بالله عليك تسكت

من فترة و أنا فاقد الرغبة بالكتابة أو حتى التعليق على أي خبر من الأخبار...حاسس حالي فقدت الاهتمام بالمناقشة و التعليق و المجاكرة...كل ما يجي خبر عالتلفزيون بيسم البدن ما بحرق أعصابي فيه...ببساطة بغير المحطة...لكن اللي رح أحكي عنهم هلأ حيجننوني...بس بما اني ما لي طولة بال حاليا على النقاش...بدي أقول لكل واحد فيهم (بالله عليك تسكت)

- عزام الأحمد بيقول في تصريحات على أحد مواقع فتح أن غزة ليست بحاجة الى مساعدات و انه السلطة عم تبعت مساعدات بشكل متواصل للقطاع عشان هيك ما بنقدر نقول انه غزة محاصرة....يعني بديش أحكي عنك أي كلمة...مواقفك اللي بتخزي لحالها بتحكي...بس يعني العالم كله تحرك مشان يفك الحصار و حضرتك عايش بعالم تاني...بالله عليك تسكت

- خالد مشعل بيقول انه حركة حماس تقبل بدولة فلسطينية في حدود ال67....طيب والباقي شو وضعهم؟ بعدين تعال هون..مين أعطاك الحق تحكي هالحكي...يعني بصفتك شو؟كيف بتقرر عن الناس اذا بتقبل باسرائيل أو لأ؟ كيف بتعطي شرعية للأحتلال اللي وجود و شعبية الحركة اللي بتمثلها حضرتك قائمة على (محوها من الوجود)؟ بالله عليك تسكت

- التلفزيون المصري بيقول على لسان أحمد أبو الغيط أنه مصر عم تتحرك دوليا لرفع الحصار الأسرائيلي عن غزة...طيب شو رأيك ترفع الحصار المصري و بلا جميلة العالم؟كأنه مصر مش هيه اللي مغلقة معبر رفح و كأنه الجدار اللي تحت الارض مش الحكومة المصرية اللي بانيته...أقولك, بالله عليك تسكت

حداد

حداداً على أرواح شهداء قافلة الحرية التي كانت متجهة إلى غزة...انا لله وانا اليه راجعون

نكشات

- اليوم و أنا طالع عالدوام كان في برنامج عالراديو...سألت المذيعة فيه عن الشرط اللي ممكن يخلي الست تقبل بصدر رحب انه زوجها يتزوج عليها وحدة تانية...معظم الاجابات كانت انه يدفع لها مهر مثل مهر الجديدة...أو يكتب باسمها بيت و سيارة...أو يصرفلها راتب شهري كبير...صحيح انه السؤال بايخ بس انصدمت من نظرة المرأة لنفسها و لمؤسسة الزواج...وكأن المرأة صارت مقتنعة أنها سلعة ممكن رفع سعرها و المساومة عليه حسب الظروف...والزواج أصبح بزنس يتعلق بالأرباح و العوائد....صراحة, تعزز عندي رأي ان المرأة هي المسؤولة عن تدهور مكانتها بالمجتع و ليس ال(المجتمع الذكوري)

- قبل كم يوم كان في جدل على حصص دول حوض النيل في مياه النهر, طبعا الدول الافريقية عملت اتفاق بينها و حلقت لمصر عالناعم...سبحان الله, قامت الدنيا و لم تقعد في مصر بسبب مباراة كرة قدم, و الدولة هددت من يمس كرامة مواطنيها (الكروية) و الاعلام المصري ردح حتى شبع, بس على موضوع استراتيجي و مهم زي المياه لا حس و لا خبر...تذكرت البيت اللي بيقول:

أسد علي و في الحروب نعامة

- ستقوم الحكومة الاسرائيلية بطرح أملاك الغائبين لأصحابها الفلسطسنيين في مزادات تخالف كل القوانين الدولية و الانسانية بس طبعا اسرائيل ما بتفرق معها...ولكن في المقابل هذي فرصة لاعادة شراء هذه البيوت من قبل أغنياء العرب و تثبيت ملكيتها العربية كرد فعل لمحاولات تهويد فلسطين...يعني شيء ما بنقدر نمنعه ليش ما بنستفيد منه؟ و هيك بنفتح باب الجهاد بالمال...بس العرب كعادتهم ما تحركوا....اشي بيقهر, عقارات بالملايين تشترى في الدول العربية من قبل الخليجيين كمصايف تستعمل كم شهر في السنة بس موضوع مهم زي هاد ما حدا بيتحرك فيه...لا حول ولا قوة الا بالله

يوم المغتربين

صباح الخير...

من 4 سنوات و بالتحديد أول مرة نزلت اجازة من بعد ما صرت مغترب خطرتلي فكرة انه لازم يكون في يوم بالسنة اسمه يوم المغتربين

يعني مع كل قرف الغربة بتنزل اجازة عالاردن و كل فكرك انك رح تنزل تنبسط بس بيطلعلك مليون شغلة بتخليك ندمت انك نزلت اجازة

هادا اليوم لازم تعطل فيه الدوائر و الشركات بس مش بالأردن...بالخليج بس...اه انته شو دخلكم تعطلوا على ظهورنا؟

المهم...لازم ينعمل احتفال يلقي فيه مندوب عن جمعية عائلات المغتربين الأردنيين كلمة بيهني فيها المغتربين بعيدهم...وبيوعدهم باسم جميع الاهالي انه ما رح يتطلعوا علينا كبنك العائلة المفتوح دائما من باب انه احنا بس قاعدين بنلم مصاري تحت المكيفات و انه الف او الفين دينار بالشهر ما بيهزوا فينا شعرة...وانه في حال جبنالهم هدية مش كتير غالية لما ننزل اجازة ما رح يحقدوا علينا و يطلعوا علينا اشاعات من باب انه مليانين مصاري و عاملين حالنا بنشحد...و انهم بيتفهموا انه الهدايا بس للأقارب من الدرجة الأولى بس

بعدين بيجي وزير الخارجية بيلقي كلمة بيقول انه بيعتذر عن تقصير السفارات في حقنا و انه واجبنا عليهم كبير...و انه الموظفين بالسفارات بيتأسفوا عن المعاملة الزفت اللي بيعاملونا اياها بسفاراتنا اللي المفروض تكون سند و عون النا بالغربة

ووزير الداخلية بيلقي كلمة كمان بيبوس فيها لحيتنا اذا موظف الجمارك أو الجوازات بالمطار مارس علينا خفة دمه أو طلع فينا عقده المكبوته...أو اذا شرطي سير حب يخالفنا من باب انه خليه يتخالف ولا بس قاعدين يلموا مصاري بالخليج؟

أهم واحد هوه مدير الملكية الأردنية...بيعتذر عن زناخة ال Land Crew و المضيفين و تحميل الجمايل و النفترة بوجهنا...و عن خطوط تلفونات المكاتب التابعة للملكية اللي بتشبه خطوط برامج المسابقات في رمضان

نقيب السواقين العمومي و ممثل عن السواقين الخصوصي كمان بيلقي كلمة بيعتذر لو حدا حب يتناغش و كسر علينا بالسيارة يعني لازم نسامحه برضه النمرة الخليجية مستفزة للمشاعر

مندوب أصحاب المحلات و المطاعم تعهدوا بأنه ما يعاملونا كخرفان و بنوك متنقلة...

كلمة كمان من مجلس الأباء بيتعهد أنه اذا اجالهم عريس بيشتغل بالخليج ما يزيدوا مطالبهم عليه أضعاف لأنه (مليان مصاري)

بعدين بختام الحفل بيكون فيه غدا فيه من كل الاشياء اللي بنفتقدها...منسف مسخن مفتول كبة و كنافة...و يتم توزيع تنكة جبنة و تنكة زيت على كل مغترب

شكلي شطحت كتير بأفكاري...أو اني عن جد جعت...يالله خلص بيكفي

قربت الاجازة....جايلك يا عمان...جهزي حالك

خرابيش

و أنا بتصفح هالنت وقع تحت ايدي موقع خرابيش...هو موقع لشركة أردنية بتنتج أفلام كرتون قصيرة

أفضل وصف للموقع تجدوه مكتوب على الموقع نفسه و منه أقتبس...

( خرابيش هي اسلوب حياة, عشق لرواية القصص, حب للمغامرة و التجريب و الحرية و الابداع. هي رسم لصوت الراوي في حكاية. كل عمل أو مشروع نقدمه هي قصة نحاول ايصالها للأخرين. خيالنا يتحدث, وخطوطنا ترسم بعفوية. نحب الذكريات و نصور الأحلام...هنا في خرابيش تولد القصص)

الموقع فعلا حالة ابداعية خلتني مبسوط انه في عنا مبدعين في مجال الرسوم لأنه لفترة قريبة كنت أعتبر انه عماد حجاج طفرة و موقعه مش عنا...بس اتضح انه عماد في بعده ناس لا يقلوا ابداع عنه...الشركة تنتج عدة سلالسل كرتونية...منها خفاش, خط أحمر..هزاز و سوبر محترم (المفضل عندي) و غيرها...يعني بتشرح وجهات نظر بطريقة حلوة و بتقدم كوميديا خفيفة و سريعة...و أخيرا بالتعاون مع جوجل اطلقوا موقع أهلا اون لاين http://www.google.com/intl/ar/ahlanonline/

وهاي خطوة أنا بعتبرها عملاقة مع شركة بحجم جوجل...وهو عبارة عن موقع تعليمي لتبسيط تعليم استخدام الانترنت

موقع خرابيش لا يمكن أن أوفيه حقه بالكلام لذا انصح بزيارته بشده...و بوعدكم انكم رح تلاقوا الابداع و الابتكار في كل زاوية

http://www.kharabeesh.com/

هلا بدي أحكي عن سوبر محترم و هي سلسة تنتجها خرابيش....هو انسان بسيط ملتزم على قده و بالتالي حيطه واطي...من كتر ما هو محترم الكل بيحاول يستغله...فبس تولع معه بيتحول لوحش بينتقم من اللي قدامه...أنا عجبتني فكرته كتير و عن جد أحيانا في ناس ما بينفع معهم الاحترام فبيكون نفسي أنتقم منهم

الفكرة حلوة و تنفيذها حلو كمان...بنصحكم تشوفوا الحلقات على الموقع

الدور الأهم للعشائر في الأردن

صباح الخير

قبل ما أحكي أي كلمة...أرجوكم أن تقرؤوا الموضوع بطريقة مجردة من أي اتهام لأي طرف

الأحداث الاخيرة اللي حصلت في جامعة البلقاء و قبلها بعجلون هي أحداث صرنا نسمع فيها من فترة جديدة...طول عمرها العشائر موجودة بالأردن و جزء هام و كبير من تركيبة المجتمع الأردني...ولكن

للأسف يبدو ان الامور عم تفلت من ايدين العشائر لأنه مجمل الاحداث الاخيرة كان فيها تعدي على مواطنين و أملاك عامة...صحيح انه هاي التصرفات طايشة و وجهاء العشائر طبعا ما الهم يد فيها و لكن المطلوب ضبط أفراد العشيرة من قبل حكماءها...اللي صار غير مبرر و غير مقبول أبدا ... هو ينطوي تحت الجاهلية و بس...أنا بفهم مشاعر أهل القتيل الله يرحمه و لكن التحرك ما بيكون بهالطريقة...حتى القانون ما أخذ فرصته لسه...الدولة الاردنية دولة قانون و القضاء فيها بيتمتع بشفافية عالية و انا متأكد انه القاتل رح ياخذ جزاؤه اللي حدده ربنا...و في حالة انه القاتل ما أخذ العقاب اللي بيستاهله...هناك أكثر من طريقة لاستعادة الحقوق طبعا العنف مش ضمنها

القضية الثانية انه اللي صار في مخالفة صريحة لأوامر الله سبحانه و تعالى لما نصير نكسر و نخرب و نعتدي على أفراد عشيرة القاتل من باب انه لا تزر وازرة وزر اخرى...واعتداء على الأموال العامة و انتهاك لراحة المواطنين اللي ما الهم علاقة باللي صار...و اعتداء على هيبة الدولة بتخريب الممتلكات و تجاوز القوانين و الأنظمة...لحسن الحظ أنه الدولة عم تمارس ضبط النفس في التعامل مع هيك مواقف و الا كان الامور فلتت عن السيطرة...ولكن هاد الشي ما لازم يستمر...يعني العشائر متوقع منها تقوم بدورها في ضبط افرادها بنفسها و لازم عقلاء العشائر يتحركوا في اتجاه الوقاية من العنف و مش بس انتظار حدوث العنف للتحرك

التركيبة العشائرية هي من أهم أعمدة المجتمع الأردني و لكن اذا ما تم ضبط التصرفات اللي عم تصير رح تكون مشكلة عويصة و حلها صعب كتير

الله يقدم اللي فيه الخير للبلد و لأهله

HAppy Birthday to ME

اليوم عيد ميلادي...صار عمري 29 سنة...يمكن أبدا ما حسيت اني راضي عن انجازاتي بس هالسنة اللي مرت بالذات كنت راضي جدا الحمدلله

تزوجت من بنت من يوم ما عرفتها دخلت النور لحياتي

عادة الانسان بهاد اليوم بحب يحس بأهميته عند العالم بس أنا تعودت ما أتأمل كتير حتى ما تيجي الفقسة كبيرة...في ناس كسبت معرفتهم هالسنة و منهم انتوا..وفي ناس كتير بفتقدهم جنبي و خصوصا أهلي و أصحابي....اللي لحد هلأ ما حدا عيد علي منهم (أنا بفرجيهم)...بس زوجتي احتفلت فيي امبارح احتفال خاص...كيك و شموع و تبولة و معجنات كلهم الي لحالي...تذكرت و أنا صغير لما كانوا اهلي يحتفلوا فيي...فعلا احتفال خاص جدا من زوجة خاصة جدا و اللي بحبها كتير كتير..الله يخليلي اياها يا رب

عن جد عوضت غياب كتير ناس و أشياء بحياتي لدرجة اني حسيت حالي ملكت الدنيا امبارح

على كل حال ما في بالدنيا كامل...مع انه عيد ميلادي بس أنا صاحي من الساعة 6:00 عالدوام...بس رح أهدي حالي هالأغنية..انتوا شو رح تهدوني؟؟

(وإذ تأذن ربكم لئن شكرتم لأزيدنكم ولئن كفرتم إن عذابي لشديد)

اليوم نزلت عالموقع...طبعا الموقع عبارة عن خط انابيب لتزويد المصانع بالمواد الأولية...طبعا كونك بمنطقة صناعية و خط تصريف مخلفات المصانع مفتوح فالروائح هناك اشي بيسم البدن...صرت أفكر يا الله ليش هيك أنا حظي...و ليش اخترت هاد الشغل..و ليش و ليش...لحد ما مرت سيارة محملة عمال... نزلوا العمال من السيارة و على خط التصريف بلشوا ينظفوا فيه بايديهم ...طبعا الكل غايص لنصه بالخط و شغال من قلبه...انا فكرت انه كيف متحمل عيشته هاد...لا و المشكلة انه عامل يعني راتبه اشي كتير بسيط...فكرت بيني و بين حالي و قلت الحمدلله عالنعمة اللي انا فيها...لأنه في كتير ناس حالهم أسوأ

الفكرة انه الانسان تعود على اشاء بحياته لدرجة بطّل يحس بأهمية هاي الاشياء...و في حواليه من النعم اللي نسيها بس من دونها ما بيقدر يعيش...منها نعمة الصحة و التنفس و العقل و غيرها من نعم الله التي لا تحصى

دائما بندور على الاشياء اللي مش موجودة عنا و بيركبنا الهم لأنها مش عنا...بس بننسى كتير من الاشياء اللي مبسوطين فيها و غيرنا بيحلم تكون عنده....الزوجة بتدور على الفلوس اللي مش موجودة مع زوجها و بتنسى انه معطيها أمان و حب غيرها بيحلم فيه...و الزوج عينه على وحدة يمكن أحلى من مرته و بينسى الحنان و الاهتمام اللي مرته غامرته فيه... الأباء بيتذمروا من أولادهم و نسيوا انه كتير ناس انحرموا من الخلفة...و كتير أولاد بيتذمروا من أباءهم و نسيوا انه في أطفال فقدوا اباءهم و امهاتهم...

حاول فكر بأشياء حواليك بتعتبرها من المسلمات بحياتك و تخيل كيف رح تكون الحياة بدونها...وشوف كيف تقديرك للأشياء رح يزيد...و فكر بينك و بين حالك...متى اخر مرة حمدت الله فيها على نعمة البصر أو العقل أو السمع...متى حمدت الله فيها على نعمة الماء و الهواء...على نعمة وجود الدواء اذا مرضت...على نعمة الاهل و الاصحاب...على نعمة الزوجة و الاولاد؟

احمدوا الله على أصغر النعم حتى تدوم...وقبل أن تفكروا بالتذمر من أي شيء فكروا كم انتم محظوظون لوجود أشياء أخرى في حياتكم

الى كل أم حقيقية...

الى كل ام حملت في أحشائها طفلا أعطته عطفها و حنانها دون مقابل...

الى كل أم ضحت بكل ما تحب لأجل طفلها...

الى كل أم ربّت و لم تترك ابنها (لشغالة) تربيه...

الى كل ام حرمت نفسها من الراحة و النوم سهرا على طفلها...

الى كل ام تقدم لطفلها أقصى ما تستطيع و تبحث لطفلها عن الافضل دوما...

الى كل ام تغرس في طفلها الاخلاق و القيم...

الى الامهات في فلسطين...والى كل ام فقدت طفلها

ولا ننسى الآباء لأن ليس لهم عيد...لكل من وقف جنبا الى جنب مع زوجته لتربية ابنه و لم يرمي الحمل عليها وحدها

الى امي...رمز العطاء اللامحدود

الى زوجتي سارة التي ستكون أما رائعة في المستقبل (ان شاء الله)

و كل امهات العالم...كل عام و انتم بخير

الاعلان بال(خاوة)

لاحظت اخر فترة لما بفتح ايميلي انه معظم اللي عم يوصل هو اعلانات لشركات كتير...من اعلانات العقارات لاعلانات رحلات العمرة و حتى اعلانات الفياغرا وغيرها...بعض الاعلانات بيوصل من شركات معروفة أنا تعاملت معها قبل هيك و بالتالي فهمت من وين جابوا ايميلي (بس ما يروح بالكم للفياغرا و الله ما بستعمله هههههه)...بس الغالبية العظمى لشركات أول مرة بسمع عنهم و مش قادر أفهم كيف وصلولي

أول شي خلينا نحلل من وين ممكن هالشركات تحصل ايميلات العالم....ممكن انت تكون تعاملت مع شركة و طلبوا ايميلك للتواصل و ارسال العروض مستقبلا على ايميلك...هادا الشيء يتم بمعرفتك و رغبتك و لا غبار قانوني أو أخلاقي عليه....الطريقة التانية انه ممكن تتعامل مع شركة و يطلبوا ايميلك أرو رقم تلفونك بدون توضيح السبب و بعدين بصيروا يبعتولك ... و هاد الشي فيه نوع من الاحتيال المبطن برأيي...يعني مثلا, بتشتري بنطلون من محل معين, بعدين بتغير رأيك و بتقرر تبدله أو ترجعه...بيجي موظف الكاش بيطلب منك توقع على الفاتورة مع رقم موبايلك أو ايميلك...طبعا أنا صارت معي أكتر من مرة و زي الأهبل كنت بكتب...بعدين خطر على بالي أسأل شو علاقة موبايلي أو أيميلي يالموضوع...الموظف رد علي كأنه مفضّل على لأنهم رح يبعتولي اذا في تنزيلات بالمستقبل...قلتله بس انا ما بدي تبعتولي...قال هيك سياسة المحل!!! قلتله سياسة المحل بتمشي عليك كونك موظف فيه..بالنسبة الي بتعرض علي هاي (الخدمة) و اذا وافقت منيح ما وافقت مش من حقك تطلب رقمي...طبعا رماني بنظرة احتقار كاني ناكر للمعروف و قلي على راحتك انت حر...ممكن كمان تتصل بمعهد تسأل عن دورة لغة مثلا...ما بيعجبك الموضوع (أو السعر) و ما بتسجل...بس على مين, كل يومين رح يبعتولك مسج بلكي غيرت رأيك...

كمان طريقة (انا بعتبرها بتعيبنا كمهندسين المفروض محترمين و بنفهم) انه بتوصلنا دعايات لأنشطة نقابية و دعايات للمرشحين لانتخابات النقابة عن طريق تلفوني و ايميلي اللي انا المفروض حاططهم للتواصل مع النقابة في أمور تخص انتسابي...يا ترى انكشاف هاي المعلومات الشخصية لحساب ناس معينين ما فيه انتهاك لقانون السرية لمعلومات المهندسين المنتسبين...و يا ترى مين ممكن يعرف عني معلومات شخصية انا ما بحب اكشفها لمين ما كان؟

شركات الخلوي كمان بتعطي نفسها الحق انها تمررلك رسائل اعلانية و اعلامية غصب عنك...هاد الشي تعدى السرقة و انتهاك الحرية الشخصية للوقاحة و (لوي الدراع) لأنها هيه مشغلة الخدمة و مش عاجبك لا تحمل موبايل (بس أظن أنه هالموضوع صار اله ضوابط بالأردن, صح؟)

طيب على فرض أنه احنا لسه عايشين بالقرن الثامن عشر و قوانين حقوق الانسان فيما يتعلق بحماية الخصوصية لسه ما حدا بيعرف فيها...بدي أحكي من منطلق تجاري...لما يوصاني ايميل من شركة بتعرض علي انها توصل أي اعلان انا برغب فيه لقائمة من الاف الايميلات...يعني الأخ عامل بزنس على ضهري و ضهر غيري...و نفس الحال بينطبق على شركات الخلوي...طيب وين نصيبي أنا؟ مش المفروض انه الي حصة كوني بساهم بايميلي؟

انا طرحت الموضوع ك (فشّة خلق) لأنه مضايقني و لأني كمان ما بفهم بالجوانب التقنية للموضوع و اللي يمكن لازم تنذكر...مشان هيك طبعا خدوا راحتكم بالتعليق و الاضافة