه التشويش كان من الأردن و تحديدا من مدينة السلط....طبعا بعد ما طلع الخبر بثواني كانوا الشباب نازلين شتم للقناة و كيف انها دايما بتستغل الفرص (للنيل) من الأردن ... و صديق شخصي من السلط فورا كتب على ال Facebook انه الجزيرة ما بتفهم و انه تروح تزبط اجهزتها و أعلى ما بخيلهم يركبوه!!

هلأ أي واحد عاقل استعمل الحد الأدنى من مخه المفروض يخطر على باله كم نقطة:

- التحقيق اللي صار عملته جهةعالمية متخصصة و بالنهاية كان مطلوب منها تقدم تقرير عن الجهة المسؤولة سواءا كان من الأردن أو غيره

- الموضوع ما كان يخص الجزيرة وحدها...الفيفا اتضرر و و العرب سات كمان تضرر وما أعتقد انه هدول الجهات الهم مصلحة باتهام الأردن بأي شكل من الأشكال

- اذا كان الاتهام صحيح ( وأنا أعتقد انه صحيح) فالأجدر انه نعلن عن فتح تحقيق بالتعاون مع الجهات المتضررة حتى نظهر صورتنا الحقيقية باهتمامنا بمحاربة الجرائم و رفضنا لهيك أعمال

- لو الاتهام صحيح و كان صادر من السلط فهاد لا يعني انه السلط كلها متهمة...يعني اذا طلع واحد سوري و عمل جريمة بالأردن شو بنقاطع سوريا كلها يعني؟

- بعدين حتى بالمراحل الأولى من عملية التشويش أصدرت الجزيرةبيان قالت انه التشويش (قد) يكون من مصر أو من أسرائيل...وما جابت سيرة الأردن...وبعدين لما شافوا انه مش من ضمن قدراتهم هالاشي قرروا يكلفوا جهة مختصة بالتحقيق...يعني مشان ما يكون الاتهام زور...وهاي الجهة هيه اللي اكتشفت انه الأردن هوه مصدر التشويش...يعني لو الجزيرة بدها تتهم كان اتهمت من زمان

ردة فعل العالم عالمواقع و عال Facebook باختصار بتبين قديش احنا غير عمليين و ما بنسعمل عقلنا الا بالمناسبات...بس المصيبة الأكبر بتفرجي قديش احنا نتقبل النقد و بنسعى وراء الحقيقة... يعني لو استعمل الشعب مخه و انتخب اشخاص فعليا قد المسؤولية,شو رح يصير؟رح يجي بائب محضر استجواب لوزير و بدون ما نسمع أي شي من اللي بيحكيه رح تطلع عشيرة الوزير و تتصدى للدفاع عن كرامة العشيرة ضد من يريدون النيل منها و رح يحملونا جميلة بكل الناس اللي دافعوا عن الوطن منهم و تقوم قيامتهم....والوزير الغلطان مش مهم شو عمل...و نرسخ ظاهرة (فاسد مسنود أحسن من شريف مقطوع)

بعدين من شان الله حلوا عن قطر...مش دفاعا عن قطر بس يا أخي احنا المتضررين...يعني بلد عربي و من أكبر المصدرين للغاز في العالم...بدل ما نحسن علاقتنا فيه بلكي بنحل مشكلة الغاز المصري اللي انحرمنا منه و اللي رح يرفع أسعار الكربا...لأ بنخرب علاقتنا فيه لأنه هم اللي بحاجتنا...وسوق العمالة الضخم المفتوح في قطر الأردنيين محرومين منه لأنه احنا بحاجتهم مش همه بحاجتنا....أنا ما بقول نتذلل الهم كمان بس ما في داعي علاقتنا فيهم تخرب من ورا خبر في قناة

والله اللي صار بيبين انه لسه عنا كتير مشاكل نحلها....احنا مش عقلانيين و لا بنفكر بالمصلحة العامة....الحوار اذا مش بمصلحتنا بنقلب الطاولة على المتحاورين...لا نقبل اتهام و لا ندافع عن انفسنا لأننا نعتقد أننا فوق النقد...و عصبيتنا و (جاهليتنا) بتخلينا نضر حالنا...لسّه بكير علينا انتخابات و بكير علينا ديمقراطية

اضافة: مقال ممتازللكاتب فهد الخيطان متعلق بالموضوع

عيد مميز

كل عام و انتم بخير و انشالله تكونوا قضيتوا اجازة عيد حلوة

هاد العيد قضيته أنا و مرتي بالسعودية فقررنا نعمل عمرة

صراحة هاي أول مرة بعمل عمرة و كنت شوي متردد و هيك مستصعب الموضوع انه الدنيا عيد و شوب و زحمة رمضان و مصاريف...بعدين بتشجيع من المدام أخدنا الخطوة و توكلنا على الله

كان اخر اسبوع من رمضان لما حجزنا ... طبعا الاسعار برمضان ناااااااااااااار...يعني انا استأت من استغلال الناس لموضوع الدين بحيث انه اسعار الفنادق بتتطلع و بتنزل حسب المواسم ... و مش بس هيك القرب من الحرم اله سعر و وقت الاقامة اله سعر يختلف في وسط الاسبوع عن نهايته...حتى نوع الاطلالة اله سعر...في اطلالة جزئية و اطلالة عالحرم بس و اطلالة عالكعبة و كله بسعره طبعا...المهم توكلنا على الله و اخترنا غرفة مع اطلالة عالكعبة المشرفة, كونها أول زيارة لمكة و حبيت تكون مميزة...زائد اني كنت ب (مود البحترة) هداك اليوم

الشي التاني هوه موضوع العمرة نفسها...طبعا كل واحد بتسأله كيف العمرة؟ ببلش يفتي و كل موقع بيحكيلك شكل و اللي عامل عمرة بزمانه بيصير شيخ الاسلام و بده يدلك...أنا ريحت راسي و طلعت على مكتبة جرير جبت أصغر و أبسط كتيب عن العمرة و قرأته و ما سمعت كلام حدا

طلعنا من مطار الدمام بلبس الاحرام و عقدنا النية من الطيارة...وصلنا مطار جدة و منها على مكة بالسيارة أول ما شفناه كانت الساعة الجديدة اللي بمكة ... حلوة كتير

بعدين وصلنا الحرم و كان زحمة كتير كتير...حطينا الشناتي بالفندق و رحنا نعمل العمرة... منظر رهيب كان لما شفنا الكعبة المشرفة

هيك احساس غريب ... أولا رهبة المكان...بعدين اشي ما كنت تشوفه الا بالتلفزيون ... و كمان اجتني فكرة انه الرسول صلى الله عليه و سلم كان هون و كل الناس اللي سمعنا عنهم و بنعرفهم كانوا هون... الصحابة...الخلفاء ... قادة الجيوش الاسلامية...صلاح الدين...عبد الناصر...عرفات...الملك حسين...الملك عبدالله...قديش بتحس حالك صغير بهالمكان...وقديش بتحس الاسلام كبير لما تشوف ناس من كل البلدان توحدوا في نفس المكان لنفس السبب...قديش استحيت من حالي اني ما اجيت قبل هيك...وانه الاندونيسي مثلا عمل مجهود يتعلم عربي بس مشان يقرأ القرءان وانا اللي بعرف عربي منيح مقصر في القراءة و الحفظ

شغلة كنت حابب لو كانت موجودة (صراحة ما بعرف اذا موجودة أو لأ) انه يكون في رحلات لمعالم مكة الدينية...يعني قديش حلوة الرحلة لغار حراء مثلا و قديش مفيدة للأطفال أو حتى الداخلين في الاسلام من جديد...رحلات لمواقع الغزوات و الأحداث المهمة مع دليل شاطر يشرح و يفصل الأحداث اللي صارت.... أنا من ناحيتي أكيد كنت بطلع هيك رحلة

كلمة حق يجب أن تقال...مجهود خرافي عم تبذله الدولة السعودية في رعاية و نظافة الحرم والنظام و مساعدة الزوار...وكل حد موجود هناك مستعد يساعدك بدون تذمر....الله يعطيهم العافية

كانت الرحلة قصير وزي الحلم بس حلوة كتير و أنا بنصح فيها ... الله يطعمها لكل مشتهي و يطعمنا العودة يا رب...

هي شوية صور من الزيارة

مدخل مكة

منظر الحرم من الغرفة

الكعبة المشرفة

مقام سيدنا ابراهيم

باب الكعبة المشرفة

عيدكم مبارك

اليوم شكله اخر يوم دوام و اخر رمضان و بكره أوبعده العيد...النت عندي مفصول بالبيت فقلت أعيدكم عالبكير من الشغل

كل عام و انتم و الأمة الاسلامية بخير و ينعاد عليكم بالصحة و السلامة و انشالله العيد الجاي كل واحد بيكون بصحة منيحة و أموره عال العال...و انشالله كل حدا بنفسه اشي ربنا يحققله اياه

احنا معيدين بعيد عن أهالينا بس العيد بيضل عيد...لازم فرح و انبساط و تهييص...الله يخليلكم أهاليكم و أحبابكم و انشالله كل عيد بتفرحوا معهم

صحيح العيد مع مرور الزمن بيفقد شيء من نكهته بس امبارح كان الشيخ يقول انه الفرح في العيد سنة واجبة...و ضروري نشيع أجواء الفرح بالعيد من حوالينا خصوصا للأطفال

أنا العيد ما كنت أحس فيه الا لما يجيبوا عالتلفزيون أغنية يا ليلة العيد لأم كلثوم مع صو ألعاب نارية (اللي كانت اشي مش عادي بهداك الوقت) و رح أعيدكم كمان أغنية من عندي أنا بحبها شخصيا لسامي يوسف كمان عن العيد....يالله انبسطوا و ما تنسوا صلة الأرحام بالعيد ... و على قولة دعاية زين ( الفرحة في يوم العيد لما نعطي منها تزيد) يالله رح أحطلكم اياها كمان

تقبل الله طاعاتكم