قصة عقلين

وصلني ايميل على الانترنت مكتوب عن محاضرة للكاتب الامريكي مارك جونجور...هي المحاضررة عن الاختلاف في طريقة تفكير الرجل و المرأة...على قد ما الايميل مضحك, على قد ما هو فعلا فيه جوانب كتير صحيحة...وفعلا بيساعد على فهم طريقة التعامل مع الطرف الاخر...وهذا الشي أحيان كتيرة بيكون أهم من الحب في العلاقات الزوجية...أنا حطيت الفيديو لأنه أحلى من القراءة ومضحك أكتر...خلص ما رح أحكي كتير عنه...شوفوه و أعطوني رأيكم

أولاد البطة السودا

بعد اللي صار بزلزال هاييتي و الفاجعة الرهيبة اللي صارت...لقينا العالم كله فزع لهاييتي فزعة العشاير و أهل النخوة

حتى ال Farmville فزعوا لهاييتي...و غزة ارتكبت فيها أبشع جرائم الحرب و انتهاك الحرمات الانسانية وما حدا قال شو هاد اللي عم بيصير...ما حدا بكي عليها و لا عمل مناحات...ولا Oprah صارت تقول بدي أساعد...مع أنه اللي صار بغزة من حيث الكيفية اللي صار فيها كتير أبشع من اللي صار بهاييتي...و صار عالهواء مباشرة مثل فيلم رعب مؤلم والعالم دار ظهره للي عم بيصير و سكّر عيونه...اللي صار بهاييتي كان بلحظات و ما حدا كان قادر يمنعه بس اللي صار بغزة كان في وقت كبير كتير ممكن كنا نمنعه أو نوقفه...بس برضه ما حدا تدخل

هل احنا أولاد البطة السودا؟

هيّا بنا نقرأ

صباح الخير...

بعد انقطاع طويل عن القراءة...وبعد أن اصبح عندي وقت فراغ كبير بعد الانتقال للسعودية, قررت أنا و زوجتي أنه نستغل وقتنا بالقراءة

بس واجهتنا مشكلة...أنه ما في موضوع معين أو كاتب معين داخل ضمن اهتماماتنا حاليا...وبالتالي لما نروح نشتري كتاب بنصفن بالكتب و بالاخر ما بنشتري شي...فاليوم الصبح و انا بسمع ماجدة الرومي اجتني فكرة انشالله تعجبكم...

كل حدا قرأ كتاب و أعجبه يحكيلنا عنه شوي هون...وهيك بصير عنا زي نادي قراءة...و ممكن الواحد يشوف اقتراحات حلوة لكتب يقرأها

شو رأيكم؟

وعشان تفوتوا بالجو...هي نفس الأغنية اللي كنت بسمعها...

الخلل في الخطاب الديني

لا تزال اثار ضجة الفتاوى الازهرية الاخيرة (فتوى الجدار و النقاب و فك التشفير) ماثلة للجميع... و ملاحظ في الفترة الأخيرة كثرة الفتاوى من العلماء السعوديين حول موضوع تحليل الاختلاط و عدم الربط بينه و بين الخلوة في اشارة و تمهيد لتغيير متوقع في القوانين السعودية...لقد أصبحت الفتاوى الدينية رهن بالرغبة السياسية لأصحاب القرار حتى صرت أميل الى عدم الوثوق في هذه الفتاوى (المفصلة و المخيطة على المقاس)

جانب اخر هو عدم وجود مصدر موثوق و موحد يتولى الامور الدينية ليكون مرجعا للناس...و ذلك بسبب أن الفتوى اللتي ترضينا قد لا ترضي الاخرين...فاصبح كل يفتي على ليلاه ...و أصبح البحث عن فتوى يتطلب أولا بحثا مفصلا و دقيقا في هوية و تاريخ صاحب الفتوى...و هو في أغلب الاحيان يؤدي الى نتيجتين...أخذ فتوى غير صحيحة من مصدر غير مؤهل, أو عدم البحث عن فتوى والميل لاستفتاء القلب

الخطاب الديني مصاب بخلل كبير في الواقع و هو ما ينعكس سلبا على تصرف المجتمعات...فأصبح الفرد مفتي نفسه...يحلل ما يريد و يحرم ما يريد...فنجد من يسرق بحجة أن الضرورات تبيح المحظورات و من يقبل أن يرتشي بحجة ن هذه عمولة على تعبه و هكذا..و بالنتيجة ابتعاد الناس عن دينهم أكثر فأكثر لأن الدين أصبح لا يقدم تفسيرا لما يحدث واختلطت المفاهيم فلا أحد يستطيع التمييز بين الصحيح و الخاطئ ...و المصيبة الاكبر أنها تلغي دور الفرد في فهم دينه و مناقشة المراجع الدينية...فتجد البعض قد نصب نفسه كظل الله في الارض...و المهدي المنتظر...و نور الله الذي يضئ حياة الناس...و الناس من حولهم منبهرة بهم بسبب الجهل الديني...ذات الجهل الذي يجعل الناس تبحث عب واسطة يتقربون بها الى الله وهو سبحانه أقرب الينا من حبل الوريد...

الامثلة كثيرة...وما سبق ينطبق على الاديان كلها...فالمسيحية هي دين التسامح و مع ذلك ظهر من يروج للحروب الصليبية بأنها دفاع عن المقدسات...منذ زمن المماليك و حتى أيام بوش و هي أبعد ما تكون عن الدين المسيحي السمح...حتى اليهودية التي هي من ذات المصدر الالهي لا يمكن أن تكون بأي حال منطقا يبرر ما أفتى به حاخامات اسرائيل بقتل أطفال العرب...والاسلام ليس بأفضل حالا مع كل الدعوات لتكفير الغير واباحة القتل وتجاوز مبدأ الحكمة و الموعظة الحسنة...

التسامح موجود بين العقلاء من كافة الاديان و لكن الخطاب الديني بحاجة لمراجعة منهجية...ولا تتوقعوا أن يكون هناك تسامح و محبة بين الأديان كافة بكامل افرادها و طوائفها اذا ما ظلت الفتاوي تحاك خدمة لمصالح ضيقة

في القدس

مساء الخير

طولت عليكم شوي بس عنا ضغط شغل كتير اخر فترة...الله يديم الخير

امبارح كان عندي رسم لمشروع...دخلت غرفة الاجتماعات و بلشت أرسم...سمعت قصيدة (في القدس) للرائع تميم البرغوثي...اسمعوها معي

القدس محتلة و الواقع بيقول انه مستحيل نزورها و ما رح تتحرر في القريب المنظور...بس تذكرت انه في شركات سياحية أردنية كانت عاملة رحلات للي بده يروح يزور القدس...قامت قيامة جمعيات مقاومة التطبيع بالاردن على هذه الشركات...أنا اجاني تفكير

ليش يعني هذي الشغلة أصبحت جريمة؟ الواقع بيقول أنه القدس محتلة...و ما كان في اعتراض على زيارة باقي مدن فلسطين مع أنه كل المعاملات تتم عبر الجانب المحتل...يعني نفس المبدأ, طيب ليش ما نزور القدس...يعني الواحد زي ما بيشتاق يروح مكه وبيت لحم أكيد كتار نفسهم يروحوا القدس

ليش ما نروح؟ برأيكم غلط نروح القدس عن طريق فيزا من السفارة الاسرائيلية؟

مش أحسن ما رفض بحجة اننا بنقاوم التطبيع و ما شكله بحياتنا رح نزور القدس أبدا؟

يعني أنا برأيي أنه مقاومة التطبيع شيء و مقاومة واقع احتلالي مفروض علينا شيء تاني...أنا بعتبر زيارة القدس بهالطريقة هي مقاومة لواقع احتلال مش تطبيع...يعني ايجاد طريقة لممارسة طقوسك و عاداتك رغم قيود الاحتلال هو دليل قوي على المقاومة و البحث عن اسباب الحياة...وزي ما بنزور أهلنا في نابلس و غيرها أنا بعتقد أولى اننا نزور القدس

كيف أنا و أولادي رح نضل مشتاقين و متمسكين بالقدس اذا ما شافوها و لمسوا التاريخ و جذورهم فيها؟

عم بستنى رأيكم...أنا من جهتي عم بفكر بالموضوع جديا باجازتي الجاي...قولوا انشالله يصير خير

سلام

اللي استحوا ماتوا

امبارح كنت عال Facebook و لقيت كل البنات عاملين ال status تبعونهم بالألوان...وحدة كاتبة Blue فانا بحسن نية فكرتها مكتئبة...بعدين بلشوا الصبايا...على اسود و زهر و بيج...انا فضولي كان رح يقتلني...دورت دورت و لقيت group

breast cancer awareness ♥ I updated my Status with my Bra colour ♥

ووصلني هاد ال Link

http://blogs.chron.com/peep/2010/01/bracolor_meme_spreads_through.html

يعني جد جد مش عارف شو بدي أقول...لا و الحلو انه البنات مقنعين بالفكرة و انهم من كل عقلهم مفكرين انه عم يدعموا الحملة...يعني بس فهموني ...أنا زلمة رجعي و متخلف...موافق, بس فهموني كيف ممكن هالاشي يدعم حملة غبر حملة (قلة الحيا)

بالله اذا حدا عنده فكرة يحكيلي...لأنه أنا صراحة مش عارف أحكي و لا اشي...لساني انربط

بس يا رب ما تطلع حملة لدعم المصابين بالبواسير :)

على فكرة ... شر البلية ما يضحك فعلا...و اللي استحوا ماتوا خلص

افتتاح برج خليفة رسميا

حفل رائع اللي صار امبارح بمناسبة افتتاح برج خليفة (برج دبي سابقا)

اثبتت دبي رغم كل الانتقادات انها رح تضل معلم حضاري يدعو للافتخار

للأسف الخليج مليان فلوس بس رايحة عالفاضي...بس بدبي غير

رح يطلع حدا يقلي دبي وهم و عملاق من كرتون و من هالحكي المخربط

انا عشت بدبي و شفت...البنية التحتية لدبي من أحسن الموجود بالعالم و أحسن يكتييييير من باقي دول الخليج...المهنية العالية في جميع نواحي الخدمات و التعاملات المقدمة من الدولة و غيرها بتحسسك بالفرق...بعدين دولة ايراداتها السنوية 134 مليار درهم(عام 2008)من وين بدو يجيها العجز؟

بعدين امبارح حكوا عن انجازات دبي (اللي انا شفتها بعيني) احكولي مين في دولة بالعالم بتوزع على مواطنيها فلل مفروشة يسكنوا فيها؟

مين دولة بالعالم صرفت على مشاريع التعليم و الصحة في انحاء العالم مثل دبي؟

مين أطلق مبادرة اجراء عمليات اعادة بصر على نفقتها على المحتاجين من مختلف دول العالم؟

مين أطلق مبادرة ترجمة مليون كتاب للغة العربية؟

مين في دولة بتسد ديون مواطنيها في حال عجزوا عنها؟

مين في دولة بتتكفل بسكن كل مواطن غير قادر على تأمين سكن خاص؟و سكن محترم مش من أبو مشّي حالك و خلص؟

مين في دولة بتحترم المقيم و بتعامله نفس معاملة ابن البلد؟

مع تحفظي على بعض المظاهر بدبي...بس بحب أقول, يا ريت نصير زي دبي و ينهار اقتصادنا بعدها مو مشكلة

ما هو أصلا منهار و مديون و مش شايفين اشي

خير اللهم اجعله خير

صحيت بالليل عطشان, مسكت الموبايل أشوف كم الساعة...لقيت 8 Missed calls من أهلي..أتصات رد علي أخوي الصغير: يا زلمة وينك انتا؟الدنيا مقلوبة و انتا نايم؟ قلتلوا شو في؟ قال افتح افتح عالجزيرة...فتحت, لقيت جمال ريان مستضيف واحد اسرائيلي و عم بيصيح فيه: (الى متى تستمر هذه الغطرسة؟)و بلش يخبّط عالطاولة.

صحيت مرتي بتقولي:شو فيه؟ قلتلهاهيك هيك صار و هيني عم بحاول أفهم

خبر عاجل: انهيار المسجد الاقِصى أثناء صلاة الفجر و وقوع ضحايا بالمئات

أنا ما صدّقت...رحت غسلت وجهي وفتحت عالعربية,

كاتبين في شريط الاخبار : انهيار جزء من الباحة الخلفية للمسجد الأقصى...والمعروض كان برنامج وثائقي عن صيد الحيتان!!

قلبت عالجزيرة و عالاقصى و غيرهم...الكل أكّد الخبر...جمال ريان أتصل بعمرو موسى اللي أكد أن الجامعة العربية دعت لقمة عاجلة و أن الاتصالات الان قائمة للتنسيق بين الدول العربية...محمود عباس قال أنه سيراجع ملف التنسيق الامني مع اسرائيل و أنه سيبعث فريق خاص للتحقيق في الموضوع و أنه ينتظر أن يحصل الفريق على التصاريح اللازمة من الجانب الاسرائيلي...

الرئيس الامريكي اتصل بنتنياهو و أخبره أن التصرفات الاسرائيلية غير مقبوله ولا تساعد في دفع عجلة السلام

الرئيس المصري حمّل مسؤولية اللي صار لحماس و عرقلتها لملف المصالحة و الهدنة مع اسرائيل, مما أدى الى انشغال مصر عن المسجد الاقصى (أصل مصر هيه أم الدنيا, ولا يمكن كانت حتسمح بحاجة زي دي, أصل التلفزيون في القصر عندي بيجيب ميلودي هيتس و ما بيجيبش الجزيرة...فا مكنتش عارف ان في حفريات بتحصل تحت المسجد الاقصى...بس احنا مش حنسكت...والطنطاوي دلوقتي قاعد في المخيطة بتاعته بيفصل لنا فتوى جديدة عن الحكاية دي)

هيفا وهبي أستنكرت كمان و أبدت استعداداتها لتضع (كل امكانياتها) بين يدي الجيوش العربية و أنها مستعدة تموت شهيدة بشرط نشر خبر استشهادها على الصفحة الأولى من مجلة روتانا

وتامر حسني قال انه هوه لما سمع الخبر مقدرش يحبس دمعته و انه ربنا ان شاء الله و هيوفقوا و هيعمل حفلة كبيرة قوي ريعها حيروح لصالح التبرع لبناء أقصى جديد أكبر من اللي اتهد...وان حيكون حريص أن الرقاصات اللي معاه حيتحجبوا قبل ما يرقصوا في الحفلة دي...وان شيخ الجامع اللي بيصلي فيه الفجر كل يوم قله ان الجهاد ممكن يكون بالكلام...فهو دلوقتي بيكتب أغنية جديدة للشباب الزعلان عالأقصى والمتدايق أوي اسمها (كل مرة بيهدّوك فيها ببقى نفسي أأأأ...أأأأ)

الاتحاد الاوروبي استنكر بشده و لكنه دعا الى ضبط النفس لكنه استبعد اقامة محاكمة لأسرائيل في أي محكمة أوروبية بدعوى عدم الاختصاص و رفض الاتحاد القاطع لمعاداة السامية...الامم المتحدة أصدرت قرار دعا اسرائيل للحفاظ على المقدسات و الارث الانساني الموجود على اراضيها..بينما كان وزير الاشغال الاسرائيلي يرسم مسودة على ظهر نسخ هذه القرارات لبناء الهيكل ليطلعها عى مجلس الوزراء...وشارون كان بيضحك في غيبوبته و الاطباء اشاروا الى تحسن حالته..

خرجت الجماهير تعبر عن غضبها في الشوارع...وجو التعبئة (عبّى) الدنيا...وعقدت القمة العربية في مصر...وحضر أردوغان و صرح قبل دخوله أن الجيش التركي على أهبة الاستعداد للمشاركة في الحرب ضد اسرائيل فداءا للأقصى وهو سيكون على رأس الجيش..وأنه حضر للتنسيق مع القيادات و أخذ الأذن باستخدام الاراضي العربية...عقد اجتماع مغلق اغلاقا محكما استمر لمدة 6 ساعات

خرج أردوغان ووجهه فيه 100 لون...رفع تلفونه و حكى : كنسل يا معلم...الله لا يردهم...سكر الخط وقال أنا الحق علي والله

خرج بعده عمرو موسى يصرح: (بعد بحث المستجدات على الساحة بخصوص المسجد الاقصى, وبعد الاطلاع على بيان لجنة التحقيق, وصلت اللجنة لقرار بالاجماع يحمل مسؤولية الانهيار لكثرة عدد المصلين و سجودهم في وقت واحد مما أدى لاهتزاز المسجد بشدة و انهياره...لكننا في الوقت ذاته نحمل اسرائيل مسؤولية عدم وضع تحذيرات للمصلين بوجود حفريات و انفاق تحت المسجد...وعليه فان الجامعة ستطالب بتعويضات لأهالي الشهداء و الجرحى, وان اقتراحا قدم من العقيد معمر القذافي ببناء مسجد أقصى اخر بنفس التصميم و مزود باجهزة تكييف و تقنيات متطورة على الاراضي الليبية قد لقي دعما بالمليارات من الدول الخليجية و ترحيبا من المجتمع العربي و الدولي)

وطلع الطنطاوي من المخيطة تبعته مفصل فتوى تقول: (ان أي عمل انتقامي هو حرام شرعا لأنه يتناقض مع تعاليم الاسلام بالتسامح و العفو عند المقدرة...وان كان واجب المسلمين أصلا هدم المسجد قبل ما ينهد لوحده حتى لا تكون فتنة بين الاديان و ذلك مما حرم الشرع...ويجب عل كل مسلم عاقل بلغ سن الحلم أن يخرج كفارة عن تقصيره في هدم المسجد الأقصى...أصل ربنا قال:(الذي باركنا حوله) يعني حولين المسجد هو المنطقة المباركة مش المسجد نفسه...يعني الحمدلله ما حصلش حاجة كبيرة يعني)

أنا فار دمي..دقيت على جاري السعودي قلتله: يا رجل ما أخدوا قرار الحرب,الله أكبر

رد علي و هو بيفرك عيونه...(اشفيك يا ريّال تراك أشغلتنا؟) قلتله هيك هيك صار...قال( يا شيخ فكّنا من ذي الخرابيط عاد)..وانا راجع على بيتي حزين ناداني...(وكّل الله يا ريّال...عليها وجه الله غير تتعشّون عندنا الليله و مايصير خاطرك الا طيّب..قول تم)..ما رديت و انا راجع عالبيت زحلقت رجلي على الدرج و هوووووووووب ...صحيت من حلمي مفزوع و عطشان ريقي ناشف...

استوعبت انه كان حلم, شربت مي و رجعت نمت..غطيت حالي منيح...تنفست الصعداء وقلت: الحمد لله...لسا ما انهد

من الفن الفلسطيني

صباح الخير...

اليوم فتحت ملف قديم عندي...لوحات لزوجين فلسطينيين جمعهما الفن و من بعده الحب

تمام الاكحل و اسماعيل شموط

إسماعيل شموط (1930 - 2006) فنان تشكيلي فلسطيني يعتبر أحد أبرز رواد الفن التشكيلي في فلسطين، وأحد شخصياته الهامة يراه البعض مؤسس حركة الفن التشكيلي الفلسطيني. كان من مؤسسي قسم الفنون في منظمة التحرير الفلسطينية كما وشغل منصبي الأمين عام لاتحاد الفنانين التشكيليين الفلسطيني والأمين عام لاتحاد الفنانين التشكيليين العرب، حاصل على درع الثورة للفنون والآداب وعلى وسام القدس وعلى جائزة فلسطين للفنون وجوائز عربية ودولية عديدة.

تمام عارف الأكحل الفنانة الفلسطينية التي صوَّرت بإبداع ريشتها وعلى مدى أكثر من خمسين عاما تراث الشعب الفلسطيني وواقع معاناته ولدت في مدينة فلسطين - يافا 1935 شردتها النكبة مع أهلها من يافا إلى بيروت 1948 منحتها كليــة المقاصــد في بيــروت بعثـة لدراســة الفن في المعهد العالي للفنون الجميلة بالقاهرة عام 1953 حصلت على شهادة الفنون الجميلة وشهادة إجازة تدريس الفن من المعهد العالي لمعلمات الفنون بالقاهرة 1957 في القاهرة عام 1954 افتتحه ورعاه الرئيس جمال عبد الناصر شـاركت في المعرض الذي أقامــه زميلـهـا الفنّان اسماعيل شموط و شـاركت زوجها الفنان اسماعيل شموطفي كافة المعارض التي أقيمت لأعمالهما في معظم البلاد العربية، وفي عدد كبير من بلاد العالم شاركت في عشرات المعارض المشتركة العربية والدولية في الدول العربية والأجنبية لها أعمال مقتناه في عدد من متاحف الدول العـربية والأجنبية ومن قـبل مقتني ومحبي أعمالها حاصلة على جوائز متنوعة عديدة

اللوحات تشدك بروعة ألوانها وبساطة رسوماتها مقارنة بالمعنى الذي تحمله...ما رح أحكي كتير...رح أترك اللوحات تحكي عن حالها

We Shall Return - Ismail Shamot

Until he returnes - Ismail Shamout

The spring that was - Ismail Shamout

The Olive Branch - Ismail Shamout

The Lady of Oranges - Ismail Shamout

The Holocaust Palestine - Ismail Shamout

The Exodus - Ismail Shamout

Orange Lovers - Ismail Shamout

Newly-weds on the Border - Ismail Shamout

Memories -Ismail Shamout

The Massacre of KhanYounis - Tamam A Akhal

Olives and Oranges - Tamam Al Akhal

Grinding Stone - Tamam Al Akhal

Cactus and Grapes - Tamam Al Akhal

هاي اللوحات اللي عندي...أكيد في غيرها كتير...بس هاي اللوحات أنا بعتبرها توثيق للتراث الفلسطيني كمان

ان شاء الله تكون عجبتكم

أخزاك الله من شيخ

صباح الخير

منذ كشف الصحف الاجنبية لقيام مصر ببناء جدار فولاذي لمنع الغزيين من حفر المزيد من الانفاق...وحرصا من مصر على رش المعطر لتغطي على رائحة الخيانة المتعفنة للتواطئ الرسمي...طلع علينا الطنطاوي (مش قادر لأقول عنه شيخ) ليصدر فتوى مفصلة تماما على قياس النظام المصري...لكنها للأسف ضيقة على عقولنا ل(نلبسها)...اليكم نص الفتوى

اعتبر مجمع البحوث الإسلامية بالأزهر الشريف أن ما تقوم به السلطات المصرية من بناء جدار فولاذي على حدود قطاع غزة، والذي يمنع دخول أو خروج أهالي القطاع تمامًا، يأتي تنفيذًا لما أمرت به الشريعة الإسلامية.

وقال المجمع: "إن من حق أي دولة أن تُقيم على أرضها من المنشآت والسدود ما يصون أمنها وحدودها وحقوقها، وإن من الحقوق الشرعية لمصر أن تضع الحواجز التي تمنع ضرر الأنفاق التي أقيمت تحت أرض رفح المصرية".

وأضاف البيان، أن هذه الأنفاق التي تهرب منها المخدرات وغيرها، مما يُزعزع أمن مصر ويهدد مصالحها تهديدًا لا مفر من مقاومته.. وأن هذا العمل الذي تقوم به تأمر به شريعة الإسلام التي كفلت لكل دولة حقوقها وأمنها وكرامتها، وأن الذين يعارضون ذلك يخالفون ما أمرت به شريعة الإسلام من أن كل دولة عليها أن تصون حقوق أبنائها وأن تمنع كل عدوان على هذه الحقوق.

انتهى الاقتباس...

مش عارف من وين أبدا...والله من جواتي عم بغلي

يعني عذر أقبح من ذنب...والله لو قالوا انه بيننا و بين اسرائيل اتفاقية امنية و مضطرين نلتزم فيها كان أخف من هالعذر

همه أهل غزة وصات فيهم الاحوال من الرفاهية انهم يتركوا الاكل و الدواء و يدوروا على مخدرات؟

هل نسبة التحشيش بين مصر و غزة أو بين الدول العربية تحتمل المقارنة؟اذن ما رأيك يا طنطاوي أن نفرض حصار على مصر بدعوى خوفنا من انتقال هذه العدة السيئة لنا؟

صحيح أن من حق الدولة الاسلامية أن تصون حقوقها...ولمن أليس هذا هو الاسلام نفسه الذي يوجب عليك أن تحمي شرفك و تدافع عن أخيك المسلم اذا تعرّض للعدوان؟ تمعن يا طنطاوي الاحاديث التالية و قل لي ماذا طبقت منها

قال رسول الله صلى الله عليه وسلم‏:‏ ‏(‏من كان يؤمن بالله واليوم الآخر فليحسن إلى جاره‏(‏‏

قال رسول الله صلى الله عليه وسلم‏:‏ ‏)‏من كان يؤمن بالله واليوم الآخر فلا يؤذ جاره‏(‏‏.‏

رسول الله صلى الله عليه وسلم يقول‏:‏ ‏(‏من آذى جاره فقد آذاني ومن آذاني فقد حاربني‏)‏‏.‏

‏(‏من أشراط الساعة سوء الجوار وقطيعة الأرحام‏)‏‏

قال رسول الله صلى الله عليه وسلم‏:‏ ‏(‏إن هذه الأمة تفتن بعدي‏)‏‏.‏ قالوا يا نبي الله في أي نحو قال‏:‏ ‏(‏لا يعرف جار حق جاره‏)‏‏.‏

(‏ما هو بمؤمن من لا يأمن جاره غوايله - وفي لفظ – بوايقه‏)‏‏

‏(‏ليس المؤمن الذي يشبع وجاره جائع إلى جنبه‏)‏‏

وغيرها الكثير...صدق رسول الله صلى الله عليه و سلم...

كذبت يا طنطاوي انت و اشباه الشيوخ...اتباع مسيلمة

عاشت غزة باذن الله رغم انفك و انف من اشتروك

يوم جديد...عام جديد

امبارح كنا مخططين نسهر للصبح...طبعا بالسعودية ما في مظاهر للاحتفال مع هيك الازمة كانت لا تطاق..

والتلفزيون ما كان في شي مميز...ضليت عال Facebook والناس تهني و تبارك

المهم قبل الساعة 12 كنت نايم...

وصحيت...حسيت زي يوم العيد..فقمت بدي أشوف مظاهر العيد...فتحت الشباك..الشارع ما في أي حركة

رجعت عالغرفة مرتي نايمة...اطلّعت عالمراية...نفس الكرش ونفس الشعرات بنفس معدل التساقط...ونفس البيجاما

باختصار نمت و صحيت بدون أي تغيير...طب ليش الدوشة كانت امبارح؟

الناس كلها كانت عم تحكي عن البدايات الجديدة...وخطط السنة الجاي..وانه السنة الجديدة هي سنة التغيير للاحسن

طيب أنا صراحة ما شفت تغيير بين امبارح و اليوم...ولا حتى بين الشهر الماضي و الجاي

أنا ضد هالتسميات و ضد هالافكار

اذا بدنا نتغير لازم نبدا فورا و ما نستنى تواريخ معينة للبدايات الجديدة...ولا شو رأيكم؟

سنة جديدة انشالله علينا و عليكم سعيدة